ރަށްރަށުގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެމްބަރުން އަވަސް އަވަހަށް އިސްތިއުފާ ދިނުމާއި އެ މަގާމުތަކަށް ޝައުގުވެރިކަން ކުޑަ މައްސަލަ ހޯދަން ރައްޔިތުންގެ މަޖިލީހުގެ ކަމާގުޅޭ ދެ ކޮމިޓީއެއް ގުޅިގެން ދިރާސާއެއް ކުރަމުން އަންނަ ކަމަށް ހުޅުމާލޭ ދާއިރާގެ މެމްބަރު އަލީ ނިޔާޒް ވިދާޅުވެއްޖެ އެވެ.
ހާއްސަކޮށް އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެމްބަރުން އިސްތިއުފާ ދިނުން އާންމުވެ، ބައި-އިލެކްޝަންތައް ބޭއްވުން އިންތިހާއަށް އިތުރުވެފައިވާއިރު، އެގޮތަށް ހުސްވާ ގޮނޑިތަކަށް އަހަރަކު އެއް ފަހަރު ބައި-އިލެކްޝަން ބޭއްވޭ ގޮތަށް ގާނޫނު އިސްލާހުކުރަން ސަރުކާރުގެ ފަރާތުން ވަނީ މަޖިލީހަށް ހުށަހަޅައިފަ އެވެ.
އެ ބިލު ލާމަރުކަޒީ ކޮމިޓީން ނިންމި ގޮތުގެ ރިޕޯޓަށް ބުދަ ދުވަހުގެ ޖަލްސާގައި ވާހަކަ ދައްކަވަމުން، އެ ކޮމިޓީގެ މުގައްރިރުކަން ވެސް ކުރައްވައި އަލީ ނިޔާޒް ވިދާޅުވީ މިދިޔަ ދެ އަހަރެއްހާ ދުވަހުގެ ތެރޭގައި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެމްބަރުން އިސްތިއުފާ ދީގެން، 30 އަށް ވުރެ ގިނަ ބައި-އިލެކްޝަން ބާއްވަން ޖެހުނު ކަމަށެވެ.
އެހެންކަމުން، އެ ކޮމިޓީތައް މިހާރު އޮތް ފޯމެޓުގައި މަސައްކަތް ނުކުރުމުގެ އިތުރުން އެ މަގާމުތަކަށް ކުރިމަތިލުމުގެ ޝައުގުވެރިކަން ކުޑަވާ ސަބަބު ދެނެގަންނަންޖެހޭ ކަމަށް އޭނާ ވިދާޅުވި އެވެ.
"މިހެން މި ދިމާވާ ސަބަބު އަޅުގަނޑުމެން ދެނެގަންނަންޖެހޭ. އެ ސަބަބު ދެނެގަތުމަށް ޓަކައި އަޅުގަނޑުމެން ކޮމިޓީގައި މިހާރު ދިރާސާއެއް އެބަ ކުރަން،" އަލީ ނިޔާޒް ވިދާޅުވި އެވެ.
އޭނާ އިތުރަށް ވިދާޅުވި ގޮތުގައި އެކިއެކި ބައްދަލުވުންތަކުން އެ ކޮމިޓީތަކުގެ މެމްބަރުންގެ ބައެއް ކަންބޮޑުވުންތަކާއި ޝަކުވާތައް މިހާރު ވެސް ދެނެގަނެވިފައިވާ ކަމަށެވެ.
އޭގެ އެއް ކަމަކީ، އަލީ ނިޔާޒް ވިދާޅުވި ގޮތުގައި، ޕާޓް ޓައިމް ބައެއްގެ ގޮތުގައި އެ ކޮމިޓީތަކުގެ މެމްބަރުން ތިބި ނަމަވެސް، އިންތިހާބު ކާމިޔާބުކުރަން ލޯކަލް ކައުސިންސިލްތަކެކޭ އެއްފަދައިން ބުރަކޮށް މަސައްކަތް ކުރަންޖެހުމެވެ.
"އެ ބޭފުޅުންގެ ޝަކުވާއަކީ، ތިމަންނާމެން އެހާ ބުރަކޮށް މަސައްކަތް ކޮށްގެން، އެވަރުގެ ވަރުގަދަ އިންތިހާބަކާ ކުރިމަތިލައިގެން އައިމާ ތިމަންނާމެންނަށް ލިބެން ޖެނޭނީ ޕާޓް ޓައިމް މުސާރައެއް ނޫނޭ. ފުލް ޓައިމް މުސާރައެކޭ ލިބެން ޖެހޭނީ،" އޭނާ ވިދާޅުވި އެވެ.
އަލީ ނިޔާޒް ވިދާޅުވީ ޕާޓް ޓައިމް މުސާރައެއް ދިނުމުގެ ސަބަބުން ފުލް ޓައިމް ވަޒީފާއަކަށް ލިބޭ އިނާޔަތްތަކާއި ވަޒީފާގެ ރައްކާތެރިކަން އެ ކޮމިޓީތަކުގެ މެމްބަރުންނަށް ނުލިބޭ ކަމަށެވެ.
"މިސާލަކަށް، ވިހެއިމާ ލިބޭ ޗުއްޓީއެއް ނުލިބޭ. ރޯދަ އިނާޔަތެއް ނުލިބޭ. އެއީ ޕާޓް ޓައިމް ވަޒީފާއެއް ވީމަ ވާ ގޮތް،" އޭނާ ވިދާޅުވި އެވެ.
އަލީ ނިޔާޒް ވިދާޅުވި ގޮތުގައި މިހާރު ކުރަމުންދާ ދިރާސާއިން މިފަދަ ގިނަ ކަންކަން ދެނެގަނެވޭނެ އެވެ.
އޭރުން ގާނޫނަށް ނުވަތަ ސިޔާސަތަށް ގެންނަންޖެހޭ ބަދަލެއް ގެންނަން ފަސޭހަވެގެންދާނެ ކަމަށް އޭނާ ވިދާޅުވި އެވެ.
