މާލޭގައި ހުންނަ އަތޮޅު ފިހާރަތަކުގެ ކުލި, އެ އަތޮޅެއްގެ ކައުންސިލްގެ ބަޖެޓަށް ޖަމާކޮށްދޭނެ ކަމަށް ބުނިތާ ދެ މަސް ފާއިތުވެގެން ދިޔައިރު ވެސް، އެކަން ކޮށްދީފައި ނުވާތީ ބައެއް އަތޮޅު ކައުންސިލްތަކުން ކަންބޮޑުވުން ފާޅުކޮށްފި އެވެ.
އަތޮޅު ފިހާރަތަކީ، އަތޮޅުތަކުގެ ރައްޔިތުން ވަރަށް ބުރަ މަސައްކަތުން ގާއިމުކޮށްފައިވާ އިންވެސްޓްމަންޓު ތަކެކެވެ. އެ ފިހާރަތައް ފިނޭންސް މިނިސްޓްރީގެ ދަށަށް ބަދަލުކުރެވި އަތޮޅު ކައުންސިލުތަކަށް ލިބެމުންދަނީ އެ ތަންތަނުން ލިބޭ އާމްދަނީގެ ދެ ބައި ކުޅަ އެއްބަ އެވެ.
އަތޮޅު ފިހާރަތަކުގެ ކުލި، އަތޮޅު ކައުންސިލްތަކަށް އެއްކޮށް ޖަމާކޮށްދެއްވާނެ ކަން ރައީސް އިއުލާނުކުރެއްވީ މިދިޔަ މެއި މަހު އުކުޅަހުގައި ކުރިއަށް ދިޔަ ވިއަވަތި ކޮންފަރެންސްގަ އެވެ. އެ ކޮންފަރެންސްގައި ފިނޭންސް މިނިސްޓަރު އަމީރު ވަނީ ހަފްތާއެއް ތެރޭގައި އެ ފައިސާ ޖަމާކުރުމުގެ މަސައްކަތް ފަށާނެ ކަމަށް ވިދާޅުވެފަ އެވެ.
"ކައުންސިލްތަކަށް ލިބޭ އާމްދަނީއަކުން ދެކޮޅެއް ނުޖެހޭ، އަތޮޅު ކައުންސިލެއް ވިމާ ރަށްރަށުގެ ކައުންސިލަށް އެހީތެރިކަން މާލީ ގޮތުން ވެސް އަދި ފަންނީ ގޮތުން ވެސް ފޯރުކޮށްދިނުމަކީ އަޅުގަނޑުމެންގެ ގާނޫނީ ޒިންމާއެއް، އެކަމަކު އަޅުގަނޑުމެންނަށް ވެސް ނެތް އެއްޗަކުން އެހީތެރިކަމެއް ފޯރުކޮށް ނުދެވޭ، އެކަމަކު ކައުންސިލްތަކަށް އެހީތެރިކަން ފޯރުކޮށްދޭން ޖެހޭ ހާލަތުގައި،" ފައިސާ ލިބުން ލަސްވުމުގެ ކަންބޮޑުވުން ފާޅުކޮށް ވ. އަތޮޅު ކައުންސިލްގެ ރައީސް އަލީ މި ނޫހަށް ވިދާޅުވި އެވެ.
ޝުޖާއު ވިދާޅުވި ގޮތުގައި ވިއަވަތި ކޮންފަރެސްންގައި އަތޮޅު ކައުންސިލްތަކުގެ އެންމެ ކަންބޮޑުވުމަކަށް އޮތީ ކައުންސިލްތައް ހިންގުން ދެކޮޅު ނުޖެހޭ މައްސަލަ ކަމަށާއި އެ ކަން ހައްލު ކުރުމުގެ ގޮތުން އަތޮޅު ފިހާރަތަކުގެ ކުލި ޖުމްލަކޮށް ކައުންސިލްތަކަށް ހުށަހެޅީ ހުރިހާ ކައުންސިލަކުން ވެސް އެކަމަށް އެއްބަސްވެވިގެން ކަމަށެވެ.
"އަތޮޅު ފިހާރަތަކަކީ އަތޮޅު ތަކުގެ ރައްޔިތުން އަޅާފައި ހުރި ތަންތަން އެއީ، އެހެންވީމާ އެ ތަންތަނުގެ ކުލި ޖުމްލަކޮށް ކައުންސިލްތަކަށް ލިބޭނެ ގޮތް އޮތުމަކީ ވަރަށް ފަސޭހައިން ކައުންސިލްތަކުގެ މާލީ މައްސަލަތަކަށް ހައްލެއް ހޯދައިދިނުމަށް ލިބޭނެ ފުރުސަތެއް ގޮތަށް އަޅުގަނޑުމެން އެ ވާހަކަ ދެއްކީ،" ޝުޖާއު ވިދާޅުވި އެވެ.
ވ. އަތޮޅު ފަދަ ކުދި އާބާދީ ހިމެނޭ އަތޮޅުތަކުގައި ލިބޭ އާމްދަނީން ދެކޮޅު ނުޖެހޭ މައްސަލަ އިންތިހާއަށް އިތުރުކަން ވެސް ޝުޖާއު ފާހަގަކުރެއްވި އެވެ.
"ކައުންސިލްތަކަށް ލިބޭ ހިލޭ އެހީން ފެށުނުއިރު ވެސް ދެކޮޅެއް ނުޖެހޭ، ގިނަ ކައުންސިލްތައް ހުރީ އޮކްޓޯބަރު ނޮވެންބަރު ހިސާބަށް ދާއިރު ކައުންސިލަރުންގެ މުސާރަ ވެސް، ހިލޭ އެހީން ބަހާ އުސޫލުން ބެހީމާ ދެކޮޅު ނުޖެހޭ،" އޭނާ ވިދާޅުވި އެވެ.
އޭނާ އިތުރަށް ވިދާޅުވި ގޮތުގައި ރަށު ކައުންސިލްތަކަށް ބޭނުންވާ އެހީތެރިކަން އަތޮޅު ކައުންސިލްތަކަށް ފޯރުކޮށް ދެވެން އޮތީ އަތޮޅު ފިހާރަތަކުން ލިބެންވާ ކުލި ލިބިގެން ކަމަށެވެ.
ވ. އަތޮޅު ފިހާރަ-- ފޮޓޯ: އަބްދުﷲ އިޔާން/ އަދަދު
ކުލި ލަސްވުމުގެ ކަންބޮޑުވުން އިތުރު ބައެއް އަތޮޅު ކައުންސިލްތަކުން ވެސް ވަނީ ފާޅުކޮށްފަ އެވެ.
އެ ފިހާރަތަކަށް އަހަރަކު ގާތްގަނޑަކަށް 20 މިލިއަން ރުފިޔާގެ އާމްދަނީއެއް ލިބޭއިރު, އެތަންތަން އެކީގައި ކައުންސިލުތަކަށް ދޫކޮށްލައިފި ނަމަ، ކައުންސިލުތަކަށް ފައިސާ ނުލިބުމުގެ މައްސަލައަށް ވަރަށް ބޮޑު ލުޔެއް ލިބިގެންދާނެ ކަމަށް ކައުންސިލަރުން ވިދާޅުވެ އެވެ.
ހަފްތާއެއް ތެރޭގައި ޖަމާކޮށްދޭން ބުނި ކުލިތައް މިހާތަނަށް ވެސް އަތޮޅު ކައުންސިލްތަކަށް ޖަމާކޮށްދީފައިނުވާއިރު، ކުލި ޖަމާކޮށްދިނުން ލަސްވަނީ ކީއްވެކަން ހޯދުމަށް ފިނޭންސް މިނިސްޓްރީއަށް ތަކުރާރުކޮށް ގުޅުމުން ވެސް ވަނީ އެނގޭ ގޮތް ނުވެފަ އެވެ.
އަތޮޅު ރައްޔިތުން އިސްވެ، ބާޒާރު މަތީގައި އަތޮޅު ފިހާރަތައް ގާއިމުކުރީ 1960 ވަނަ އަހަރުގެ ތެރޭގައި ކަން ތާރީހީ ބައެއް ލިޔުންތަކުން ފެނެ އެވެ. ނަމަވެސް، އޭގެ ފަހުން އެ ފިހާރަތަކުގެ މިލްކުވެރިކަން ސަރުކާރުގެ ދަށަށް ގެނެސްފައިވާއިރު، އެތަންތަނުން ލިބޭ އާމްދަނީގެ ހިއްސާއެއް ކައުންސިލުތަކަށް ގަވައިދުން ދީފައެއް ނުވެ އެވެ.
ލާމަރުކަޒީ ގާނޫނަށް މި ސަރުކާރުން ގެނައި ބޮޑެތި ބަދަލުތަކާ އެކު އަތޮޅު ފިހާރަތަކުން ލިބޭ އާމްދަނީގެ 50 ޕަސަންޓް ކައުންސިލުތަކަށް ޖަމާކޮށްދޭން ފެށި އެވެ.
ރައީސް ސޯލިހުގެ ރިޔާސީ ވައުދާ އެއްގޮތަށް ކައުންސިލުތަކަށް މާލީ ގޮތުން ބޮޑެތި ބާރު ތަކެއް ދީފައިވާއިރު، އޭގެ ތެރޭގައި ދައުލަތުގެ އާމްދަނީގެ ފަސް ޕަސަންޓް ކައުންސިލްތަކަށް ހާއްސަ ކުރުމުގެ އިތުރުން، ބިމާއި ރަށާއި ފަޅާއި ފަރު ފަދަ ތަންތަނުން ލިބޭ ކުލީގެ އާމްދަނީގެ 40 ޕަސެންޓު ކައުންސިލުތަކުން ދޫކޮށްލުން ހިމެނެ އެވެ.
އަދި، މީހުން ދިރިއުޅޭ ރަށްރަށުގެ އިހްތިސާސްގައިވާ ބިމުގެ ކުލީގެ އިތުރުން، ކައުންސިލްތަކުން ނަގާ ފީގެ އާމްދަނީ އެއްކޮށް ކައުންސިލްތަކަށް މިހާރު ވަނީ ދޫކޮށްލައިފަ އެވެ. އޭގެ އިތުރުން ކުންފުންޏާއި ކޯޕަރޭޓިވްސް އުފައްދައިގެން ވިޔަފާރި ކުރުމާއި އާމްދަނީ ހޯދުމުގެ މަގުވެސް ކައުންސިލްތަކަށް މިހާރު ގާނޫނުގެ ތެރެއިން އޮތީ ފަހިކޮށްދީފަ އެވެ.
