ނަސާރާ ދީނުގެ މީހުން ފާހަގަކުރާ އީސްޓާ ސަންޑޭއާ ދިމާކޮށް ސްރީލަންކާގައި 2019 ވަނަ އަހަރު ދިން ޓެރަރިސްޓް ހަމަލާތަކުގެ ތަހުގީގާ ގުޅިގެން، ކުރީގެ ރައީސް ގޮޓާބަޔާ ރާޖަޕަކްސަ އާއި އަސްކަރީ ދެ އޮފިސަރަކު ގައުމުން ފުރުން މަނާކޮށްފި އެވެ.
މިއަދު އެ އަމުރު ނެރުނީ ކޮލަމްބޯ ފޯޓް މެޖިސްޓްރޭޓް ކޯޓުންނެވެ. އެ ކޯޓުގެ މެޖިސްޓްރޭޓް ޕަސަން އަމަރަސޭނާ ވަނީ، ފުރުން މަނާކުރުމުގެ އަމުރު ވަގުތުން ތަންފީޒު ކުރުމަށްޓަކައި ކޮންޓްރޯލާ އޮފް އިމިގްރޭޝަން އެންޑް އެމިގްރޭޝަނަށް ފޮނުވުމަށް ކޯޓުގެ ރެޖިސްޓްރާ އަށް އަންގަވާފަ އެވެ.
އީސްޓާ ބޮމުގެ ހަމަލާގެ ތަހުގީގުގެ ފަސް މަންޒަރު
އެންތަނީސް ޗާޗު ގޮއްވާލުމުން ކުޑަކުދިންނާއި އަންހެނުން ހިމެނޭ ގޮތަށް 115 މީހަކު މަރުވި. އަދި އެ ހަމަލާއަށްފަހު، ވިދިވިދިގެން ނެގަމްބޯ އާއި ބަޓިކުއޯލާ ގެ ދެ ފައްޅިއެއް އަދި ކޮޅުނބުގެ ތިން ހޮޓަލެއް ގޮއްވާލައި 259 މީހުން މަރާލައި 500 އަށް ވުރެ ގިނަ މީހުން ޒަހަމްކޮށްލި.
މި އަމުރުތައް ނެރެފައިވަނީ ދައުލަތުގެ ޖާސޫސީ އިދާރާ، ސްޓޭޓް އިންޓެލިޖެންސް ސާވިސްގެ ކުރީގެ ޑިރެކްޓަރު، ރިޓަޔާޑް މޭޖާ ޖެނެރަލް ސުރޭޝް ސައްލޭގެ މައްޗަށް ތުހުމަތުކުރެވޭ މައްސަލަ ކޯޓުގައި ކުރިއަށް ދަނިކޮށެވެ.
ސުރޭޝް ސައްލޭގެ މައްސަލަ ބަލަން ފެށީ ހަމަލާ ރާވަމުންދާކަމުގެ މައުލޫމާތު ޖާސޫސީ އިދާރާއަށް ލިބުނު ނަމަވެސް، އެކަށީގެންވާ ފިޔަވަޅު އަޅާފައި ނުވާ ކަމަށް ކުރެވޭ ތުހުމަތުތަކާ ގުޅިގެންނެވެ. މިދިޔަ ފެބްރުއަރީ މަހު މައްސަލައިގެ ތަހުގީގަށް އޭނާ ހައްޔަރު ކުރި އެވެ.
ޖާސޫސީ ވެރިޔާއަށް ތުހުމަތު ކުރެވޭތީ ލަންކާ އީސްޓާ ހަމަލާގެ އާ ތަހުގީގެއް
ލަންކާގެ ރައީސް އޮފީހުން ބުނީ ހުރިހާ ތުހުމަތުތަކެއް ބަލައި، ތަހުގީގުގެ ހޯދުންތައް މަޖިލީހަށް ހުށަހެޅުމަށް ފަހު އަޅާނެ ފިޔަވަޅުތައް ނިންމާނެ ކަމަށެވެ.
ސްރީލަންކާގެ ތިން ޑިސްޓްރިކްޓެއްގެ ޗާޗުތަކާއި ހޮޓާތަކަށް އަމާޒުކޮށް 2019 ވަނަ އަހަރު ދިން ބޮމުގެ ހަމަލާތަކުގައި 269 މީހުން މަރުވި އެވެ. އެ ހަމަލާދިން އިރު، ލަންކާގެ ރައީސްއަކީ މައިތްރިޕާލާ ސިރިސޭނާ އެވެ. ގޮޓާބަޔާ ވެރިކަމަށް ވަޑައިގެންނެވީ އެ އަހަރުގެ ނޮވެމްބަރު މަހު އެވެ.
ގޮޓާބަޔާގެ ވެރިކަމުގައި ލަންކާގެ އިގުތިސާދު ވަރަށް ބޮޑަށް ގޯސްވެފައި އޮތް ދަނޑިވަޅެއްގައި މުޒާހަރާތައް ހޫނުވެ، 2022 ވަނަ އަހަރު ގައުމުން ފިއްލެވި އެވެ. ނަމަވެސް ވެރިކަން ވެއްޓުނު ފަހުން ހަމަ އެ އަހަރު ގައުމަށް އެނބުރި ވަޑައިގެންނެވި ކަމަށް ރިޕޯޓުތައް ބުނެ އެވެ.
