ރައްޔިތުންގެ މަޖިލީހުގެ މެންބަރުން އެ މެންބަރުން ތަމްސީލު ކުރާ ޕާޓީ އިން ވަކި ކުރި ނަމަވެސް ގޮނޑި ނުގެއްލޭނެ ކަމަށް ބަންޑާރަނައިބުގެ އޮފީހުން އިއްޔެ ސުޕްރީމް ކޯޓުގައި ބުނެފި އެވެ.
ސިޔާސީ ޕާޓީއަކުން ވަކި ކުރިޔަސް ގޮނޑި ނުގެއްލޭނެ ކަމަށް ބަންޑާރަނައިބުގެ އޮފީހުން ބުނީ، ސިޔާސީ ޕާޓީއަކުން މެންބަރަކު ވަކިކޮށްފި ނަމަ ގޮނޑި ގެއްލޭނެ ކަމަށް ބަޔާންކޮށް ގާނޫނުއަސާސީއަށް އިތުރު ކުރި މާއްދާތައް ބާތިލް ކުރަން ހުށަހެޅި މައްސަލައިގައި ވާހަކަ ދައްކަވަމުންނެވެ.
"މިހާރު މި އޮތް ސިޓުއޭޝަންގައި ރައްޔިތުންގެ މަޖިލީހުގެ މެންބަރަކު، ޕާޓީއަކަށް ނިސްބަތްވާ މެންބަރަކު، ޕާޓީ އިން ވަކިކޮށްފި ކަމުގައިވާ ނަމަ 73 ވަނަ މާއްދާގެ ބޭނުމަށްޓަކައި އެ މެންބަރެއްގެ ރައްޔިތުންގެ މަޖިލީހުގެ މެންބަރުކަމެއް ނުގެއްލޭ. އަޅުގަނޑުމެންގެ ޕޮޒިޝަންއަކީ އެއީ،" ދައުލަތުގެ ވަކީލަކު އަލީ ޝުހައިލް މުހައްމަދު އިއްޔެ ވިދާޅުވި އެވެ.
ގާނޫނުއަސާސީގެ 73 ވަނަ މާއްދާގެ ބ. ގެ އެއް ވަނަ ނަންބަރުގައި ބުނެފައި ވަނީ "ސިޔާސީ ޕާޓީގެ މެންބަރުކަމުން ގާނޫނުގައި ބަޔާންކުރާ ގޮތުގެ މަތިން" މެންބަރަކު ވަކިކޮށްފި ނަމަ އޭނާގެ ގޮނޑި ގެއްލޭނެ ކަމަށެވެ.
ދައުލަތުން ބުނަނީ އެ މާއްދާގައި އެ ބުނާ ގާނޫނު އަދި ވުޖޫދުގައި ނެތް ކަމަށެވެ. އެހެންކަމުން ޕާޓީއަކުން މެންބަރަކު ވަކިކުރިޔަސް އޭނާ މެންބަރުކަމުން ވަކިނުވާނެ ކަމަށް ދައުލަތުން ބުންޏެވެ.
"އަޅުގަނޑުމެން މި ގާނޫނު މާނަ ކުރަނީ ކުރިއަށް އޮތް ތަނުގައި އަންނާނެ ގާނޫނެކޭ،" ވަކީލު ޝުހައިލް ވިދާޅުވި އެވެ.
އެހެން ނަމަވެސް، މެންބަރަކު އޭނާ ތަމްސީލު ކުރާ ޕާޓީއަކުން އަމިއްލައަށް ވަކިވެއްޖެ ނަމަ ނުވަތަ އެހެން ޕާޓީއަކަށް ސޮއިކޮށްފި ނަމަ ގޮނޑި ގެއްލޭނެ ކަމަށް ވެސް ދައުލަތުން ބުނެ އެވެ.
ސިޔާސީ ޕާޓީއަކުން ވަކިވެއްޖެ ނަމަ ނުވަތަ އެހެން ސިޔާސީ ޕާޓީއަކާ ގުޅިއްޖެ ނަމަ އެ މެންބަރެއްގެ ގޮނޑި ގެއްލޭނީ، އެ ފަދަ ހާލަތްތުގައި އިތުރު ގާނޫނަކަށް ބަލަންޖެހޭނެ ކަމަށް ގާނޫނުއަސާސީގައި ބަޔާންކޮށްފައިނުވާތީ ކަމަށް ދައުލަތުން ބުނެ އެވެ.
އެ މައްސަލަ ސުޕްރީމް ކޯޓަށް ހުށަހެޅުއްވީ ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ހުސެއިން އެެވެ. އެ މައްސަލައިގެ ތެރެއަށް އިދިކޮޅު އެމްޑީޕީ އިން ވަނީ ތަދައްހުލްވެފަ އެވެ.
ގާނޫނުއަސާސީގެ 73 ވަނަ މާއްދާއަށް ގެނައި ބަދަލު
ބ. ރައްޔިތުންގެ މަޖިލީހަށް ހޮވިފައިވާ މެންބަރަކަށް އަންނަނިވި ހާލަތުންކުރެ ހާލަތެއް މެދުވެރިވެއްޖެނަމަ އެ މީހަކު ރައްޔިތުންގެ މަޖިލީހުގެ މެންބަރުކަމުން ވަކިވާނެއެވެ.
1 - ވަކި ސިޔާސީ ޕާޓީއެއްގެ ފަރާތުން ވާދަކޮށްގެން ރައްޔިތުންގެ މަޖިލީހަށް އިންތިހާބުވުމަށްފަހު، އެ މެންބަރަކު ރައްޔިތުންގެ މަޖިލީހަށް އިންތިހާބުވި ރައްޔިތުންގެ މަޖިލީހުގެ އުމުރުގެ ތެރޭގައި، އެ މެންބަރަކު ތަމްސީލުކުރާ ސިޔާސީ ޕާޓީން އަމިއްލައަށް ވަކިވުން ނުވަތަ އެ ސިޔާސީ ޕާޓީގެ މެންބަރުކަމުން ގާނޫނުގައި ބަޔާންކުރާ ގޮތުގެމަތިން ވަކިކުރުން ނުވަތަ އެ މެންބަރަކު ތަމްސީލުކުރާ ސިޔާސީ ޕާޓީ ނޫން އެހެން ސިޔާސީ ޕާޓީއެއްގެ މެންބަރަކަށްވުން.
2 - ރައްޔިތުންގެ މަޖިލީހުގެ މެންބަރަކު، އެ މެންބަރަކު ރައްޔިތުންގެ މަޖިލީހަށް އިންތިހާބުވި ރައްޔިތުންގެ މަޖިލީހުގެ އުމުރުގެ ތެރޭގައި، އެ މެންބަރަކު ތަމްސީލު ކުރާ ސިޔާސީ ޕާޓީން އަމިއްލައަށް ވަކިވުން ނުވަތަ އެ ސިޔާސީ ޕާޓީގެ މެންބަރުކަމުން ގާނޫނުގައި ބަޔާންކުރާ ގޮތުގެ މަތިން ވަކިކުރުން ނުވަތަ އެ މެންބަރަކު ތަމްސީލުކުރާ ސިޔާސީ ޕާޓީ ނޫން އެހެން ސިޔާސީ ޕާޓީއެއްގެ މެންބަރަކަށްވުން.
3 - އަމިއްލަ ގޮތުން ވާދަކޮށްގެން ރައްޔިތުންގެ މަޖިލީހަށް އިންތިހާބުވުމަށްފަހު، އެ މެންބަރަކު ރައްޔިތުންގެ މަޖިލީހަށް އިންތިހާބުވި ރައްޔިތުންގެ މަޖިލީހުގެ އުމުރުގެ ތެރޭގައި، ސިޔާސީ ޕާޓީއެއްގެ މެންބަރަކަށްވުން.
