މީޑިއާތަކުން ހަދާ ގޯސްތައް ބަލައި ފިޔަވަޅު އެޅުމުގައި ބޮޑެތި ބާރުތަކެއް އޮންނަ ގޮތަށް މީޑިއާ ކޮމިޝަން އުފައްދަން މޯލްޑިވްސް މީޑިއާ ކައުންސިލް (އެމްއެެމްސީ)އިން ބިލެއްގެ ދެލި ކޮޕީ އެކުލަވާލައިފި އެވެ.
މީޑިއާގެ ކަންތައްތައް ރެގިއުލޭޓްކުރަން މީޑިއާ ކައުންސިލާއި ބްރޯޑްކާސްޓިން ކޮމިޝަން އޮތުމުގެ ބަދަލުގައި އެ ދެ ކޮމިޝަނުން ކުރާ މަސައްކަތްތައް ކުރާނެ އެއް ކޮމިޝަން އުފެއްދުމަކީ ސަރުކާރުގެ ވައުދެކެވެ. އެމްއެމްސީން މިހާރު އެކުލަވައިލާފައިވާ ބިލުގައި އޮތީ އެގޮތަށް އުފައްދާ ކޮމިޝަނެއް އުފައްދާނެ ގޮތާއި ދޭނެ ބާރުތަކާ ބެހޭ ހުށަހެޅުންތަކެކެވެ.
އެނގިފައިވާ ގޮތުގައި އެމްއެމްސީން އެ ދެލިކޮޕީ އެޓާނީ ޖެނެރަލްގެ އޮފީހަށް ފޮނުވަން ތައްޔާރުވަމުން އަންނަ އިރު އެޓާނީ ޖެނެރަލްގެ އޮފީހުން ވެސް އަންނަނީ މީޑިއާ ކޮމިޝަން އުފައްދާ ގާނޫނު ހަދަން ބިލެއް އެކުލަވައިލުމުގެ މަސައްކަތް ކުރަމުންނެވެ.
ރައީސް އައްޔަންކުރާ 2 މެމްބަރަކާއި އިންތިހާބުކުރާ 5 މެމްބަރުން
މިހާރު ހުރި މިނިވަން އެހެން ކޮމިޝަންތަކުގެ މެމްބަރުންނަށް ދޭ މުސާރައާ އިނާޔަތްތަކާ އެކު މީޑިއާ ކޮމިޝަން އުފަައްދަން އެމްއެމްސީން އެކުލަވައިލި ދެލިކޮޕީގައި ހުށަހަޅާފައިވާ ގޮތުން، އަލަށް އުފައްދާ ކޮމިޝަނުގައި ތިއްބަވާނީ ޖުމްލަ ހަތް މެމްބަރުންނެވެ. އެއީ ރައީސް އައްޔަން ކުރައްވާ ދެ މެމްބަރަކާއި މީޑިއާތަކުން އިންތިހާބުކުރާ ފަސް މެމްބަރުންނެވެ.
މީޑިއާ ކޮމިޝަނުގެ މެމްބަރަކަމަށް ކުރިމަތިލުވުމުގެ ޝަރުތުތައް
- ދަށް ވެގެން ފުރަތަމަ ޑިގްރީ ހާސިލުކޮށްފައި ވުން
- އުުމުރުން 35 އަހަރު ވެފައިވާ ދިވެއްސަކަށް ވުން
- ރަޖިސްޓްރީ ކޮށްގެން ހިންގާ ނޫހެއްގެ އެޑިޓަރުކަމުގައި ނުވަތަ އިސް މަގާމެއްގައި 10 އަހަރު މަސައްކަތް ކޮށްފައި ވުން
- ހައްދެއް ކަނޑައެޅިފައިވާ ކުށެއް ސާބިތުވެފައި ނުވުން
- ވޭތުވެ ދިޔަ ފަސް އަހަރުގެ ތެރޭގައި ޖިނާއީ ކުށެއް ސާބިތުވެފައި ނުވުން
- ސިޔާސީ ޕާޓީއެއްގެ މެމްބަރެއް ކަމަށް ނުވުން
އެމްއެމްސީގެ ދެލިކޮޕީގައިވާ ގޮތުން، މީޑިއާ ކޮމިޝަނަށް މެމްބަރުން އިންތިހާބުކުރުމުގެ ކަންތައް ކުރިއަށް ގެންދާނީ އިލެކްޝަންސް ކޮމިޝަނުންނެވެ. އެކަމަށް ބާއްވާ އިންތިހާބު އިއުލާނުކުރާނީ ވެސް އިލެކްޝަންސް ކޮމިޝަނުންނެވެ. އެ އިންތިހާބު އިއުލާނުކުރުމަށް ފަހު ކުރިމަތިލުމަށް ލިބޭނީ 10 ދުވަހުގެ މުއްދަތެވެ.
މީޑިއާ ކޮމިޝަނުގެ ބާރުތައް
އެމްއެެމްސީގެ ދެލިކޮޕީގައި، އަލަށް އުފައްދާ މީޑިއާ ކޮމިޝަނަށް ލިބިދޭ ބާރުތައް ހިމަނާފައި އޮތީ ކޮމިޝަނުގެ މަސްއޫލިއްޔަތުތަކުގެ ގޮތުގަ އެވެ. އެ ދެލިކޮޕީގެ 22 ވަނަ މާއްދާގެ (ށ)ގައި ވާގޮތުން، ނޫސްވެރިކަމާ ގުޅުން ހުރި، ހިޔާލުފާޅުކުުރުުމުގެ މިނިވަންކަމަށް ހުރަސް އެޅޭ ގޮތަށް ސަރުކާރާއި މީޑިއާތަކާއި އެހެން ފަރާތްތަކުން ކުރާ ކަންތައްތައް ހުއްޓުވުމަކީ ކޮމިޝަނުގެ މަސްއޫލިއްޔަތެކެވެ.
މީޑިއާގައި ހަރަކާތްތެރިވާ ފަރާތްތަކުން އަމަލުކުރަން ޖެހޭ ހަމަތަކާއި އަހުލާގީ މިންގަނޑުތައް ކަނޑައަޅާނީ ވެސް އެ ދެލިކޮޕީގައިވާ ގޮތުން ކޮމިޝަނުންނެވެ. މީޑިއާގައި ޝާއިއުކުރާ ތަކެއްޗާ ބެހޭ ގޮތުން ހުށަހަޅާ ޝަކުވާތައް ބަލައި ފިޔަވަޅު އެޅުމުގެ ބާރު ވެސް އޮންނާނީ ދެލިކޮޕީގައިވާ ގޮތުން އެ ކޮމިޝަނަށެވެ. މީޑިއާގައި މަަސައްކަތްކުރާ ފަރާތްތައް އެކްރެޑިޓްކުރުމުގެ ބާރު ވެސް އޮންނާނެ އެެވެ.
"ރާއްޖޭގައި ރަޖިސްޓްރީކޮށްގެން ޝާއިއުކުރާ ނޫސް މަޖައްލާތަކާއި ވެބްސައިޓްތަކާއި އެފަރާތްތަކުގެ މީސްމީޑިއާ އެކައުންޓްތަކާއި ރާއްޖޭގައި ހިންގާ ރޭޑިއޯ ސްޓޭޝަންތަކާއި އެތަންތަނުގެ މުވައްޒަފުންގެ މައްޗަށާއި މިގާނޫނުގެ މަގުސަދު ހާސިލުކުރުމަށް އެންގުމެއް އަންގަން ޖެހިއްޖެ ކަމަށް ކޮމިޝަނަށް ފެނުނު ކޮންމެ ފަރާތެއްގެ މައްޗަށް ކޮމިޝަންގެ ބާރު ހިނގާނެ އެވެ،" އެމްއެމްސީގެ ދެލިކޮޕީގައިވެ އެވެ.
