މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމް ކޮށްގެން ކުރިއަށް ގެންދިޔަ 10 ބޯލް އެސޯސިއޭޝަން ކަޕް ހުސައިން ފަޔާޒް ކާމިޔާބުކޮށްފި އެވެ.
މި މަހުގެ 5-9 އަށް ކުރިއަށްދިޔަ މުބާރާތުގައި 33 ކުޅުންތެރިން ވާދަކުރި އެވެ. ހުރިހާ ކުޅުންތެރިން 16 ގްރޫޕަށް ބަހާލުމަށް ފަހު ދެ ވަނަ ބުރުން ޖާގަ ލިބުނީ ކޮންމެ ގްރޫޕަކުން ވެސް ގަދަ ދެ ކުޅުންތެރިންނަށެވެ.
ރާއްޖޭގެ ގައުމީ ޓީމުގެ ފަޔާޒް ޗެމްޕިއަންކަން ހޯދީ ފައިނަލްގައި އަސްލަމް އަބްދުﷲ 9-5 ފްރޭމުން ބަލިކޮށްގެންނެވެ. ފައިނަލް މެޗު ފަށައިގެން ލީޑުގައި އޮވެ، ކުޅުނީ އަސްލަމް އެވެ. އެ ގޮތުން 3-1 ގެ ލީޑެއް އަސްލަމް ނެގި ނަމަވެސް ފަޔާޒު ވަނީ މަޑު މަޑުން ގޭމްގެ ތެރެއަށް ވަދެ، ބްރޭކަށް ދިޔައިރު 4-4 އިން ސްކޯ އެއްވަރުކޮށްފަ އެވެ.
ބްރޭކަށް ފަހު ނުކުމެ ފަޔާޒު ފެނުނީ ތަފާތު ފޯމެއްގައި ކުޅެލިތަނެވެ. މާ ގިނަ ފުރުސަތުތަކެއް އަސްލަމް އަށް ނުދީ އިތުބާރާ އެކު ކުޅެ ފަޔާޒު މެޗު ކާމިޔާބުކުރި އެވެ.
މުބާރާތުގެ ފައިނަލަށް ފަޔާޒު ދަތުރުކުރީ ސެމީ ފައިނަލުގައި އިސްމާއިލް ސުވެއިފު 7-4 ފްރޭމުން ބަލިކޮށްގެންނެވެ. ކުއާޓާ ފައިނަލުގައި ފަޔާ މޮޅުވީ ގައުމީ ޓީމްގެ އިސްމާއިލް ޖީހާން އަތުން 7-4 ފްރޭމުންނެވެ.
އަސްލަމް ފައިނަލަށް ދަތުރުކުރި ގޮތަށް ބަލާއިރު އޭނާ ވަނީ ސެމީ ފައިނަލްގައި ގައުމީ ޓީމްގެ މުހައްމަދު ޝަރީފް 7-6 ފްރޭމުން ބަލިކޮށްފަ އެވެ. ކުއާޓާ ފައިނަލުގައި އަސްލަމް މޮޅުވީ އިބްރާހިމް އާފީ އަތުން 7-4 ފްރޭމުންނެވެ.
އެމްޕީބީއޭގެ މިއަހަރު ބާކީ ހުރި މުބާރާތްތަކަށް ބަލާއިރު، އަންނަ ސެޕްޓެމްބަރު މަހު ގައުމީ ފެންވަރުގެ ތިން މުބާރާތެއް ކުރިއަށްދާނެ އެވެ. އެއީ 10 ބޯލް ޗެމްޕިއަންޝިޕާއި، 9 ބޯލް އެސޯސިއޭޝަން ކަޕްގެ އިތުރުން 9 ބޯލް ޗެމްޕިއަންޝިޕެވެ. އަހަރުގެ އެންމެ ފޯރިގަދަ މުބާރާތްކަމަށްވާ ގައުމީ ބިލިއާޑް މުބާރާތް އޮންނާނީ އޮކްޓޯބަރު މަހުގެ ފަހުކޮޅުގަ އެވެ.
