ރާއްޖޭގައި ޔޯގާ ދުވަސް ފާހަގަކުރުން ހުއްޓުވަން ހިނގި ހަމަނުޖެހުމުގައި ބައިވެރިވިކަމުގެ ތުހުމަތުކޮށް ހައްޔަރުކޮށްފައިވާ ބައެއް ފަރާތްތައް ދޫކޮށްލުމަށް ގޮވާލައި އިދިކޮޅު ޕީޕީއެމް އާއި ޕީއެންސީގެ ސަޕޯޓަރުން ރޭ ކުރިއަށް ގެންދިޔަ މުޒާހާރާ ޕެޕާ ސްޕްރޭ ޖެހުމަށްފަހު ފުލުހުން ރޫޅާލައިފި އެވެ.
ޕީޕީއެމްގެ މުޒާހަރާ ބާރުގެ ބޭނުންކޮށްގެން ފުލުހުން ރޫޅާލިއިރު، އެ އެއްވުން ރޫޅާލުމުގެ އޮޕަރޭޝަނާ ގުޅޭ ގޮތުން ފުލުހުން އަދި އެއްވެސް އެއްޗެއް ނުބުނެ އެވެ. އަދި އެ އެއްވުމުވެ ތެރެއިން ބަޔަކު ހައްޔަރުކުރިއިރު، ހައްޔަރުކުރި މީހުންގެ އަދަދެއް ވެސް ފުލުހުން އަދި ހާމަކޮށްފައެއް ނުވެ އެވެ.
ޕީޕީއެމްގެ ތަރުޖަމާނު ހީނާ ވަލީދު ވިދާޅުވި ގޮތުގައި ރޭގެ އެ އެއްވުމުގެ ތެރެއިން ތިން މީހަކު ހައްޔަރުކޮށްފައިވެ އެވެ. އެއީ ޕީއެންސީގެ ސެނެޓް މެންބަރު ހަލީމަތު ޒުހޭރާ އާއި ޕީޕީއެމްގެ ސެނެޓް މެންބަރު ޝަހީދު އިބްރާހިމް އަދި ޕީޕީއެމްގެ ސެނެޓް މެންބަރު މުހައްމަދު އައްބާސް އެވެ.
ފުލުހުން މުޒާހަރާ ރޫޅާލިއިރުގެ މަންޒަރުތައް ހިމެނޭ އެކި ވީޑިއޯތައް ވެސް ސޯޝަލް މީޑިއާގައި ދައުރުވަމުން އެބަ ދެ އެވެ. އެއިން ބައެއް ވީޑިއޯތަކުން، ފުލުހުން ސީދާ މުޒާހަރާގެ ބައިވެރިންނާ ދިމާއަށް އަދި ބައެއް ބައިވެރިންގެ މޫނުމައްޗަށް ވެސް ޕެޕަ ސްޕްރޭ ޖަހާ މަންޒަރު ފެނެ އެވެ.
