އެފްއޭއެމް 16 އަހަރުން ދަށުގެ ޔޫތު ޗެމްޕިއަންޝިޕްގައި މިރޭ ކުޅުނު ސެމީ ފައިނަލް ދެ ވަނަ މެޗުގައި 6-1 އިން ޓީސީ ސްޕޯޓްސް ކްލަބް ބަލިކޮށް ކްލަބް ވެލެންސިއާ އިން މުބާރާތުގެ ފައިނަލްގެ ފަހު ޖާގަ ހޯދައިފި އެވެ.
އަންނަ އާދިއްތަ ދުވަހުގެރޭ 20:30 ގައި ފަށާ ފައިނަލުގައި ވެލެންސިއާ އިން ކުޅޭނީ ޔުނައިޓެޑް ވިކްޓަރީއާ އެވެ. ޔުނައިޓެޑް ވިކްޓަރީ ވަނީ މިއަދު ހަވީރު ކުޅުނު ފުރަތަމަ ސެމީގައި 4-0 އިން ކްލަބް އީގަލްސް ބަލިކޮށްފަ އެވެ.
ކުރީގެ އެއް ވަނަ ފޯވާޑް އާދަމް އަބްދުއްލަތީފް (ލައްޗޭ)ގެ ކޯޗުކަމުގައި ކުޅޭ ވެލެންސިއާ އިން މެޗުގެ ފުރަތަމަ މިނިޓުން ފެށިގެން ޓީސީ ހާފް ތެރޭގައި ބޯޅަ ހިފަހައްޓައިގެން ކުޅެން ފެށި އެވެ. ޓީސީގެ ކޯޗަކަށް ފުރަތަމަ ޑިވިޝަނުގެ ކޯޗިންގެ ތަޖުރިބާ ބޮޑު މުހައްމަދު ޝާހިދު (ޝާޑު) ހުރިއިރު، ދެ ޓީމުން ވެސް ފުރަތަމަ ކޮޅުގައި ފުރުސަތު ތަނަވަސްކުރެވޭތޯ ގިނަ މަސައްކަތްތަކެއް ކުރި އެވެ.
ވެލެންސިއާ އިން ލީޑުނެގީ މެޗުގެ 30 ވަނަ މިނިޓްގައި އޭރިއާތެރެއިން، ޓީސީ ކީޕަރު މުހައްމަދު މާހިލް މުފީދު އަތުގައި ޖެހިފައި ނުކުތް ބޯޅައެއް ހޯދައި، މުހައްމަދު އައިހަމް އިބްރާހިމް ޖެހި ގޯލުންނެވެ.
ޓީސީ ކުޅުންތެރިއަކު ކައިރިން ވެލެންސިއާގެ ކެޕްޓަން، ޖޫދު ބޯޅަ ހިފައިގެންދާން މަސައްކަތްކުރަނީ.--- ފޮޓޯ: އިމޭޖަސް.އެމްވީ/ ނައުޝަމް ވަހީދު
ވެލެންސިއާ އިން ލީޑުނެގިތާ 10 މިނިޓް ފަހުން، ފުރަތަމަ ހާފުގެ ފަހު ކޮޅުގައި އެ ޓީމުން ދެ ވަނަ ލަނޑު ޖެހި އެވެ. މިއީ އޭރިއާތެރެއިން ވޮލީ އަކުން ވެލެންސިއާގެ މުހައްމަދު ނާމީ ނަޒީފް ޖެހި މޮޅު ގޯލެކެވެ. އޭނާ ފޮނުވާލި ބޯޅަ އަމާޒުވީ ގޯލުގެ މަތީ ދާގަނޑަށެވެ.
ދެ ވަނަ ހާފްގެ ކުޅުން ފެށިގެން ތިން މިނިޓް ތެރޭ ވެލެންސިއާ އިން ވަނީ ދެ ގޯލު ޖަހައިފަ އެވެ. މި ދެ ލަނޑު ޖެހީ އަގްސާން އަހުމަދު ނަސީމް އެވެ. މެޗުގެ 43 ވަނަ މިނިޓްގައި ބޯޅަ ހިފައިގެން އޭރިއާތެރެއަށް ވަދެ، އަގްސާން ވަނީ ކީޕަރު މާހިލް ގައިމަތިން ގޯލަށް ބޯޅަ ފޮނުވާލައިފަ އެވެ. އޭގެ ދެ މިނިޓް ފަހުން އޭރިއާތެރެއަށް ހުރަސްވި ބޯޅަ އަގްސާން ވަނީ ހަމަޖެހިލާފައި ގޯލަށް ވައްދާލައިފަ އެވެ.
މެޗުގެ 60 ވަަނަ މިނިޓްގައި އައިހަމް ވެލެންސިއާގެ ފަސް ވަނަ ގޯލު ޖަހާފައިވަނިކޮށް، އޭގެ މިނިޓެއް ފަހުން ވެލެންސިއާ ފަހަތުން ހެދި ގޯހެއްގެ ފައިދާނަގައި، ޔޫސުފް އާއިޝް މުހައްމަދު ގޯލު ޖެހީ ވެލެންސިއާ ކީޕަރު އަބްދުﷲ ރަޒީފް ބޯމަތިން ބޯޅަ ފޮނުވާލައިގެންނެވެ.
16 އަހަރުން ދަށުގެ ޔޫތު ޗެމްޕިއަންޝިޕްގެ ސެމީ ފައިނަލުގައި މިރޭ ވެލެންސިއާ އާއި ޓީސީ ކުޅުނު މެޗުގެ ތެރެއިން.-- ފޮޓޯ: އިމޭޖަސް.އެމްވީ/ ނައުޝަމް ވަހީދު
ވެލެންސިއާގެ ކެޕްޓަން، މުހައްމަދު ޖޫދު އަޝްފާގު އަށް ކުރި ފައުލަކަށް ދިން ޕެނަލްޓީން އޭނާ ފޮނުވާލި ބޯޅަ ދިޔައީ ހުރަސްދަނޑިމަތިންނެވެ. ވެލެންސިއާގެ ފަހު ގޯލު ޖެހީ މެޗުގެ އިތުރު ވަގުތުގައި ހަސަން އަމާން ޒާހިރު އެވެ. އޭނާ މި ގޯލު ޖެހީ ހުރަސްދަނޑީގައި ޖެހިފައި އައި ބޯޅައެއް ހޯދުމަށް ފަހު ތިރިން ގޯލުގެ ތެރެއަށް ފޮނުވާލައިގެންނެވެ.
ސޯޅަ އަހަރުން ދަށަށް ހާއްސަކޮށް އެފްއޭއެމުން ޔޫތު މުބާރާތެއް ބޭއްވުމުގެ އެންމެ ބޮޑު އެއް މަގުސަދަކީ މި އަހަރު އޮކްޓޫބަރު މަހު އޮތް 17 އަހަރުން ދަށުގެ އޭޝިއަން ކަޕް ކޮލިފައިން އަށް ސްކޮޑެއް އެކުލަވާލުމެވެ. އެ ގޮތުން 17 އަހަރުން ދަށުގެ އޭޝިއަން ކަޕް ކޮލިފައިން ސައުދީ އަރަބިއްޔާގައި ކުރިއަށްދާއިރު، އެ ޓީމާއި ރާއްޖޭގެ އިތުރުން ދެން އެ ގްރޫޕްގައި އޮތީ އިންޑިއާ، މިޔަންމާ އަދި ކުވޭތެވެ.
