ރާއްޖޭގެ އެންމެ ގިނަ ރިސޯޓުތައް ތަރައްގީކޮށްފައިވާ ޔުނިވާސަލް އެންޓަޕްރައިސަސް އާއި ބައިނަލްއަގުވާމީ ހޮސްޕިޓާލިޓީ ބްރޭންޑު މެރިއޮޓް އިންޓަނޭޝަނަލް ހިއްސާވާ ފުލް މޫން ރިސޯޓް އެންޑް ސްޕާ އާއި ޑަބްލިޔު މޯލްޑިވްސް ވިއްކާލައިފި އެވެ.
މި ރިސޯޓު ވިއްކާލުމުގެ މުއާމަލާތުގައި އިސްކޮށް އުޅުނީ ރިއަލް އެސްޓޭޓާއި އިންވެސްޓްމަންޓް މެނޭޖްމަންޓުގައި ފުންނާބު އުސް ޖޭއެލްއެލް ހޮޓެލްސް އެންޑް ރިސޯޓްސްއިންނެވެ. މިއީ ރާއްޖޭގެ ރިސޯޓުތައް ވިއްކުމުގައި އެންމެ ތަޖުރިބާހުރި އަދި އެންމެ ގިނަ އަދަދެއްގެ ރިސޯޓުތައް ވިއްކުމުގެ މުއާމަލާތްތަކުގައި ބައިވެރިވި ކުންފުންޏެވެ.
ފުލް މޫނާއި ޑަބްލިޔު ރިސޯޓު ވިއްކާލި މުއާމަލާތާ ގުޅިގެން ނެރުނު ނޫސްބަޔާނެއްގައި ޖޭއެލްއެލްއިން ބުނި ގޮތުގައި މިއީ ރާއްޖޭގެ އެއް ރިސޯޓަށް ވުރެ ގިނަ ރިސޯޓު ހިމެނޭ ޕޯޓްފޯލިއޯއެއް ވިއްކާލި ފުރަތަމަ ފަހަރެވެ. މި ރަށްތައް ގަތީ ޕްރައިވެޓް އިކުއިޓީ އިންވެސްޓަރެކެވެ. އެކަމަކު ވިއްކާލި އަގެއް ހާމަ ނުކުރެ އެވެ.
ފުލް މޫން ރިސޯޓް އެންޑް ސްޕާ
- ރަށް: ކ. ފުރަނަފުށި
- ބިމުގެ ބޮޑުމިން: 11.8 ހެކްޓަރު
- ވޯޓާ ވިލާ އާއި ބީޗް ވިލާ ހިމަނައިގެން 176 ކޮޓަރި
- ވެލާނާ އިންޓަނޭޝަނަލް އެއާޕޯޓޫން ސްޕީޑުބޯޓުގައި 15 މިނިޓުން ދެވޭ
- ފަސް ތަރި
ޝެރަޓަން ފުލްމޫން ރިސޯޓް އެންޑް ސްޕާ. -- ފޮޓޯ: އެރީނާ ޓުވާސް
ޑަބްލިޔު މޯލްޑިވްސް
- ރަށް: އއ. ފެސްދޫ
- ބިމުގެ ބޮޑުމިން: 4.8 ހެކްޓަރު
- ވޯޓާ ވިލާ އާއި ބީޗް ވިލާ ހިމަނައިގެން 77 ކޮޓަރި
- ވެލާނާ އިންޓަނޭޝަނަލް އެއާޕޯޓުން ސީޕްލޭނުގައި 25 މިނިޓުން ދެވޭ
- ފަސް ތަރި
ޑަބްލިޔު މޯލްޑިވްސް. -- ފޮޓޯ: މެރިއޮޓް އިންޓަނޭޝަނަލް
ސީދާ އަގެއް ނުބުނި ނަމަވެސް ޖޭއެލްއެލް އިން ވަނީ މިއީ ކޮންރެޑް ރަންގައްޔާއި އަނަންތާރާ ދިގު، ވެލި އަދި ނަލަދޫ ރިސޯޓު ވިއްކާލުމުގެ މުއާމަލާތާއި ޝެވަލް ބްލޮންކް ރަންދެލި ވިއްކާލަން އެ ކުންފުނިން ހިންގި މުއާމަލާތްތަކެކޭ އެއްގޮތަށް އެންމެ ބޮޑު އަގެއް ލިބިގެން ހިންގުނު އެއް މުއާމަލާތެވެ.
މި ތާރީހީ މުއާމަލާތުގެ ކާމިޔާބީ ފާހަގަކޮށް ޖޭއެލްއެލް ހޮޓެލްސް އެންޑް ހޮސްޕިޓާލިޓީ ގްރޫޕުގެ އޭޝިއާ ޕެސިފިކް ސަރަހައްދުގެ ހެޑް އޮފް އިންވެސްޓްމަންޓް ސޭލްސް، ނިހާތް އެރްކާން ވިދާޅުވީ ގޮތުގައި ދަތުރުފަތުރުގެ ހުރަސްތަކާ އެކުވެސް މިހާ ބިޔަ އަދި އުނދަގޫ މުއާމަލާތެއް ނިމުމުން އަންގައިދެނީ ރިސޯޓު މަންޒިލްތަކުގެ މެދުގައި ރާއްޖޭގެ ވިލުންވެރިކަމާއި ހައިބަތު އިންވެސްޓަރުން އަގު ކުރާ ކަމެވެ.
މި ރިސޯޓުތަކުގައި އޮތް މެރިއޮޓްގެ ހިއްސާ ވިއްކާލި ނަމަވެސް ރަށްތައް ވިއްކާލީ މެރިއޮޓް އިންޓަނޭޝަނަލް މެނޭޖްމަންޓާ އެކީގަ އެވެ. މިހެންކަމުން މި ރަށްތައް ކުރިޔަށް އޮތް ތަނުގައި ވެސް ހިންގާނީ މެރިއޮޓްގެ ޝެރަޓަން އަދި ޑަބްލިޔު ބްރޭންޑިންގަ އެވެ.
މި އަހަރުގެ ތެރޭގައި އެކަނިވެސް ރާއްޖޭގައި ހިންގަމުން އަންނަ ރިސޯޓުތަކާއި ރިސޯޓު ތަރައްގީކުރަން ހަވާލުކޮށްފައިވާ ރަށްތަކާއި ފަޅުތަކާ ގުޅޭ ގިނަ މުއާމަލާތްތަކެއް ހިނގާފައިވާކަން ފާހަގަކުރެވެ އެވެ. އެގޮތުން ހަތް ރަށަކާއި ފަސް ފަޅެއް ހިމެނޭހެން 12 މުއާމަލާތެއް ވަނީ ހިންގާފަ އެވެ. މިގޮތަށް ވިއްކާލި ރަށްތަކުގެ ތެރޭގައި ގިނައީ އަދި ތަރައްގީކޮށް ނުނިމޭ ރަށްރަށެވެ.
ތަރައްގީކޮށް ނިމި ހިންގަމުން އަންނަ ރިސޯޓުތަކުގެ ތެރެއިން ވިއްކާލީ ކ. މާފުށިވެލާވަރުގައި ހިންގަމުން އައި ރިސޯޓާއި ދ. ދޫރެސް އެވެ. މީގެ ތެރެއިން މާފުށިވެލާވަރަކީ ޔުނިވާސަލް އާއިލާގެ ކުންފުންޏަކުން ތަރައްގީކޮށްގެން ހިންގުމަށް ފަހު ވިއްކާލި ރިސޯޓެކެވެ. ދޫރެސް ވިއްކާލީ ބޭންކަށް ދައްކަން ޖެހޭ ލޯނެއް ނުދައްކައިގެންނެވެ.
