މެމްބަރުން ހަމަކުރުމަށް އިލެކްޝަންސް ކޮމިޝަނުން ދީފައި އޮތް މުއްދަތުގެ ތެރޭގައި 3000 މެމްބަރުން ހަމަކޮށްފައި ނުވާތީ، މޯލްޑިވްސް ލޭބާ އެންޑް ސޯޝަލް ޑިމޮކްރެޓިކް ޕާޓީ (އެމްއެލްއެސްޑީޕީ) އުވާލަން އިލެކްޝަންސް ކޮމިޝަނުން މިއަދު ނިންމައިފި އެވެ.
ގާނޫނުގައި ބަޔާން ކުރާ މެންބަރުންގެ އަދަދު ހަމަނުވާތީ، މި މަހުގެ 14 ވަނަ ދުވަހުގެ ނިޔަލަށް ހަތަރު ޕާޓީއަކުން އީސީން ވަނީ އުވާލާނެ ކަމުގެ ނޯޓިސް ދީފަ އެވެ. އެއީ އެމްއެލްއެސްޑީޕީގެ އިތުރުން މޯލްޑިވްސް ރިފޯމް މޫވްމެންޓް (އެމްއާރުއެމް)، މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އާއި ދިވެހި ރައްޔިތުންގެ ޕާޓީ (ޑީއާރުޕީ) އެވެ.
ހުރިހާ ޕާޓީއަކުން ވެސް 3000 މެންބަރުން ހަމަވި ކަމަށް އީސީން ކުރިން ބުނި ނަމަވެސް، ފޯމުތައް ޕްރޮސެސް ކުރުމަށްފަހު އީސީން މިއަދު ބުނީ އެމްއެލްއެސްޑީޕީގައި 3000 މެންބަރުން ހަމަ ނުވާ ކަމަށެވެ.
އަދި، ޕާޓީ އުވާލުމަށް ފުރިހަމަ ކުރަން ޖެހޭ އިޖުރާއަތްތައް ފުރިހަމަކުރުމަށް އެ ޕާޓީއަށް އަންގާފައިވާ ކަމަށް ވެސް ބުނެފައިވެ އެވެ.
