މާދަމާ މާލޭގައި ފަށާ މޯލްޑިވްސް އޯޕަން، 10 ބޯލް ޕޫލް ބިލިއާޑް ޗެމްޕިއަންޝިޕްގައި އެންމެ ބޮޑު އަމާޒަަކަށް ހަދަންވީ މިދިޔަ އަހަރަށް ވުރެ ރަނގަޅު ކާމިޔާބެއް ހޯދުމަށް ކަަމަށް ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.
މިނިސްޓަރު ރާފިއު، މި ގޮތަށް ވިދާޅުވީ، މޯލްޑިވްސް އޯޕަންގައި ވާދަކުރާ ރާއްޖޭގެ 16 ކުޅުންތެރިންނާއި، އޮފިޝަލުންނަށް ޖާޒީ ހަވާލުކޮށްދެެއްވުމަށް ފަހު އެވެ.
އޭނާ ވިދާޅުވީ، މި މުބާރާތުގައި ވާދަކުރާ ދިވެހި ކުުޅުންތެރިންގެ އަޒުމަކަށް ވާންޖެހޭނީ މިދިޔަ އަހަރުގެ މުބާރާތައްވުރެއް ރަނގަޅު ކާމިޔާބެއް ހޯދުން ކަމަށާއި ސަރުކާރުގެ އެދުމަކީ މުބާރާތައް ކުޅުންތެރިންނަށް ދެވެން އޮތް ބޮޑު ސަމާލުކަމެެއް ދީގެން ރާއްޖެ ރަނގަޅު ނަތީޖާއެއް ހޯދައިދިނުން ކަމަށެވެ.
މާދަމާ އިން ފެށިގެން، އަންނަ އާދިއްތަ ދުވަހުގެ ނިޔަލަށް، ޕޫލް ބިލިއާޑް ސެންޓަރުގައި، ކުރިއަށްދާ މޯލްޑިވްސް އޯޕަންގައި ޖުމްލަ 96 ކުޅުންތެރިން ވާދަކުރާއިރު، އޭގެ ތެރޭގައި ދުނިޔޭގެ ފަސް ޗެމްޕިއަނުން ހިމެނޭ ކަމަށް މޯލްޑިވްސް ޕޫލް ބިލިއާޑް އެސޯސިއޭޝަނުން މައުލޫމާތު ދެ އެވެ.
ޕޫލް ބިލިއާޑް ކުޅުންތެރިންނާ ޖޯޒީ ހަވާލުކުރުމަށް ބޭއްވި ރަސްމިއްޔާތުގެ ތެރެއިން.--- ފޮޓޯ: ސްޕޯޓްސް މިނިސްޓްރީ
މޯލްޑިވްސް އޯޕަން 10 ބޯލް ޗެމްޕިއަންޝިޕް ލޯންޗްކުރަން ބޭއްވި އިވެންޓްގައި ވާހަކަ ދައްކަަވަމުން މިނިސްޓަރު ރާފިއު ވަނީ، އުންމީދަކީ ޕޫލް ބިލިއާޑް ހަބެއްގެ ގޮތުގައި ރާއްޖެ ތަރައްގީ ވުން ކަމަށާއި, މި ވަގުތު މަސައްކަތް ކުރަމުން އަންނަނީ އެކަން ހާސިލްކުރަން ކުރަން ޖެހޭ މަސައްކަތަށް ކަމަށް ވެސް ވިދާޅުވެފަ އެވެ.
މި ފަހަރުގެ މޯލްޑިވްސް އޯޕަން، މުބާރާތުގައި ވާދަކުރާ ދިވެހި ކުޅުންތެރިންނަކީ، އަހުސަން ހާޝިމް، އިސްމާއިލް ސުވައިދު، ހަސަން ޝާޒް މުހައްމަދު، މުހައްމަދު ސާހިލް ހަމީދު، މުހައްމަދު ޝަރީފް، މުހައްމަދު އަކްސަމް ވަހީދު، އިސްމާއިލް ޖީހާން، ހަަސަން ޝަފްރާޒް، ދުންޏާޒް މުހައްމަދު، ހިޝާމް މަޖީދު، އަހުމަދު ޝިވާޒް، ހުސެއިން ޝައްމާން، ފަތުހުﷲ ޖަމީލް، އަލީ ފަޔާޒް، އަހުމަދު ނަފީލް އަދި ހަސަން އުޝްވަތުﷲ އެވެ.
ޓީމުގެ މެނޭޖަރަކީ ހުސެއިން ސަނީފް އެވެ. އަދި ކޯޗަކީ ޝަޒީން އަބްދުލް ސަމަދު އެވެ.
ބައިނަލްއަގްވާމީ މައިދާނުގައި ދިވެހި ބިލިއާޑް ކުޅުންތެރިއަކު ނުހޯދާ ވަރުގެ ކުރިއެރުމެއް މިދިޔަ އަހަރުގެ މޯލްޑިވްސް އޯޕަންގައި ރާއްޖޭގެ ޝާޒް ހޯދި އެވެ. އެ ގޮތުން، މޯލްޑިވްސް އޯޕަންގެ ގްރޫޕް ސްޓޭޖް ފަހަނައަޅައި ނޮކްއައުޓް ބުރުން ޖާގަ ހޯދި ހަމައެކަނި ދިވެހި ކުޅުންތެރިއަކީ ޝާޒް އެވެ.
ޝާޒް ވެފައި ވަނީ ދުނިޔޭގެ ރޭންކިންގައި ގުނާލެވޭ މުބާރާތެއްގެ ނޮކްއައުޓް ބުރުން ޖާގަ ހޯދި ހަމައެކަނި ދިވެހި ކުޅުންތެރިޔާ އަށެވެ.
މިދިޔަ އަހަރު ރާއްޖޭގައި ބޭއްވި މި މުބާރާތުގެ ޗެމްޕިއަންކަން ހޯދީ ޗައިނީސް ތައިޕޭގެ ކޯ ޕީ ޗުން އެވެ. އޭނާ ފައިނަލަށް ދަތުރުކުރީ ދުނިޔޭގެ ރޭންކިންގެ ގަދަ 10 ގައި ހިމެނޭ ކުޅުންތެރިން ބަލިކުރުމަށްފަހުގަ އެވެ.
