ގައުމީ ބިލިއާޑް ޗެމްޕިއަންޝިޕްގެ ޓީމް އިވެންޓްގެ ޗެމްޕިއަންކަން ދިވެހި ސިފައިންގެ ކްލަބުން ހޯދިއިރު, ފިރިހެން ޑިވިޝަންގެ ޗެމްޕިއަންކަން މުހައްމަދު ދުންޔާޒް އަދި އަންހެން ޑިވިޝަންގެ ޗެމްޕިއަންކަން އާމިނަތު ފާތީ ހޯދައިފި އެވެ.
ރޭ ކުރިއަށްދިޔަ ބިލިއާޑް ޗެމްޕިއަންޝިޕްގެ ފައިނަލުގައި ދިވެހި ސިފައިންގެ ކްލަބުން ލޮރެންޒޯ ސްޕޯޓްސް ކްލަބް ބަލިކުރީ 3-2 ގޭމުންނެވެ.
މީގެ އިތުރުން ފިރިހެން ސިންގަލްސް ފައިނަލުގައި ދުންޔާޒް ވާދަކުރީ ހުސެއިން ފަޔާޒްއާ އެވެ. ދުންޔާޒް ޗެމްޕިއަންކަން ހޯދީ ފައިނަލުގައި ފަޔާޒްގެ މައްޗަށް 11-7 އިން ކުރިހޯދައިގެންނެވެ.
މީގެ އިތުރުން އަންހެން ސިންގަލްސްގެ ޗެމްޕިއަންކަން ފާތީ ހޯދީ ފައިނަލުގައި ފަގީހާ އިބްރާހީމްގެ މައްޗަށް 7-5 އިން ކުރިހޯދައިގެންނެވެ.
މި ފަހަރުގެ މުބާރާތުގެ, ފިރިހެން ޑަބަލްސްގެ ޗެމްޕިއަންކަން ހޯދީ, މުހައްމަދު ޝަރީފް އާއި މުހައްމަދު ސަމީރްގެ ޕެއާ އެވެ. ފައިނަލުގައި މުހައްމަދު ސަމީރް އާއި މުހައްމަދު ޝަރީފްގެ ޕެއާ ނުކުތީ, އަބްދު الله އަފީފް އާއި އިސްމާއިލް ސުވައިދުގެ ޕެއާއާ ދެކޮޅަށެވެ. މި މެޗު ސަމީރް އާއި ޝަރީފްގެ ޕެއާ ކާމިޔާބުކުރީ 9-8 އިންނެވެ.
އަންހެން ޑަބަލްސް ފައިނަލުގައި އައިޝަތު އަލީ އާއި އާމިނަތު ފާތީގެ ޕެއާ ނުކުތީ ދީނާ އަހުމަދު އާއި އައިޝަތު ޔަޝްފާގެ ޕެއާއާ ދެކޮޅަށެވެ. މި މެޗު ދީނާ އާއި ޔަޝްފާގެ ޕެއާ އިން ކާމިޔާބުކުރީ 5-7 އިންނެވެ.
މިކްސް ޑަބަލްސް ޗެމްޕިއަންކަން ހަސަން ޝާޒް މުހައްމަދު އާއި އާމިނަތު އަޒްރާގެ ޕެއާ އިން ހޯދީ ފައިނަލުގައި ދީނާ އަހުމަދު އާއި މުހައްމަދު އަކްޝަމް ވަހީދުގެ ޕެއާ ބަލިކޮށްގެންނެެވެ. ފައިނަލް ޝާޒް އާއި އަޒްރާގެ ޕެއާ ކާމިޔާބުކުރީ 7-6 އިންނެވެ.
