އެފްއޭއެމުން މިހާރު ކުރިއަށްގެންދާ 16 އަހަރުން ދަށުގެ ޔޫތު ޗެމްޕިއަންޝިޕްގައި މިއަދު ހަވީރު ކުޅުނު މެޗުގައި އަހުމަދު އަފްލާޒްގެ ހެޓްރިކާ އެކު 4-3 އިން ދަ ގްރާންޑޭ ސްޕޯޓްސް ބަލިކޮށް، ކްލަބް އީގަލްސް އިން ސެމީ ފައިނަލުގެ ފަހު ޖާގަހޯދައިފި އެވެ.
މި މަހު 29 ވަނަ ދުވަހު ޔޫތު ޗެމްޕިއަންޝިޕްގެ ސެމީ ފައިނަލް މެޗުތައް ކުޅޭއިރު، ފުރަތަމަ ސެމީގައި ޔުނައިޓެޑް ވިކްޓްރީ (ޔޫވީ) ކުޅޭނީ އީގަލްސްއާ އެވެ. ދެ ވަނަ ސެމީގައި ކްލަބް ވެލެންސިއާ އިން ޓީސީ ސްޕޯޓްސް ކްލަބާ ބައްދަލުކުރާނެ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗަށް ނުކުތްއިރު، ދަ ގްރާންޑޭ އާއި އީގަލްސް ތެރެއިން މޮޅުވާ ކޮންމެ ޓީމަކަށް ވެސް އޮތީ ސެމީގެ ދޮރު ހުޅުވިފަ އެވެ. އެއީ މި ގްރޫޕްގައި އޮތީ ތިން ޓީމު ކަމަށްވާއިރު، ފުރަތަމަ ދެ މެޗުން މޮޅުވެ، ވެލެންސިއާ ސެމީ އަށް ދަތުރުކޮށްފައިވާތީ އެވެ.
ފޯރިގަދަ ކުޅުމެއް ފެނިގެންދިޔަ މިއަދު ހަވީރުގެ މެޗުގައި އީގަލްސް އިން މޮޅުވީ ފަހު ވަގުތާ ހަމައަށް ރަނގަޅަށް މަސައްކަތް ކޮށްގެންނެވެ. މެޗުގައި އީގަލްސްގެ ފޯވާޑް އަފްލާޒް ހެޓްރިކެއް ހަދައި، މޮޅު ކުޅުންތެރިޔާގެ މަގާމު ހޯދިއިރު، މުހިންމު ދަނޑިވަޅުތަކުގައި ތަފާތު ދެއްކީ އޭނާ އެވެ.
މިއަދުގެ މެޗުގެ ތެރެއިން އީގަލްސްގެ އަފްލާޒް ބޯޅަ ފޮނުވާލަނީ.-- ފޮޓޯ: މުހައްމަދު ޝާބިން/ އަދަދު
މެޗުގެ ހަތަރު ވަނަ މިނިޓްގައި އީގަލްސްގެ އަޝްހަމް އިބްރާހިމް މުހައްމަދު ގޯލެއް ޖަހައި އެ ޓީމަށް ލީޑުނަގައިދިނެވެ. މެޗުގެ 27 ވަނަ މިނިޓްގައި އަފްލާޒް އީގަލްސްގެ ލީޑުފުޅާކޮށްދިންއިރު، ފުރަތަމަ ހާފު ނިމުމުގެ ކުރިން ދަ ގްރާންޑޭގެ މުހައްމަދު ނަހުޒާން އަހުމަދު ވަނީ ގޯލެއް ޖަހައި އެ ޓީމަށް މެޗުގެ އުންމީދު ހޯދައިދީފަ އެވެ. އަދި ދެ ވަނަ ހާފް ފެށިގެން ލަސްތަކެއް ނުވެ، ނަހުޒާން ވަނީ ދެ ވަަނަ ގޯލެއް ޖަހައި ދަ ގްރާންޑޭ އަށް ލީޑުނަަގައިދީފަ އެވެ.
އެކަމަކު، މެޗުގެ 64 އާއި 72 ވަނަ މިނިޓްގައި ދެ ގޯލު ޖަހައި، އަފްލާޒް ވަނީ އޭނާގެ ހެޓްރިކް ފުރިހަމަކޮށްފަ އެެވެ. މެޗުގެ އިތުރު ވަގުތުގައި ދަ ގްރާންޑޭ އިން ތިން ވަނަ ގޯލު ޖެހިިއިރު، މިއީ އީގަލްސްގެ ކީޕަރު އަބާން އިބްރާހިމް އަތުން ބައިކޮޅަށް ވަން ގޯލެކެވެ.
ސޯޅަ އަހަރުން ދަށަށް ހާއްސަކޮށް އެފްއޭއެމުން ޔޫތު މުބާރާތެއް ބޭއްވުމުގެ އެންމެ ބޮޑު އެއް މަގުސަދަކީ މި އަހަރު އޮކްޓޫބަރު މަހު އޮތް 17 އަހަރުން ދަށުގެ އޭޝިއަން ކަޕް ކޮލިފައިން އަށް ސްކޮޑެއް އެކުލަވާލުމެވެ. އެ ގޮތުން 17 އަހަރުން ދަށުގެ އޭޝިއަން ކަޕް ކޮލިފައިން ސައުދީ އަރަބިއްޔާގައި ކުރިއަށްދާއިރު، އެ ޓީމާއި ރާއްޖޭގެ އިތުރުން ދެން އެ ގްރޫޕްގައި އޮތީ އިންޑިއާ، މިޔަންމާ އަދި ކުވޭތެވެ.
