ގާބިލުކަން އެބަ ހުރި، ދަރަނި ނަގަނީ އުފާވެރި ދިރުޅުމެއް އުޅެވޭނެ ގޮތް ހަދައިދޭން: ފައްޔާޒު

މިނިސްޓަރު ފައްޔާޒް ރޭގެ ޖަލްސާގައި ވާހަކަ ދައްކަވަނީ: ވިދާޅުވީ ސަރުކާރުން އިސްކަން ދެއްވަނީ އަސާސީ ހިދުމަތްތައް ފުރިހަމަ ކުރުމަށް ކަމަށް -- ފޮޓޯ: އިކޮނޮމިކް މިނިސްޓްރީ

މިނިސްޓަރު ފައްޔާޒް ރޭގެ ޖަލްސާގައި ވާހަކަ ދައްކަވަނީ: ވިދާޅުވީ ސަރުކާރުން އިސްކަން ދެއްވަނީ އަސާސީ ހިދުމަތްތައް ފުރިހަމަ ކުރުމަށް ކަމަށް -- ފޮޓޯ: އިކޮނޮމިކް މިނިސްޓްރީ

ދަރަނި ނެގުމުގެ ގާބިލުކަން ރާއްޖޭގައި އެބަހުރި ކަމަށާއި މަޝްރޫއުތައް ކުރިއަށް ގެންދިޔުމަށް ދަރަނި ނަގަނީ އުފާވެރި ދިރިއުޅުމެއް ރައްޔިތުންނަށް ހޯދައި ދިނުމަށް ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ރޭ ވިދާޅުވެއްޖެ އެވެ.

އުތުރުގައި އިގުތިސޯދީ ހަބެއް ގާއިމުކުރުމުގެ ބޭނުމުގައި ހިންގާ ހަނިމާދޫ އިންޓަނޭޝަނަލް އެއާޕޯޓު ޒަމާނީ ފެންވަރަށް ތަރައްގީކުރުމުގެ މަޝްރޫއުގެ މަސައްކަތްތަކުގެ އެެއްބަސްވުމުގައި ރޭ ވަނީ ސޮއިކޮށްފަ އެވެ. އެއީ ވެސް އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ހިންގާ 2.1 ބިލިއަން ރުފިޔާގެ ބިޔަ މަޝްރޫއު އެކެވެ.

މުޅި ދުނިޔެ ވެސް އިގްތިސާދީ ދަތިކަމެއްގެ ތެރޭގައި އޮއްވާ ދަރަނި ނަގައިގެން ބޮޑެތި މަޝްރޫއުތައް ކުރިއަށްގެންދާނީ އިދިކޮޅާއި އާންމުންގެ ފާޑުކިޔުން ވެސް ވަނީ އަމާޒުވެފަ އެވެ. ނަމަވެސް ހަނިމާދޫ ޕްރޮޖެކްޓުގައި ސޮއި ކުރުމުގެ ހަފްލާފައި ފައްޔާޒް ވަނީ އެ ފާޑުކިޔުންތަކަށް ރައްދު ދެއްވައިފަ އެވެ.

"ވައުދުވީ ކަންކަން މިދަނީ ފުރިހަމަވަމުން. މި ދަތި އުނދަގުލުގައި ވެސް ދަރަންޏޭ، ދަރަންޏޭ ކިޔަކިޔާ އޮއްވާ ވެސް، ދަރަނި ނަގައިގެން ވެސް މިކަން ކުރަން ޖެހޭ. ބައެއް ބޭފުޅުން ވިދާޅުވޭ ދަރިންގެ ބޮލުގަ ދަރަނި އެޅެނީއޭ. އެ ދަރިންގެ ބޮލުގައި ދަރަނި ނޭޅި، މިކަން ނުކޮށްފިއްޔާ، އެ ކުދިންގެ މުޅި އުމުރު ޖެހޭނީ މާލެ އައިސް ގެއެއްގައި ގުލާނުކުރަން،" ފައްޔާޒު ވިދާޅުވި އެވެ.

އޭގެ އިތުރުން، ދަރަނި ނަގައިގެން ކަންކަން ކުރަނީ، ކުރިއަށް އޮތް ޖީލުތަކަށް، އެބައެއްގެ އަމިއްލަ ވަޒަނުގައި އުފާވެރި ދިރިއުޅުމެއް އުޅެވޭނެ މަގު ހޯދައިދޭން ކަމަށް އޭނާ ވިދާޅުވި އެވެ. އެކަން ކުރަން ރާއްޖޭގެ ގާބިލުކަން އެބަހުރި ކަމަށާއި އިގްތިސާދު އޮތީ ގަދަކޮށް ކަމަށް އޭނާ ވިދާޅުވި އެވެ.

ހަނިމާދޫ އެއާޕޯޓު މަޝްރޫއުގެ މަސައްކަތްތައް ލަސްވެ ސަރުކާރަށް އަމާޒުވާ ފާޑުކިޔުންތަކަށް ވެސް އެ ރަސްމިއްޔާތުގައި ވާހަކަ ދައްކަވަމުން ފައްޔާޒު ރޭ ވަނީ ރައްދު ދެއްވާފަ އެވެ.

"މިފަދަ ކަންކަން ކުރަން ނުކުމެ ކުރަން އުޅޭއިރު އެނގޭނީ މިއީ ކިހާވަރެއްގެ ކަމެއްކަން، ކިހާ ވަރެއްގެ ގޮންޖެހުންތަކާ ކުރިމަތިވާކަން. ފައިސާ ވެސް ހޯދަން ޖެހޭ. ފައިސާ ލިބޭ އިރުގައި އެ ފައިސާ ހަރަދު ކުރުމަށް އޮވޭ އުސޫލުތަކެއް އެ ފައިސާ ދޭ ފަރާތްތަކުން. އެތައް މަރުހަލާތަކެއް ކަޑައްތު ކުރަން ޖެހޭ މިއަދު އައި ހިސާބަށް އަންނަން،" މަޝްރޫއު ލަސްވުމާ ގުޅޭގޮތުން އޭނާ ވިދާޅުވި އެވެ.

އަސާސީ ކަންކަން ފުރިހަމަވުމުން ނުނިމޭ ކަމަށާއި ރައްޔިތުންނަށް އުފާވެރި ދިރިއުޅެމެއް ލިބޭނީ އެބަޔަކު އުޅޭ ތަނެއްގައި އިގްތިސާދީ ހަރަކާތްތައް ހިންގައި، ވަޒީފާގެ ފުރުސަތުތައް ތަނަވަސްކޮށްދޭންޖެހޭ ކަމަށް ފައްޔާޒު ވިދާޅުވި އެވެ. އެކަން ހަގީގަތަކަށް ހެދުމަށް މާލެ ފިޔަވައި ހަތަރު ސަރަހައްދެއްގައި އިގްތިސާދީ ހަބުތައް ތަރައްގީކުރަން ސަރުކާރުން ނިންމި ކަމަށް އޭނާ ވިދާޅުވި އެވެ.

އެގޮތުން، އުތުރުގެ އަތޮޅުތަކުގެ ބައިވަރު ރަށްތައް ރިސޯޓު ހަދަން ދީފައި ހުރިކަން ފާހަގަ ކުރައްވައި ފައްޔާޒު ވިދާޅުވީ އެ ރަށްތައް ނުނިމުމުގައި އިންވެސްޓަރުންނާ ދެމެދު މައްސަލަ ޖެއްސެން ނެތް ކަމަށެވެ. އެކަން އެގޮތަށް ވެފައި ވަނީ ސަރުކާރުތަކުގެ އިހުމާލުން ކަމަށް އޭނާ ވިދާޅުވި އެވެ.

"ވޭތުވެދިޔަ އެތައް އަހަރެއް ތެރޭ ސަރުކާރަކުން ކުރަން ޖެހޭ ކަންކަން ނުކުރެވިގެން އެ ވިޔަފާރިތައް [ރިސޯޓު ހަދަން ދީފައިވާ ރަށްތައް] ބަނގުރޫޓުވެ، ހަލާކުވެގެންދިޔުމަކީ، ހަގީގަތުގައި އެ މީހުންނާ ދޭތެރޭ މައްސަލަ ޖެއްސެން އޮތް ކަމެއް ނޫން. އެހެންވީމަ އަޅުގަނޑުމެން ނިންމީ ހަނިމާދޫގެ އެއާޕޯޓު ނަންބޯޑު އިންޓަނޭޝަނަލްގެ ބަދަލުގައި ހަގީގީ އިންޓަނޭޝަނަލް އެއާޕޯޓަކަށް ހަދަން،" އުތުރުގައި ވިޔަފާރިތައް ތަރައްގީ ނުކުރެވި އޮތް ސަބަބު ހާމަކުރައްވަމުން ފައްޔާޒު ވިދާޅުވި އެވެ.

ލާމަރުކަޒީ ގާނޫނެއް ހަދާފައި ބާރުތައް ދޫކޮށްލި ނަމަވެސް ކަންކަން ނުވާނެ ކަމަށާއި ޔުނިޓަރީ ދައުލަތެއް ކަމުން ޒަމާނުއްސުރެ ނުކުރެވި ހުރި ކަންކަން މައި ސަރުކާރުން ކުރަން ޖެހޭ ކަމަށް ފައްޔާޒު ވިދާޅުވި އެވެ. އޭގެ ތެރެއިން، އެންމެ ބޮޑު އަހަންމިއްޔަތެއް ދެނީ އަސާސީ ހިދުމަތްތައް މާލެއާ އެއް ފެންވަރަކަށް ގެނައުމުގެ މަސައްކަތް ކަމަށް އޭނާ ވިދާޅުވި އެވެ.

"ތިރީހަކަށް އަހަރު ނުކުރެވި ހުރި ކަންކަން ކުރަން ޖެހި، ކުރަމުން، ނިންމަމުން މިދަނީ މި ހަތަރު އަހަރު ތެރޭ. އެއީ ގަބޫލު ކުރިޔަސް ނުކުރިޔަސް ފެންނަން އޮތް ހަގީގަތް. އެކަންކަން ވަމުންދާތަން އެ ފެންނަނީ،" ފައްޔާޒު ވިދާޅުވި އެވެ.

ހަނިމާދޫ އެއާޕޯޓު މަޝްރޫއު

މި މަޝްރޫއަކީ އިންޑިޔާގެ އެގްޒިމް ބެންކުގެ ލޯނު ފައިސާއިން ކުރިޔަށް ގެންދިޔުމަށް ހަމަޖެހިފައިވާ މަޝްރޫއެކެވެ. މި މަޝްރޫއުގެ ދަށުން ހަނިމާދޫގައި 2،460 މީޓަރުގެ އާ ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭނެ ޒަމާނީ ޓާމިނަލަކާއި އެއާޕޯޓަށް ބޭނުންވާނެ އެހެނިހެން ވަސީލަތްތައް ގާއިމުކުރެވިގެންދާނެ އެވެ. މިއެއާޕޯޓުގެ ޓަރމިނަލް ފަރުމާކުރެވިފައިވަނީ ދިވެހި ކަނޑުތަކުގައި އުޅޭ މަޑިސިފަވާނެފަދަ ދިވެހިވަންތަ ފަރުމާއަކަށެވެ.

ދެ އަހަރު ދުވަހުގެ ތެރޭގައި މަޝްރޫއުގެ މަސައްކަތްތައް މުޅިން ނިމި، ބައިނަލްއަގުވާމީ ފްލައިޓްތައް އޮޕަރޭޓް ކުރަން ފަށާނެ އެވެ. މި މަޝްރޫއު ނިމުމުން ހަނިމާދޫ އިންޓަނޭޝަނަލް އެއާޕޯޓް ހިންގުމަށް ހަމަޖެހިފައިވަނީ މިހާރުވެސް އެ އެއާޕޯޓް ހިންގާ ދިވެހި ސަރުކާރުގެ ކުންފުނި، ރީޖަނަލް އެއާޕޯޓްސް ކޮމްޕެނީގެ ފަރާތުންނެވެ.

މިމަޝްރޫއު ނިމުމުން ބައިނަލްއަގުވާމީ ދަތުރުތަކުގައި ބޭނުންކުރާ އެއާބަސް A320 އާއި ބޯއިން 737 ސައިޒުގެ ބޯޓުފަހަރަށް ހަނިމާދޫ ވައިގެބަނދަރުން ހިދުމަތް ދެވިގެން ދާނެ އެވެ. އަދި މެދުއިރުމައްޗާއި، ދެކުނު އޭޝިއާ އާއި ދެކުނު އިރުމަތީ އޭޝިއާ އާއި އިރުމަތީ އެފްރިކާގެ ގައުމުތަކުން ސިދާ ފްލައިޓްތައް ހަނިމާދޫ އަށް އޮޕަރޭޓް ކުރުމުގެ ގާބިލުކަން ލިބިގެންދާނެ އެވެ.

ކޮމެންޓް

ފަހުގެ ޚަބަރު

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

ހިދުމަތުގެ އެންމެ މަތީ ޝަރަފު މުހައްމަދު ރަޝީދާއި އައްބާސަށް

ދައުލަތަށް ހިދުމަތް ކުރުމުގެ އެންމެ މަތީ ޝަރަފު، މުހައްމަދު ރަޝީދު އިބްރާހީމާއި އައްބާސް އިބްރާހީމަށް ވަނީ އަރުވާފައި. މުހައްމަދު ރަޝީދަށް މި ޝަރަފު އެރުވީ ދީނީ ރޮނގުން ކުރެއްވި ހިދުމަތްތަކަށް ކަމަށްވާއިރު، އައްބާސް އިބްރާހީމަށް މި ޝަރަފު އެރުވީ ދިވެހިބަހާއި އަދަބިއްޔާތުގެ ދާއިރާއިން.

އާންމުންގެ ތަނަވަސްކަން ހުއްޓުވަނީ ރާއްޖެ ނިކަމެތިކުރުން: ނަޝީދު

ރަސްމާލެ މަޝްރޫއު އީގަލް ހިލްސް ކުންފުންޏާ ހަވާލުކުރުމާ ދެކޮޅަށް އެމްޑީޕީން ކުރާ މަސައްކަތަކީ އާންމު ރައްޔިތުންނަށް ލިބެން އޮތް ތަނަވަސްކަން ހުއްޓުވައި ރާއްޖެ ނިކަމެތިކުރުމަށް ޖަހާ މަޅިއެއް ކަމަށް ނަޝީދު ވިދާޅުވި.

ޖޭޕީ، އަދާލަތު، އެމްޑީއޭ އަދި އެމްއެންޕީން މެންބަރުން ވަކިވަނީ

އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި ޖޭޕީ، އެމްޑީއޭ، އަދާލަތު އަދި އެމްއެންޕީން ގިނަ އަދަދެއްގެ މެންބަރުން ވަނީ ވަކިވެފައި. މީގެ ބަދަލުގައި ސަރުކާރު ހިންގާ ޕީއެންސީއާއި އިދިކޮޅު އެމްޑީޕީގެ މެންބަރުންގެ އަދަދު ބޮޑުތަނުން އިތުރުވި. އެންމެ ގިނަ މެންބަރުން ވަކިވީ ޖޭޕީން ކަމަށްވާއިރު، އެންމެ ގިނަ މެންބަރުން އަލަށް ގުޅުނީ ޕީއެންސީއާ

އިސްތިއުނާފު ލަސްވާ މައްސަލައިގައި ޖޭއެސްސީ ހާޒިރުކުރަނީ

ޖަލު ހުކުމް ތަންފީޒުކޮށް ނިމޭއިރުވެސް އިސްތިއުނާފު މަރުހަލާ ނުނިމޭ މައްސަލައަށް ގާނޫނީ ހައްލެއް ހޯދުމަށް ޖޭއެސްސީ މަޖިލީހުގެ ޖުޑިޝަރީ ކޮމިޓީއަށް ހާޒިރުކުރުމަށް ވަނީ ފާސްކޮށްފަ. އިސްތިއުނާފު މައްސަލަތައް ނިންމަންޖެހޭ ވަކި މުއްދަތެއް ގާނޫނުގައި ނެތުމުގެ ސަބަބުން ކުށްވެރިންގެ އަސާސީ ހައްގުތައް ގެއްލެމުންދާކަން މެންބަރުން ފާހަގަކުރެއްވި.

"ބިން ދީ ދީނާއި މިނިވަންކަން ގެއްލުވާ ވެރިޔަކު އަދި މި ނޫނީ ނާދޭ"

ބޭރު މީހުންނަށް ބިން މިލްކުކުރެވޭ ގޮތަށް ސަރުކާރުން ނިންމާފައިވާ ނިންމުމަކީ ރާއްޖޭގެ ދީނީ ވަހުދަތާއި މިނިވަންކަމަށް އޮތް ބޮޑު ނުރައްކަލެއް ކަމަށާއި މި ނިންމުމުގެ ސަބަބުން ރާއްޖޭގެ ބިންތަކުގެ މިލްކުވެރިކަން އެހެން ދީންތަކުގެ މީހުންނަށް ލިބިދާނެ ކަމުގެ ބިރު އޮތްކަން ފާހަގަކުރައްވައި، ގައުމު ދިފާއުކުރުމަށް ނުކުތުމަށް ޖަމީލު ގޮވާލައްވައިފިއެވެ.

ސުޕްރީމް ކޯޓުގެ ފަނޑިޔާރުންނަށް އޮނަރަބަލް ކިޔަން އަންގައިފި

ސުޕްރީމް ކޯޓުގެ ފަނޑިޔާރުންނާ މުހާތަބުކުރާއިރު "އޮނަރަބަލް" ކިޔުމަށް ޖޭއެސްސީން ރަސްމީކޮށް އަންގައި ސާކިއުލާއެއް ވަނީ ނެރެފައި. މި ބަދަލާއެކު ފަނޑިޔާރުންގެ ނަމުގެ ކުރިއަށް "އަލްއުސްތާޒް" ބޭނުންކުރުން ހުއްޓާލަން ޖެހޭއިރު، މިއީ މީގެ ކުރިން އަމަލުކުރަމުން އައި އުސޫލަށް ގެނައި ރަސްމީ ބަދަލެއް.

Newsletter

Get the latest news delivered straight to your inbox