ރާއްޖޭގެ ސްކޫލްތަކުގައި ކިޔަވައިދިނުމަށް އެންމެ ގިނައިން ބިދޭސީ ޓީޗަރުން ގެންނަނީ އިނގިރޭސި މާއްދާ ކިޔަވައިދޭން ކަމަށް އެޑިޔުކޭޝަން މިނިސްޓްރީން ބުނެފި އެވެ.
ރާއްޖޭގެ ސްކޫލުތަކަށް ކިޔަވައިދޭން ބިދޭސީ ޓީޗަރުން ގެންނަ މައްސަލަ މިދިޔަ އަހަރުވެސް ވަނީ ބޮޑުވެފަ އެވެ. ނަމަވެސް، މިނިސްޓްރީން ބުނެފައި ވަނީ ހާއްސަކޮށް ރަށްރަށުގައި ކިޔަވައިދޭން ދިވެހި ޓީޗަރުން ނުލިބޭ ކަމަށެވެ.
ދިވެހި ޓީޗަރުން ހޯދުމަށް އިއުލާންކޮށް ނުލިބޭތީ އުފަން ރަށް ނޫން އެހެން ރަށްރަށަށްދާ ދިވެހި ޓީޗަރުންނަށް 3000ރ. އެލަވެންސެއް ވެސް ހަމަޖެއްސި އެވެ. ނަމަވެސް، ދިވެހިން ނުލިބޭ ކަމަށް މިނިސްޓްރީން ބުނެ އެވެ.
ރާއްޖޭގައި ތިބި ބިދޭސީ ޓީޗަރުންނާ ގުޅޭގޮތުން އެޑިޔުކޭޝަން މިނިސްޓްރީން "އަދަދު"އަށް ފޯރުކޮށްދީފައިވާ މައުލޫމާތަށް ބަލާއިރު، އެންމެ ގިނަ މީހުން ގެންނަނީ އިނގިރޭސި މާއްދާ ކިޔަވައިދޭށެވެ. ދެވަނައަށް އެންމެ ގިނައީ ހިސާބު ކިޔަވައިދޭން ގެންނަ ޓީޗަރުންނެވެ.
titledesc
އޮގަސްޓުގައި ފެށޭ އާ އަހަރަށް ބޭނުންވާ ޓީޗަރުން މިހާރު އަންނަން ފަށާފައި ވާއިރު ރާއްޖޭގައި 1710 ބިދޭސީ ޓީޗަރުން މަސައްކަތް ކުރާ ކަމަށް މިނިސްޓްރީ ބުނެ އެވެ.
އެއީ 1674 އިންޑިއާ ޓީޗަރުންނާއި ސްރީލަންކާ 31 ޓީޗަރުންނާއި އިޖިޕްޓް 3 ޓީޗަރުންނާއި ޖޯޑްންގެ ޓީޗަރަކާއި ޕާކިސްތާނުގެ ޓީޗަރެކެވެ.
