ވަޒީފާ ނެތް މީހުންނަށް ހާއްސަ އިންޝުއަރެންސް ސްކީމަކާއި ވަޒީފާގެ ހިދުމަތުގެ ސްކީމެއް ރާއްޖޭގައި ތައާރަފް ކުރުމަށް ދިވެހި ސަރުކާރާ އެކު ވޯލްޑް ބޭންކުން ސޮއިކޮށްފި އެވެ.
މިއީ ވޯލްޑް ބޭންކުން ކުރިއަށްގެންދާ "ސަސްޓެއިނަބަލް އެންޑް އިންޓެގްރޭޓެޑް ލޭބާ ސާވިސަސް" ނުވަތަ "ސެއިލްސް" ޕްރޮޖެކްޓުގެ ދަށުން ކުރިއަށްގެންދަން ނިންމާފައިވާ މަޝްރޫއެކެވެ.
ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ފިނޭންސް މިނިސްޓަރު އިބްރާހިމް އަމީރު އެވެ. އަދި، ވޯލްޑް ބޭންކުގެ ފަރާތުން ސޮއިކުރެއްވީ އެ ބޭންކުން ދިވެހިރާއްޖެ އާއި ސްރީ ލަންކާ އަދި ނޭޕާލް އަށް ކަނޑައަޅާފައި ހުންނަވާ ކަންޓްރީ ޑިރެކްޓަރު ފާރިސް އެޗް ހަދާދު-ޒާވޮސް އެވެ.
މި މަޝްރޫއަށް ހަރަދުކުރާ ފައިސާ ވާލްޑް ބޭންކުން ހަމަޖެއްސީ ތަރައްގީވަމުން އަންނަ ގައުމުތަކަށް ލުއި ގޮތްތަކެއްގެ މަތިން އެހީތެރިކަން ފޯރުކޮށްދިނުމަށް ހާއްސަ އެ ބޭންކުގެ ގޮފި ކަމަށްވާ އިންޓަނޭޝަނަލް ޑިވެލޮޕްމަންޓް އެސޯސިއޭޝަން (އައިޑީއޭ) އިންނެވެ.
ސެއިލްސް މަޝްރޫއުގެ ދަށުން ކުރާނެ އަނެއް މަސައްކަތަކީ އިކޮނޮމިކް މިނިސްޓްރީގެ ޖޮބް ސެންޓަރުތައް ފުޅާކުރުމެވެ. އެގޮތުން، ފަސް ސަރަހައްދީ ހަބް ގާއިމުކޮށް، ކައުންސެލިން އާއި ވަޒީފާ ހޯދުމުގައި އެހީތެރިވެދިނުމުގެ އިތުރުން ތަމްރީނުތަކާއި ކޯޗިން ދީގެން ވަޒީފާ ހޯދަން އެހީ ދޭން ވާލްޑް ބޭންކުގެ އެހީ ބޭނުންކުރާނެ އެވެ.
ވާލްޑް ބޭންކުގެ ދިވެހި މަސައްކަތެރިންނަށް އަމާޒުކޮށް އެހީ ދޭން ނިންމި ސަބަބުތަކުގެ ތެރޭގައި ވަޒީފާ ނެތް ޒުވާނުންގެ ނިސްބަތް މަތި މައްސަލައަށް ހައްލެއް ހޯދައި ދިނުމާއި ވަޒީފާތަކުގައި އަންހެނުން އިތުރުކުރުމާއި ވަޒީފާ އަދާކުރުމުގައި ދިވެހިންގެ ގާބިލުކަން އިތުރުކުރުން ހިމެނެ އެވެ.
"ސެއިލްސް" މަޝްރޫއު ކުރިއަށް ގެންދާނީ، މިނިސްޓްރީ އޮފް އިކޮނޮމިކް ޑިވެލޮޕްމަންޓް އަދި މޯލްޑިވްސް ޕެންޝަން އެޑްމިނިސްޓްރޭޝަން އޮފީސް ގުޅިގެންނެވެ.
