މިހާރު ރާއްޖޭގައި ކުރިއަށްދާ މޯލްޑިވްސް އޯޕަން، 10 ބޯލް ޕޫލް ބިލިއާޑް ޗެމްޕިއަންޝިޕްގެ ނޮކައުޓް ބުރުން، ރާއްޖޭގެ އަހުމަދު ޝިވާޒް ފުރުސަތު ހޯދައިފި އެވެ.
ޝިވާޒް، އަކީ މި ފަހަރުގެ މުބާރާތުގައި ވާދަކުރާ ދިވެހި ކުޅުންތެރިންގެ ތެރެއިން ނޮކައުޓަށް ދަތުރުކުރި ހަމައެކަނި ދިވެހި ކުޅުންތެރިޔާ އެވެ. އެ ގޮތުން ބަލާއިރު، ޝިވާޒް ވަނީ ވާދަކުރި ގްރޫޕްގައި ކުޅުނު ތިން މެޗުގެ ތެެރެއިން ދެ މެޗުން މޮޅުވެފަ އެވެ.
އެ ގޮތުން، ފުރަތަމަ މެޗުގައި ކުވެއިތުގެ ބަދޭރު އަލްވާދީ އަތުން ޝިވާޒް 8-0 އިން ބަލިވި ނަމަވެސް ދެން ކުޅުނު ދެ މެޗުން ވަނީ، މޮޅުވެފަ އެވެ. އެއީ، ވިއެޓްނާމްގެ ނުގުޔެން އަން ޓުއާން އަތުން 8-0 އިންނާއި މެލޭޝިއާގެ ޑަރީލް ޝިއާ އަތުން 8-4 އިންނެވެ.
މިއަދު ދެ ވަނަ ބުރުގައި ކުޅޭ މެޗުގައި، ޝިވާޒް ބައްދަލުކުރާނީ، ޝޯން މަރިކްއާ އެވެ.
މިދިޔަ އަހަރުގެ މޯލްޑިވްސް އޯޕަންގައި ރާއްޖޭގެ ހަސަން ޝާޒް މުހައްމަދު ވަނީ މޯލްޑިވްސް އޯޕަންގެ ގްރޫޕް ސްޓޭޖް ފަހަނައަޅައި ނޮކްއައުޓް ބުރުން ޖާގަ ހޯދައިފަ އެވެ.
މިދިޔަ އަހަރު ރާއްޖޭގައި ބޭއްވި މި މުބާރާތުގެ ޗެމްޕިއަންކަން ހޯދީ ޗައިނީސް ތައިޕޭގެ ކޯ ޕީ ޗުން އެވެ. އޭނާ ފައިނަލަށް ދަތުރުކުރީ ދުނިޔޭގެ ރޭންކިންގެ ގަދަ 10 ގައި ހިމެނޭ ކުޅުންތެރިން ބަލިކުރުމަށްފަހުގަ އެވެ.
އަންނަ އާދިއްތަ ދުވަހުގެ ނިޔަލަށް، ޕޫލް ބިލިއާޑް ސެންޓަރުގައި، ކުރިއަށްދާ މި ފަހަރުގެ މޯލްޑިވްސް އޯޕަންގައި ޖުމްލަ 96 ކުޅުންތެރިން ވާދަކުރެ އެވެ. އޭގެ ތެރޭގައި ދުނިޔޭގެ ފަސް ޗެމްޕިއަނުން ހިމެނޭ ކަމަށް މޯލްޑިވްސް ޕޫލް ބިލިއާޑް އެސޯސިއޭޝަނުން މައުލޫމާތު ދެ އެވެ.
