ސްރީ ލަންކާގެ ރައީސް ގޮތަބަަޔާ ރާޖަޕަކްސަ ރޭ ދަންވަރުގެ ވަގުތެއްގައި އެ ގައުމުން ފިއްލަވައި، ދިވެހިރާއްޖެއަށް ވަޑައިގެންފައިވާތީ, އެ ގައުމުގައި މުޒާހަރާ ކުރަން ފަށައިފި އެވެ.
ރައީސް ގޮތަބަޔާ ރާއްޖެ ވަޑައިގެންފައި މި ވަނީ މިއަދުގެ ވަގުތެއްގައި އިސްތިއުފާ ދެއްވާނެ ކަމަށް މީގެ ތިން ދުވަސް ކުރިން އެމަނިކުފާނު އިއުލާން ކުރައްވާފައި އޮއްވަ އެވެ. ނަމަވެސް, އޭނާ މިއަދު އިސްތިއުފާ ދެއްވާނެ ކަމާމެދު މިހާރު ވަނީ ސުވާލު އުފެދިފަ އެވެ.
ލަންކާގެ ރިޔާސީ ގަނޑުވަރު ކައިރީގައި މުޒާހަރާ ފަށާފައިވާއިރު, މުޒާހަރާގެ ބައިވެރިން ގެންދަނީ ގޮތަބަޔާ ރާއްޖޭން ހިމާޔަތް ދިނުމުން އެކަމާ ދެކޮޅަށް ނުރުހުން ފާޅުކުރަމުންނެވެ. އަދި, ގޮތަބަޔާ ވީއެންމެ އަވަހަކަށް ރާއްޖެ އަނބުރާ ފޮނުވާލުމަށް ވެސް މުޒާހަރާގައި ދަނީ ގޮވަމުންނެވެ.
ރާއްޖެއާމެދު މުޒާހަރާގެ ބައިވެރިން ނުރުހުމުގެ ބަސްތައް އަމާޒުކުރަމުންދާއިރު ގޮތަބަޔާ ރާއްޖެ އެތެރެވުމަށް އެންމެ ބޮޑު އެހީތެރިކަމެއް ފޯރުކޮށްދެއްވާފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. އެނގިފައިވާ ގޮތުގައި, ގޮތަބަޔާ ރާއްޖެ ވަޑައިގެންނެވީ, ލަންކާގެ ބޮޑުވަޒީރު ރަނިލް މެދުވެރިކޮށް ރާއްޖެ އެތެރެވެވޭނެކަން ނަޝީދުގެ ފަރާތުން ޔަގީންކުރެއްވުމަށްފަހު އެވެ.
ގޮތަބަޔާއަށް މަރުހަބާ ދެންނެވުމަށް ނަޝީދު އެއާޕޯޓަށް ވެސް ވަޑައިގެންނެވި އެވެ. މިކަމުގައި އެމަނިކުފާނަށް އެތައް ފާޑުކިޔުމެއް އަމާޒުވެފައިވާއިރު މިހާތަނަށް އެއްޗެއް ވިދާޅެއް ނުވެ އެވެ. ނަމަވެސް, މަޖިލީހުން ބުނީ އެކަމަކީ އެ އިދާރާއަށް އެނގިގެން ހިނގި ކަމެއް ނޫން ކަމަށެވެ.
މައުލޫމާތު ލިބޭ ގޮތުގައި, ގޮތަބަޔާ މިހާރު ހުންނެވީ ހުޅުލެ އައިލެންޑް ހޮޓެލްގަ އެވެ. މިއަދުގެ ވަގުތެއްގައި ދުބާއީ ނުވަތަ ސިންގަޕޫރަށް ގޮތަބަޔާ ވަޑައިގަންނަވަން ތައްޔާރުވަމުންދާ ކަމަށް ވެސް މައުލޫމާތު ލިބެ އެވެ.
ގޮތަބަޔާއަށް ރާއްޖެ ވަޑައިގެންނެވުނީ އިމިގްރޭޝަންގެ އޮފިޝަލުން އެކަމާ ދެކޮޅު ހެދުމުން، ފުރަން މަސައްކަތް ކުރާތާ 24 ގަޑިއިރު ވެއެތުވި ފަހުން ކަމަށް އޭއެފްޕީން ބުނެ އެވެ. ގޮތަބަޔާއާއެކު އޭނާގެ އަނބިމީހާ އާއި ބޮޑީގާޑާއެކު ޖުމްލަ ހަތަރު މީހަކު ވަޑައިގެންނެވި ކަމަށްވެ އެވެ.
ގޮތަބަޔާ ރާއްޖެ ވަޑައިގެންނެވުމުގެ ކުރިން ފުރަތަމަ އުޅުއްވީ އަވައްޓެރި އިންޑިއާއަށް ވަޑައިގަންނަވަން ކަމަށް އޭއެފްޕީން ބުނެ އެވެ. ރާއްޖެ ވަޑައިގެންނެވީ މިލިޓަރީ ބޯޓެއް އިންޑިއާގައި ޖެއްސުމުގެ ހުއްދަ ވަގުތުން ނުލިބުމުން ކަމަށްވެ އެވެ.
ގޮތަބަޔާ އެންމެ ފުރަތަމަ ވަޑައިގަންނަވަން ބޭނުންވެވަޑައިގެންނެވީ ޑުބާއީއަށް ކަމަށްވެ އެވެ. ނަމަވެސް ވީއައިޕީން ފުރަން ހުއްދަ ނުދީ، އާންމުންނާއެކު ވަޑައިގަންނަވަންޖެހޭނެކަން އެނގިވަޑައިގަތުމުން މަޑުކުރެއްވީ ކަމަށްވެ އެވެ. އެގޮތަށް މަޑުކުރެއްވުމުގެ ސަބަބުން ޑުބާއީއަށް ފުރި ހަތަރު ފްލައިޓު އެމަނިކުފާނަށް ނޭރުނު ކަމަށްވެ އެވެ.
މިދިޔަ ހޮނިހިރު ދުވަހު ސްރީ ލަންކާގެ އާންމުންގެ ވަރަށް ގިނަ ބަޔަކު އެއްވެ ގޮތަބަޔާގެ ގެކޮޅަށް ހިސޯރު ކުރުމުގެ ކުޑައިރުކޮޅެއް ކުރިން އޭނާ ވަނީ އާއިލާއާއެކު ފިއްލަވާފަ އެވެ.
