ސައްހަ ލިޔެކިއުން ނެތުން ފަދަ ސަބަބުތަކާ ހެދި އިމިގްރޭޝަނުން ބަންދުކޮށްގެން ބަލަހައްޓާ ބިދޭސީންގެ ކެއިން ބުއިމާއި ބޭސްފަރުވާ އަދި އެމީހުން ރާއްޖޭން ފޮނުވައިލުން ފަދަ ކަންތައްތަކަށް މިދިޔަ ހަ އަހަރު ދުވަހު އެވްރެޖުކޮށް އަހަރަކު އެއް މިލިޔަން ރުފިޔާ ދައުލަތުން ހަރަދުވެފައިވާ ކަމަށް ތަފާާސް ހިސާބުތަކުން ދައްކައިފި އެވެ.
އިމިގްރޭޝަނުން "އަދަދު"އާ ހިއްސާކުރިި ހިސާބުތަކުގައިވާ ގޮތުން ބަންދުގައި މިހާރު ތިބި ބިދޭސީންނަށް މިއަހަރުގެ މިހައިތަނަށް 453،000 ( ހަތަރު ލައްކަ ފަންސާސް ތިން ހާސް) އަށް ވުރެ ގިނަ ރުފިޔާ ވަނީ ހަރަދުވެފަ އެވެ. އެ ހިސާބުތަކުން ދައްކާ ގޮތުގައި ބަންދުގައި ތިބި ބިދޭސީންގެ ކެއިން ބުއިމަށް އެކަނި މިއަހަރު 342،743.75.ރ ( ތިން ލައްކަ ސާޅީސް ދެހާސް ހަތް ސަތޭކަ ސާޅީސް ތިން ރުފިޔާ ހަތް ދިހަ ފަސް ލާރި) ހަރަދުވި އެވެ. އެމީހުންގެ ބޭސްފަރުވާ އާއި އެހެނިހެން އަސާސީ ކަންކަމަށް ހަރަދުވީ 75،187.77.ރ އެވެ. މީހުން އަނބުރާ ގައުމަށް ފޮނުވައިލަން ހަރަދުވީ 35,960.70.ރ އެވެ.
އިމިގްރޭޝަނުން ދިން ހިސާބުތަކުގައިވާ ގޮތުން މިދިޔަ ހަ އަހަރު ދުވަހުގެ ތެރޭގައި ބިދޭސީން ބަންދުގައި ބައިތިއްބަން އެންމެ ގިނަ ފައިސާ ހަރަދުވީ 2017 ވަނަ އަހަރު އެވެ. އެ އަހަރު ޖުމްލަ 2.2 މިލިޔަން ރުފިޔާ ހަރަދުވި އެވެ. އެއީ ކެއިން ބުއިމަށް ހަރަދުވި 2.08 މިލިޔަން ރުފިޔާ އާއި ބޭސްފަރުވާއަށް ހަރަދުވި 113،048.77.ރ އެވެ.
މިދިޔަ ފަސް އަހަރުގެ ތެރޭގައި ބަންދުގައި ތިބޭ ބިދޭސީންނަށް އެންމެ މަދުން ފައިސާ ހަރަދުކޮށްފައި އޮތީ 2018 ވަނަ އަހަރު އެވެ. އެ އަހަރު ހަރަދުވީ ޖުމްލަ 937,465.76.ރ ( ނުވަ ލައްކަ ތިރީސް ހަތްހާސް ހަތަރު ސަތޭކަ ފަސްދޮޅަސް ފަސް ރުފިޔާ ހަތް ދިހަ ހަލާރި) އެވެ.
