ކޮވިޑް ބަލިމަޑުކަމުގެ ސަބަބުން ވެއްޓިފައިވާ ފަތުރުވެރިކަމުގެ ސިނާއަތް އަލުން ކޮޅަށް ނެގުމަށް ހޮންކޮންގުން ހިލޭ 500،000 އެއާލަައިން ޓިކެޓް ދޫކުރަން ނިންމައިފި އެވެ.
އެ ޓިކެޓުތަކުގެ އަގަކީ 254.8 މިލިއަން ޑޮލަރެވެ. ހޮންކޮންގުން މިހާރު ދަނީ ކޮވިޑާ ގުޅިގެން އެޅި ގިނަ ފިޔަވަޅުތަކަކަށް ލުއިތައް ފޯރުކޮށްދެމުންނެވެ.
އެހެން ނަމަވެސް، ބަލިމަޑުކަމުގެ ކުރިން ފްލައިޓް ޝެޑިއުލްތައް އޮތް ގޮތަށް އަނބުރާ ގެންދިޔުމަށް ބޮޑެތި އެއާލައިންތަކެއް އަދިވެސް ގިނަ ގޮންޖެހުންތައް އެބަ ހުއްޓެވެ.
ބުދަ ދުވަހު އިނގިރޭސި އެއާލައިން ވާޖިން އެޓްލާންޓިކުން ބުނީ ޔޫކްރެއިން ހަނގުރާމައާ ގުޅުން ހުރި މައްސަލަތަކަކާ ހެދި ހޮންކޮންގުގައި އޮޕަރޭޓް ކުރުން ހުއްޓާލާނެ ކަމަށެވެ.
"ހޮންކޮންގަށް އެތެރެވާ ދަތުރުވެރިން އަމަލު ކުރަން ޖެހޭ ކޮވިޑް އުސޫލުތައް އުވާލިކަން ސަރުކާރުން އިއުލާން ކުރުމާ އެކު އެއާޕޯޓް އޮތޯރިޓީއިން މި ނިންމުން އެއާލައިންތަކާ ގުޅިގެން ފައިނަލް ކުރާނެ. އޭގެ ފަހުން ހިލޭ ޓިކެޓްތައް ދިނުމަށް އިޝްތިހާރު ކުރަން ފަށާނަން،" ހޮންކޮންގް ޓޫރިޒަމް ބޯޑުގެ އެގްޒެކްޓިވް ޑިރެކްޓަރު ދޭން ޗެންގް ވިދާޅުވި އެވެ.
ޗެންގް ވިދާޅުވީ ބަލިމަޑުކަމުގެ ތެރޭގައި އެއާލައިންތަކަށް އެހީވުމުގެ ގޮތުން ސަރުކާރުން ގިނަ ޓިކެޓުތަކެއް ގަނެފައިވާ ކަމަށާއި ހިލޭ ޓިކެޓް ދޫކުރާ ކެމްޕެއިންގައި ބޭނުން ކުރަނީ އެ ޓިކެޓުތައް ކަމަށެވެ. އެ ޓިކެޓުތައް ދޫކުރާނީ އަންނަ އަހަރު ހޮންކޮންގަށް އެތެރެވާ އަދި އެ ސިޓީއިން ފުރާ މީހުންނަށެވެ.
މި އަަހަރުގެ ފުރަތަމަ އަށް މަހު ހޮންކޮންގަށް ދަތުރު ކުރީ 184،000 މީހުންނެވެ. އެއާ ހިލާފަށް ބަލިމަޑުކަމުގެ ކުރިން 2019 ވަނަ އަހަރު 56 މިލިއަން މީހުން އެ ސިޓީއަށް ދަތުރު ކުރި އެވެ.
