މޯލްޑިވްސް ބާސްކެޓްބޯޅަ އެސޯސިއޭޝަން (އެމްބީއޭ) އިން އިންތިޒާމް ކޮށްގެން ކުރިއަށްގެންދިޔަ ޖޫނިއާ ބާސްކެޓްބޯޅަ ކޯޗަސް ކޯސް 22 ކޯޗުން ފުރިހަމަކޮށް ސެޓްފިކެޓު ހާސިލްކޮށްފި އެވެ.
މިދިޔަ މަހުގެ 20-30 އަށް ކުރިއަށްދިޔަ ކޯޗިން ކޯހަކީ ޒުވާން އާ ކުޅުންތެރިން ބާސްކެޓްބޯޅަ ތަމްރީން ކުރުމުގައި އާ ކޯޗުންގެ ބައިވެރިވުން އިތުރުކުރުމުގެ ގޮތުން ކުރިއަށްގެންދިޔަ ކޯހެކެވެ. ގައުމީ ޓީމުތަކާއި ކުލަބު ލެވެލްގައި ފާހަގަކޮށްލެވޭ ކުޅުންތެރިންނާ އެކު ކުރިއަށްގެންދިޔަ މި ކޯހުގައި ބައިވެރިވީ 23 ފަރާތަކުންނެވެ. އޭގެ ތެރެއިން 22 މީހުން ވަނީ ކޯހުން ފާސްވެ ސެޓްފިކެޓު ހާސިލްކޮށްފަ އެވެ. އެއީ 15 ފިރިހެން ކޯޗުންނާއި، 7 އަންހެން ކޯޗުންނެވެ.
މޯލްޑިވްސް ނެޝަނަލް އިންސްޓިއުޓް އޮފް ސްޕޯޓްސްއާ ގުޅިގެން ކުރިއަށްގެންދިޔަ މި ކޯހުން ފާސްވި ބައިވެރިންނަށް ކޯޗިން ލައިސަންސް ލިބޭނީ ކުރިއަށް އޮތް ތިން މަސް ދުވަހު ކޯޗިންގެ ތެރޭގައި 30 ގަޑިއިރު ފުރިހަމަ ކުރުމުންނެވެ.
ކޯޗާސް ކޯހުގައި ބައިވެރިވި އެކި ފަރާތްތައް ނިމުމުގެ ރަސްމިއްޔާތުގެ ތެރެއިން.--- ފޮޓޯ: އަބްދުﷲ އިޔާން/ އަދަދު
މި ކޯހުގެ ބައިވެރިވެރިންނަށް ކިޔަވައިދެއްވީ މިވަގުތު ރާއްޖޭގައި ފާހަގަކޮށްލެވޭ ކޯޗުންގެ ތެރޭގައި ހިމެނޭ ބާސްކެޓްބޯޅަ ކޯޗު، އަދި ސްޕޯޓްސް ކައުންސިލްގެ ރައީސް، އިބްރާހިމް ނާހިދުގެ އިތުރުން ކާމިޔާބު ކޯޗުން ކަމަށްވާ އަހްމަދު ނަޒީފް, މުހައްމަދު ނަސީރު, މުހައްމަދު ވަހީދު، މުހައްމަދު ހާޝިމް, އަބްދުއްﷲ ރާފިއު އަދި ހަސަން މުހައްމަދު ދީދީ އެވެ. މީގެ އިތުރުން ސްޕެޝަލް އޮލިމްޕިކްސް އެސޯސިއޭޝަނުގެ ފަރާތުން ފާތިމަތް ފައިރޫޒާ އާއި އިބްރާހިމް ރަމީޒް ވެސް މި ކޯހުގައި އިންސްޓްރަކްޓަރުންގެ ގޮތުގައި ބައިވެރިވި އެވެ.
އެމްބީއޭ އިން ޖޫނިއާ ބާސްކެޓްބޯޅަ ކޯޗަސް ކޯސް ފުރަތަމަ ބާއްވަން ވިސްނީ މިއަހަރުގެ ކުރީކޮޅުގަ އެވެ. ނަމަވެސް ވޯލްޑް އެސޯސިއޭޝަން އޮފް ބާސްކެޓްބޯލް ކޯޗަސް (WABC)ގެ ކޯޗިން ސިލަބަސްއާ އެއްގޮތަށް ރާއްޖޭގެ ކޯޗިން ކިޔަވަދޭ ކަރިކިއުލަމް ބަދަލުކޮށް އެމްކިއުއޭ ގަބޫލުކުރާ މިންގަޑަށް މި ހުރިހާ ސިލަބަސްތަކެއް ފަށްތައިގެން ކޯސް ކުރިއަށް ގެންދަން ބޭނުންވާތީ މި ކޯސް ބޭއްވުން ލަސްވީ އެވެ.
އެމްބީއޭ އިން ގަބޫލުކުރާ ގޮތުގައި މުޅި އަހަރުގެ މަސައްކަތުން އާ 22 ކޯޗެއް ބާސްކެޓްގެ ތެރެއަށް ނެރެވުމަކީ މި ކުޅިވަރުގެ ތަރައްގީއަށް އެޅުނު މުހިންމު ފިޔަވަޅެކެވެ.
ގައުމީ ބާސްކެޓްބޯޅަ އެސޯސިއޭޝަނުން ވަނީ ޒުވާން އާ ކުޅުންތެރިން މި ކުޅިވަރުގެ ތެރެއަށް ނެރުމަށް ކުޑަ ކުދިންގެ މިނީ ބާސްކެޓްބޯޅަ ފެސްޓިވަލެއް ވެސް މި އަހަރުގެ ސެޕްޓެމްބަރު މަހުގެ ތެރޭގައި ބާއްވައިފަ އެވެ. މި ފެސްޓިވަލްގައި މާލޭގެ އެކި ސްކޫލުތަކުން 1300 އަށްވުރެ ގިނަ ކުދިން ބައިވެރިވި އެވެ.
