މުބާރާތުގެ ގަވާއިދު ތެރެއިން ކުރިއަށްދިއުމަށްޓަަކައި، މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން ޓަލޮންސް ބާސްކެޓްބޯލް ކްލަބަށް ދީފައިވާ ސަސްޕެންޝަން ދަމަހައްޓަން ނިންމައިފި އެވެ.
ޓަލޮންސް އިން ވަނީ 2023 ވަނަ އަހަރުގެ ޑިސެމްބަރު މަހު، ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަނުގެ ޗެމްޕިއަންކަން ހޯދައިފަ އެވެ. ލީގުގެ ފަހު މެޗުގައި، ރޯޔަލްސް ބާސްކެޓްބޯޅަ ކުލަބު 70-64 އިން ބަލިކޮށްގެން ޗެމްޕިއަންކަން ހޯދި ޓަލޮންސް އަށް މި ކާމިޔާބީއާ އެކު، 2024 ވަނަ އަހަރުގެ ގައުމީ ބާސްކެޓްބޯޅަ ލީގުގެ އެއް ވަނަ ޑިވިޝަނުން ފުރުސަތު ލިބިފަ އެވެ. އެކަމަކު، އެކި ސަބަބުތަކާ ހުރެ، 2024 ވަނަ އަހަރުގެ ފުރަތަމަ ޑިވިޝަނުގައި ޓަލޮންސް އަށް ވާދަކުރެވޭ ގޮތެއްނުވި އެވެ.
އެ ސަބަބާ ހުރެ، މުބާރާތުގެ ގަވާއިދުގެ 7.2.3 ގައި ވާ ގޮތުގެ މަތިން، ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަނުގައި ވާދަކޮށް، ގައުމީ ބާސްކެޓްބޯޅަ ލީގުގެ ފުރަތަމަ ޑިވިޝަނަށް ޕްރޮމޯޓްވުމަށް ފަހު، އެއްވެސް ސަބަބަކާ ހުރެ މުބާރާތުގައި ވާދަނުކުރާނަމަ ދެ އަހަރަށް ސަސްޕެންޑް ކުރެވޭނެ ކަމަށް ބަޔާންކޮށްފައި އޮތުމުން، ޓަލޮންސް، އެ މުއްދަތަށް ސަސްޕެންޑްކުރަން އެމްބީއޭ އިން ނިންމީ އެވެ.
މީގެ ކުރިން، 2022 ވަނަ އަހަރު، އެމްބީއޭ ޗެމްޕިއަންޝިޕްގެ ޝީލްޑް ވެސް ކާމިޔާބުކުރި، ޓަލޮންސްގެ ސަސްޕެންޝަންގެ މުއްދަތު ގުނަން ފެށީ، 2024 ވަނަ އަހަރުގެ ގައުމީ ބާސްކެޓްބޯޅަ ލީގުގެ ފުރަތަމަ ޑިވިޝަން ފެށި ދުވަސް ކަމަށްވާ 17 ޖެނުއަރީންނެވެ. އެހެންކަމުން، މި މަހު 17 އަށް އެއް އަހަރުފުރިފައިވާއިރު، ކުރިއަށް އޮތް 29 ވަނަ އެމްބީއޭ ޗެމްޕިއަންޝިޕްގައި ވާދަކުރަން ޓަލޮންސް އިން ވަނީ އެ ކްލަބަށް ދީފައިވާ ސަސްޕެންޝަނަށް ލުޔެއް ދިނުމަށް އެދި އެމްބީއޭ އަށް ސިޓީއެއް ފޮނުވައިފަ އެވެ.
އެ ސިޓީ އަށް ދިން ޖަވާބުގައި އެމްބީއޭ އިން ބުނެފައިވަނީ، ޓަލޮންސް އިން ފޮނުވި ސިޓީއާ ގުޅޭގޮތުން، އެމްބީއޭގެ ހިންގާ ކޮމިޓީގެ ޖަލްސާއެއްގައި މަޝްވަރާ ކުރުމަށް ފަހު ނިންމާފައިވަނީ، ގަވާއިދުގައި ބަޔާންކޮށްފައިވާ ކަންކަން ދަމަހައްޓައި، އެ އަށް އިހުތިރާމްކުރުމުގެ ގޮތުން، ޓަލޮންސް އިން އެދިފައިވާ ގޮތަށް، ސަސްޕެންޝަނަށް ލުޔެއް ދެވެން ނެތް ކަމަށެވެ.
އެމްބީއޭ އިން ބުނީ މި ގޮތަށް ނިންމި އެންމެ މައިގަނޑު އެއް ސަބަބަކީ ހެދިފައިވާ ގަވާއިދުތަކަށް މެމްބަރު ކްލަބްތަކުން ބޯލެނބުމަށާއި ހިންގުން ހަރުދަނާ ކުރަން އެޅި ފިޔަވަޅެއްގެ ގޮތުން ކަމަށެވެ.
