ބަދުއަހުލާގީ ވީޑިއޯއެއް އާންމުވި މައްސަލައިގައި އެއިން ފެންނަ ކަމަށް ބެލެވޭ ފުލުސް މީހަކު އޭނާގެ ވަޒީފާއިން އެކަހެރިކޮށް އޭނާގެ މައްޗަށް ޖިނާއީ ތަހުގީގެއް ހިންގަން ފަށައިފި އެވެ.
ސޯޝަލް މީޑިއާގައި ލީކުކޮށްލާފައިވާ އެ ވީޑިއޯގައި ފެންނަނީ މީގެ ކުރިން ވެސް އެފަދަ ބައެއް ވީޑިއޯތަކުން ފެނުނު ބަންގްލަދޭޝް މީހާ އާއި އެހެން ފިރިހެނެކެވެ. ފުލުހުން ބުނީ އޭގައި އުޅޭ ކަމަށް ބެލެވޭ ފުލުސް މީހާގެ ޖިނާއީ ތަހުގީގެއް ހިންގުމުގެ އިތުރުން އަހުލާގީ މައްސަލައެއްގެ ގޮތުގައި ވެސް އެކަން ބަލަމުންދާ ކަމަށެވެ.
"މި މައްސަލާގެ ޖިނާއީ ތަހުގީގުގެ އިތުރުން އަހުލާގީ މައްސަލަ ޕްރޮފެޝަނަލް ސްޓޭންޑާޑް ކޮމާންޑުން ބަލަމުންދާއިރު ތުހުމަތު ކުރެވޭ ޕޮލިސް އޮފިސަރު ހުރީ މުސާރަ ނުލިބޭގޮތަށް ސަސްޕެންޑް ކޮށްފައި،" ނޫސްވެރިން ހިމެނޭ ވަޓްސްއަޕް ގްރޫޕެއްގައި ފުލުހުންގެ މީޑިއާ އޮފިޝަލަކު ބުންޏެވެ.
އެ މައްސަލަ ރިޕޯޓް ކުރިއިރު ބައެއް ނޫސްތަކުން ބުނެފައި ވަނީ ވީޑިޯގައި ފެންނަ ކަމަށް ބެލެވެނީ ޑްރަގް އެންފޯސްމަންޓް ޑިޕާޓްމެންޓް (ޑީއީޑީ) މަސައްކަތް ކުރާ ފުލުހެއް ކަމަށެވެ.
އެއީ މިގޮތަށް ސޯޝަލް މީޑިއާގައި ދައުރުވި ތިންވަނަ ވީޑިއޯ އެވެ. މީގެ ގާނޫނީ ވަކީލު ނާޒިމް ސައްތާރާއި ތައިލެންޑްގެ ސަފީރު ކަން ވެސް ކުރިން ކުރައްވާފައިވާ އަދި ޑީއާރުޕީގެ ލީޑަރުގެ މަގާމު ވެސް ފުރުއްވާފައިވާ މުހައްމަދު ނަޝީދު (ކާނަލް ނަޝީދު) ކަމަށް ބެލެވޭ މީހެއްގެ ވީޑިއޯއެއް ވެސް ވަނީ އާންމުކޮށްފަ އެވެ.
އެ ވީޑިއޯތަކުގައި ފެންނަނީ ނާޒިމް ނޫން ކަމަށް އޭނާ ބުނެފައިވާއިރު ކާނަލް ނަޝީދު ބުނެފައި ވަނީ ވީޑިއޯއިން ފެންނަނީ އޭނާ ކަމަށާއި ނަމަވެސް އެއްވެސް ބަދުއަހުލާގީ އަމަލެއް އޭނާ ހިންގާފައިނުވާނެ ކަމަށެވެ.
ވީޑިއޯގެ މައްސަލައިގައި ނާޒިމް އާއި ކާނަލް ނަޝީދާއި ބަންގްލަދޭޝްގެ މީހާ ފުރުން މަނާކޮށް އެންމެންގެ ޕާސްޕޯޓް ވެސް ވަނީ ހިފަހައްޓައިފި އެވެ. އަދި އެ އެންމެން ފުރުން މަނާ ކުރުމުގެ އަމުރުތަކެއް ކްރިމިނަލް ކޯޓުން ވަނީ ނެރެފަ އެވެ.
