ވިލިމާލެ ފަރަށް އެރި ބްރިޖު މަސައްކަތްކުރާ ޕްލެޓްފޯމް އެތަނުން ނެގި ނަމަވެސް އެ ސަރަހައްދަށް އެޅިފައި ހުރި ޕްލެޓްފޯމުގެ އެހެން ބައިތައް ނަގާ ނުނިމޭތީ ފަރަށް ލިބުނު ގެއްލުން ބެލުމުގެ މަސައްކަތް އަދި ނުފެށޭ ކަމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)ން ބުނެފި އެވެ.
މާލެ-ތިލަފުށި ބްރިޖު މަސައްކަތުގައި ބޭނުންކުރާ "ސެލްފް އެލެވޭޓިން ޕްލެޓްފޯމް" އެއް ވިލިމާލޭ ފަރަށް އެރީ މީގެ ގާތްގަނޑަކަށް ދެ ހަފުތާއެއްހާ ދުވަސް ކުރިންނެވެ. ބްރިޖު މަސައްކަތްކުރާ ކޮންޓްރެކްޓަރު އެފްކޮންސްއާ ހަވާލާދީ ޕްލޭނިން މިނިސްޓްރީން ބުނީ ޕްލެޓްފޯމް ފަރަށް އެރީ އެންކަރަށް ދިމާވި މައްސަލައަކުން ކަމަށެވެ.
މި ޕްލެޓްފޯމް އެތަނުން ނެގޭ ވަރުވީ ހާދިސާ ހިނގިތާ 12 ދުވަސް ފަހުންނެވެ.
ޕްލެޓްފޯމް ނުނަގާ ލަސްވި މައްސަލައިގައި ތިމާވެށި ރައްކާތެރިކުރަން ގޮވާލާ ޖަމިއްޔާތަކުން ވަނީ ކަންބޮޑުވުން ފާޅުކޮށްފަ އެވެ. އެ ޖަމިއްޔާތަކުގެ މައިގަނޑު ކަންބޮޑުވުމަކަށްވީ ޕްލެޓްފޯމް ފަރުގައި އޮންނަހާ ހިނދަކު ފަރަށް ގެއްލުން ލިބެމުން ދިޔުމެވެ.
ޕްލެޓްފޯމް ނެގުން ލަސްވެގެން ކުއްލި މައްސަލައެއްގެ ގޮތުގައި ރައްޔިތުންގެ މަޖިލީހަށް ވެސް ވެއްދި އެވެ. އެ މައްސަލަ މަޖިލީހަށް ހުށަހެޅުއްވީ ވިލިމާލެ ތަމްސީލުކުރައްވާ އެ ދާއިރާގެ މެންބަރު އަހުމަދު އުޝާމެވެ. އެކަމަކު އެ ދުވަހު އެ މައްސަލަ ވަނީ ތަޅުމުން ބޭރުކޮށްލާފަ އެވެ.
މި ހާދިސާއާ ގުޅިގެން ފަރަށް ލިބުނީ ކިހާވަރެއްގެ ގެއްލުމެއް ކަމެއް މިހާތަނަށް ސާފެއް ނުވެ އެވެ.
ފަރަށް ލިބުނު ގެއްލުން ބެލުމުގެ މަސައްކަތާ ގުޅިގެން އީޕީއޭގެ ޑިރެކްޓާ ޖެނެރަލް މުހައްމަދު ނައީމް "އަދަދު" ނޫހަށް ވިދާޅުވީ އެ މަސައްކަތް ކުރެވޭނީ ޕްލެޓްފޯމުގެ ބާކީ ހުރި ބައިތައް ނަގާ ސާފުކުރުމުން ކަމަށެވެ.
"އެތަނަށް އެޅިފަ އެބަހުރި ދަގަނޑު ހޮޅިތަކާ އެއްޗެހި. އެއެއްޗެހި އެތަނުން ނެގާ އެ ސަރަހައްދު ސާފުކުރީމަ އެ މަސައްކަތް ފެށޭނީ," އޭނާ ވިދާޅުވި އެވެ.
ސޯޝަލް މީޑީއާގައި އާންމުކޮށްފައިވާ ފޮޓޯތަކާއި ވީޑިއޯތަކުން ފެންނަ ގޮތުގައި ޕްލެޓްފޯމް އުރުނު ސަރަހައްދުގެ ފަރުމަތީގައި ޕްލެޓްފޯމުގެ ފައިތަކުން ވަކިވެފައިވާ ހަތަރު ދަގަނޑު ހޮޅި އޮވެ އެވެ.
މި މަސައްކަތް ނިމޭނީ ކިހާ ދުވަހެއްގެ ތެރޭގައި ކަމެއް އަދި ނޭނގެ އެވެ. ބްރިޖު މަސައްކަތްކުރާ ކޮންޓްރެކްޓަރުގެ ފަރާތުން މަސައްކަތް ނިމޭނެ ތާރީހެއް ލިބިފައިވޭތޯ ސުވާލުކުރުމުން ނައީމް ވިދާޅުވީ ނުލިބޭ ކަމަށެވެ. ނަމަވެސް ބާކީ ހުރި ބައިތައް ނެގިހާ އަވަހަކަށް ފަރަން ލިބުނު ގެއްލުމުގެ މަސައްކަތް އީޕީއޭއިން ފަށާނެ ކަމަށް އޭނާ ވިދާޅުވި އެވެ.
މި ފަރަށް ލިބުނު ގެއްލުން ވަޒަންކޮށް ކޮންޓްރެކްޓަރު ޖޫރިމަނާ ކުރުމުގެ ބާރު ލިބެނީ އީޕީއޭއަށެވެ.
ސަރުކާރުން ރެކޯޑު ހޭދައެއް ކޮށްގެން ހިންގާ މާލެ-ތިލަފުށި ބްރިޖް މަޝްރޫއަކީ 500 މިލިއަން ޑޮލަރު (7.6 ބިލިއަން ރުފިޔާ)ގެ އަގުބޮޑު މަޝްރޫއެކެވެ. ސަރުކާރުގެ އިގުތިސޯދީ ތަސައްވުރާ ގުޅޭ މި މަޝްރޫއުގެ މަސައްކަތް ނިމުމުން ގްރޭޓާ މާލޭ ސަރަހައްދުގައި ހިމެނޭ ހުރިހާ ރަށްތަކެއް ގުޅާލެވޭނެ އެވެ.
މިއީ އިގުތިސޯދީ ގޮތުން ފައިދާ ބޮޑު މަޝްރޫއުއެއް ނަމަވެސް، މި މަޝްރޫއު އިއުލާނުކުރެއްވުނު ދުވަހުން ފެށިގެން ވެސް ތިމާވެށީގެ ޖަމިއްޔާތަކުން ވަނީ މިއީ ތިމާވެއްޓަށް ގެއްލުން ބޮޑު މަޝްރޫއެއްގެ ގޮތުގައި ސިފަކޮށްފަ އެވެ.
އެގޮތުން މި ބްރިޖު މަސައްކަތާއި، އެ މަސައްކަތާ ގުޅިގެން ހިންގާ ގުޅިފަޅު ހިއްކުމުގެ މަސައްކަތުގެ ސަބަބުން އެ ސަރަހައްދުގެ ފަރުތަކަށް އިޔާދަނުކުރެވޭ ވަރުގެ ބޮޑުގެ ގެއްލުމެއް ލިބޭނެތީ އެ މަސަކަތްތައް ހުއްޓާލަން އެ ޖަމިއްޔާތަކުން ވަނީ ސަރުކާރަށް ގޮވާލާފަ އެވެ.
