ބަދުއަހުލާގީ ވީޑިއޯއިން ފެންނަ ބައެއް މީހުން ފުލުހުންގެ ހުއްދައާއެކު އުމްރާއަށް ފުރައިފި

ގިނަ އަދަދެއްގެ މީހުންނާއެކު އެއް ޖިންސުން ގުޅުން ހިންގި ކަމަށް އިއުތިރާފުވެފައިވާ ބަންގްލަދޭޝްގެ އަލަމްގީރް މައްސަލައިގައި ހިމެނޭ ދެ މީހަކު ހުއްދައާއެކު އުމްރާއަށް ފުރާފައިވާ ކަމަށް ފުލުހުން މިއަދު ބުނެފި އެވެ.

ބަދުއަހުލާގީ މައްސަލަތަކުގައި ހިމެނޭ ދެ މީހަކު އުމްރާއަށް ފުރުމުގެ ހުއްދަ ފުލުހުން ދިންއިރު އެ މައްސަލައިގައި ހިމެނޭ 18 މީހެއްގެ ޕާސްޕޯޓް ހިފެހެއްޓުމަށް ވަނީ އަމުރުކޮށްފަ އެވެ. ފުލުހުން ބުނީ ރާއްޖެއިން ބޭރަށް ފުރުމުގެ ހުއްދަ ދިނީ އުމްރާއަށް ފުރަން ކުރިން ހަމަޖައްސާފައިވާ މީހުން ކަމަށެވެ.

"އެއް ޖިންސުން ގުޅުން ހިންގި މައްސަލަތަކުގެ ތަހުގީގަށް ފުރުން މަނާކޮށްފައިވާ މީހުންގެ ތެރެއިން އުމްރާގެ އަޅުކަން އަދާކުރަން ދިޔުމުގެ އިންތިޒާމްތައް ކުރިން ވެސް ހަމަޖައްސާފައިވާ ދެ މީހަކު އުމްރާއަށް ފުރުމުގެ ވަގުތީ ހުއްދަ ދީފައިވޭ،" މި ނޫހުން ކުރި ސުވާލަކަށް ޖަވާބު ދެމުން ފުލުހުން ބުންޏެވެ.

އެ މައްސަލައިގައި ހިމެނޭ ބައެއް މީހުންގެ ޕާސްޕޯޓު ހިފެހެއްޓުމުގެ ކުރިން ވެސް ރާއްޖެއިން ފުރައިގެން ގޮސްފައިވެ އެވެ. ފުލުހުން އިއްޔެ ބުނީ އެގޮތަށް ފުރައިގެން ދިޔަ މީހުން ހޯދުމުގެ މަސައްކަތް މިހާރު ކުރަމުންދާ ކަމަށެވެ.

މި މައްސަލައިގައި މިހާތަނަށް ތުހުމަތު ކުރެވެނީ 38 މީހުންނަށެވެ. އޭގެ ތެރެއިން ބައެއް މީހުންގެ އެއް ވީޑިއޯއަށް ވުރެ ގިނަ ވީޑިއޯ ވެސް ހުރި ކަމަށް ވެ އެވެ.

ވީޑިއޯ މައްސަލައިގައި ހިމެނޭ ބައެއް މީހުންގެ ފާހަގަ ކުރުމަށްފަހު، އެމީހުންނަކީ ދައުލަތުގެ އޮފީސްތަކުގައި މަސައްކަތް ކުރާ މީހުން ނަމަ، ފުލުހުން ދަނީ އެކަން އެ އޮފީސްތަކަށް އަންގަމުންނެވެ.

އެއާއެކު، ގިނަ އޮފީސްތަކުން ދަނީ ވީޑިއޯތަކުގެ މައްސަލައިގައި ހިމެނޭ މީހުން ވަޒީފާއިން ސަސްޕެންޑުކުރަމުންނެވެ. މިގޮތުން މިހާތަނަށް ކަސްޓަމްސް ދެ މުވައްޒަފަކާއި ބައެއް މިނިސްޓްރީތަކުގެ މުވައްޒަފުންނާއި އިމާމެއްގެ އިތުރުން ޓީޗަރަކާއި ސިފައިންގެ މީހެއް ވެސް ވަނީ ވަޒީފާއިން ސަސްޕެންޑުކޮށްފަ އެވެ.

އެ މައްސަލައާ ގުޅިގެން މިހާތަނަށް ފުލުހުން ވަނީ ތިން މީހަކު ހައްޔަރުކޮށްފަ އެވެ. އެއީ އަލަމްގީރުގެ އިތުރުން އަލަމްގީރާ އެކު ދައުރުވެފައިވާ ވީޑިއޯތަކުން ފެނިފައިވާ ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު (ކާނަލް) އާއި ގާނޫނީ ވަކީލު ނާޒިމް އަބްދުއްސައްތާރު އަދި ފުލުހެކެވެ.

މީގެ ތެރެއިން ނަޝީދު ފިޔަވައި އިތުރު މީހުންގެ މައްޗަށް ދައުވާ ކުރުމަށް ޕީޖީގެ މަޝްވަރާއަށް މިހާރު ވަނީ ހުށަހަޅައިފަ އެވެ.