ދ. ކުޑަހުވަދޫ އެއާޕޯޓު ސަރަހައްދުގައި އެ ރަށު ރައްޔިތުން ކުރަމުންދާ މުޒާހަރާތައް ނިމުމަކަށް ގެނައުމަށް މަންޓާ އެއާއިން އެ މީހުންނާ ބައްދަލުކޮށް މައްސަލަ ހައްލުކޮށްފި އެވެ.
މިދިޔަ ހޯމަ ދުވަހުން ފެށިގެން ކުޑަހުވަދޫގައި މުޒާހަރާ ކުރަން ފެށީ އެ ރަށު ބަލި މީހަކު މަންޓާ އެއާގެ މަތިންދާބޯޓެއްގައި މާލެ ނުގެނެސްގެނެވެ. މަންޓާއިން ބުނީ އެ ކުންފުނިން ގެންގުޅޭ ބޯޓުތަކުގައި ބަލިމީހުން ގެންދާ ސްޓްރެޗަރު އެރުވޭ ގޮތަށް ހަދާފައި ނުހުންނަ ކަމަށެވެ.
މަންޓާ އެއާގެ އޮފިޝަލަކު "އަދަދު" އަށް ވިދާޅުވީ ރޭ އެ ރަށަށް މަންޓާގެ ގްރޫޕެއް ގޮސް މުޒާހަރާ ކުރަމުންދިޔަ އެ ރަށު ރައްޔިތުންނާ މަޝްވަރާ ކޮށްފައިވާ ކަމަށެވެ.
"އަޅުގަނޑުމެން މި ބަލަނީ މިހާރު އެ ރަށު ރައްޔިތުން އެދެމުންދިޔަ ކަންކަމަށް ހައްލެއް ލިބިފަ ކަމަށް ވަނީ. އެއީ ރޭ ވަނީ އެ މުޒާހަރާ ވެސް ހުއްޓާލާ އެންމެން ގެއަށް ގޮސްފައި،" އޮފިޝަލް ވިދާޅުވި އެވެ.
އެ ރަށުން މުޒާހަރާ ކުރަމުންދިޔަ މީހުން ބޭނުންވީ މަންތާގެ މީހުންނާ ބައްދަލުކޮށް ބަލި މީހުން އުފުލޭނެ ގޮތް ހެދުމަށެވެ.
"އެ ރަށު މީހުން ކުރިން ވެސް އެދެމުން ދިޔައީ ބަލި މީހުން އުފުލުމުގައި ލުއިތަކެއް ހޯދަދޭން. އެކަމަށް ހައްލެއް ގެނައުމަށް މަޝްވަރާ ކުރެވުނީ،" އޭނާ ވިދާޅުވި އެވެ.
އޭނާ ވިދާޅުވީ ރޭގެ ބައްދަލުވުމުގައި ވަނީ އެ ރަށުގެ ރައްޔިތުންނަށް މަންޓާއިން ބަލި މީހުން އުފުލަން އުނދަގޫވާ ސަބަބު ކިޔައިދީ އެކަން އޮންނަ ގޮތް އޮޅުން ފިލުވައިދީފައި ކަމަށެވެ. މަންޓާއިން ވަނީ ބަލި މީހުން އުފުލުމަށް ކޮށްދެވެން އޮތް ކަންތައްތައް ކޮށްދޭނެ ކަމަށް އެއްބަސްވެފައި ކަމަށް ވެސް އޮފިޝަލް ވިދާޅުވި އެވެ.
