ހިޔާ ފްލެޓްތަކުގައި މާލެއަށް ނިސްބަތްނުވާ ގިނަ އަދަދެއްގެ މީހުން ދިރިއުޅޭ ކަމަށާއި އެތަނުގެ 900 ޔުނިޓެއް ބޮޑު އަގުގައި ކުއްޔަށް ދީފައި އެބަހުރި ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން މިއަދު ބޭއްވި ބައްދަލުވުމުގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން އަސްލަމް ވިދާޅުވީ ހިޔާގައި ކުއްޔަށް ދީފައިވާ ތަންތަނުގެ ހިސާބުތައް އޭނާއަށް ލިބިވަޑައިގެންނެވީ ބޯހިމެނުގައި އެއްކުރި މައުލޫމާތުގެ ތެރެއިން ކަމަށެވެ. އޭނާ ވިދާޅުވީ ހިޔާގައި ބޮޑެތި މައްސަލަ އެބަހުރިކަމަށާއި އެތަަނަށް ވަދެގެން ނުވާނެ މީހުން އެތަނަށް ވަދެ އެބަތިބި ކަމަށެވެ.
"ހިޔާ ފްލެޓްގައި 25 ޕަސެންޓް މީހުން އެބަ އުޅޭ މާލެއަށް ނިސްބަތްނުވާ، 900 ގޭބިސީ އެބަހުރި އެތަނަށް ސަރުކާރަށް އެމީހުން ދައްކަން ޖެހޭ އަގަށް ވުރެ ބޮޑު އަގުގައި ކުއްޔަށް ދީފައި. މިއީ ސެންސަސް އިން އަޅުގަނޑަށް ލިބުނު ޕްރިލިމިނަރީ ޑޭޓާއެއް،" އަސްލަމް ވިދާޅުވި އެވެ.
އޭނާ ވިދާޅުވި ގޮތުގައި ފްލެޓްތައް އެގޮތަށް ކުއްޔަށް ދީފައި ހުރި ނަމަވެސް އެ ގޮތަށް ކަންތައް ކުރި މީހުންނާ މެދު އެޅޭނެ ފިޔަވަަޅެއް އެކަމަކު ނެތެވެ. ފްލެޓްތައް ލިބުނު މީހުންގެ ތެރެެއިން 40 ޕަސެންޓް މީހުން ސަރުކާރަށް ދައްކަން ޖެހޭ ފައިސާ ނުދައްކާ ކަަމަށާއި އެހެން ނަމަވެސް އެކަމަށް ވެސް އެޅޭނެ ފިޔަވަޅެއް ނެތް ކަމަށް ވެސް އޭނާ ވިދާޅުވި އެވެ.
"ހަމަ ސާފުކޮށް މި ދަންނަވަނީ، އަސްލުގައި ސަރުކާރަކު ނުހުންނާނެ ދަތެއް އެއްވެސް ރައްޔިތެއް ގައިގައި ބައިޓްކުރާކަށެއް [ދަތް އަޅާކަށެއް]. ސަރުކާރުން މިޒާތު ކަންތައް މާބޮޑަށް ކޮށްފައި، ކަލެކްޓް ކުރުމާ މިކަހަލަ ކަންތައް ކުރާ ކަމަށް ވަންޏާ އެކަމެއް ނުވާނެ،" އަސްލަމް ވިދާޅުވި އެވެ.
ބޯހިޔާވަހިކަން ފޯރުކޮށްދިނުން، މިހާރު ކުރިއަށް ގެންދާ ގޮތް ނޫން އެހެން މޮޑެލަކަށް ބަދަލުކުުރަން އެބަޖެހޭ ކަމަށާއި އެކަމަށް މަސައްކަތް ކުރަމުން އަންނަ ކަމަށް ވެސް އަސްލަމް ވިދާޅުވި އެވެ.
ގައުމީ ތަރައްގީއާއި ތަރިކައިގެ ކޮމިޓީގެ މިއަދުގެ ބައްދަލުވުމަށް އަސްލަމާއި ހައުސިން މިނިސްޓްރީގެ އެހެން ބައެއް އޮފިޝަލުން ވަޑައިގެންނެވީ އެ މިނިސްޓްރީގެ އަހަރީ ރިޕޯޓް އެ ކޮމިޓީން މުރާޖައާ ކުރާތީ މެމްބަރުންގެ ސުވާލުތަކަށް ޖަވާބު ދެއްވުމަށެވެ.
