އޮޅުވަލައިގެން ސިޔާސީ ޕާޓީތަކަށް މީހުން ވައްދާ މައްސަލާގައި، އިލެކްޝަން ކޮމިޝަން ޒިންމާދާރުކަން ކުޑަ ކަމަށް ބުނެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ނުރުހުން ފާޅުކޮށްފި އެވެ.
އިލެކްޝަން ކޮމިޝަނުގެ މެންބަރުން ހާޒިރުކޮށް މިއަދު ބޭއްވި މިނިވަން މުއައްސަސާތަކާ ބެހޭ ކޮމިޓީގައި ވެލިދޫ ދާއިރަގެ މެންބަރު މުހައްމަދު ޝަފީގު ވިދާޅުވީ އިލެކްޝަން ކޮމިޝަނުން ޕާޓީތަކަށް މީހުން ވައްދާ މައްސަލަ ހައްލުކުރުމުގައި މަސައްކަތް ކުރަމުންދަނީ ވަރަށް ޒިންމާދާރުކަން ކުޑަގޮތެއްގައި ކަމަށެވެ. އަދި އެފަދަ މައްސަލަތައް ހައްލުކުރުމަށް އެކަށީގެންވާ މަސައްކަތެއް ކޮށްފައި ނުވާކަން ޝަފީގު ފާހަގަކުރެއްވި އެވެ.
"ހަމައެކަނި ޓުވީޓެއް ކުރެއްވީ، ތިމަންނާމެން މިގޮތަށް ވަގު ފޯމު ހުށަހަޅައިފިއްޔާ ޖޫރިމަނާ ކުރާނަމޭ. ޓުވީޓު ފިޔަވައި އަޅުގަނޑަކަށް ނުފެނުނު ތިބޭފުޅުން ވެބްސައިޓުގައި އެކަމަށް ކޮށްފައި އޮތް އިއުލާނެއް، ދަންނަވާފައި އޮތް ދެންނެވުމެއް، ނެރުއްވާފައި އޮތް ނޫސްބަޔާނެއް. ހަމައެކަނި ޓުވީޓު އަޅުގަނޑަށް ފެނުނީ،" އޭނާ ވިދާޅުވި އެވެ.
ޝަފީގް ވިދާޅުވީ އޮޅުވާލައިގެން މީހަކު ޕާޓީއަކަށް ވައްދާފައި އޮވެއްޖެ ނަމަ، އެމީހަކު އަމިއްލައަށް އެދިގެން ވެސް އެ ޕާޓީއަކުން ވަކިވުމަކީ ވަރަށް އުނދަގޫ މަސައްކަތަށް ވެފައިވާ ކަމަށެވެ. އަދި އަމިއްލައަށް އެދުމުން، މިހާރަށްވުރެ ފަސޭހަކޮށް ޕާޓީން ވަކިވެވޭނެ އިންތިޒާމެއް ހަމަޖައްސައިދިނުމަށް ޝަފީގު އެދިވަޑައިގެންނެވި އެވެ.
މިހާރު އޮންނަ ގޮތުން ނަމަ ޕާޓީއަކަށް ވަންނަން ފޯމު ފުރުމަށްފަހު، އެ ފޯމުތަކުގެ ސައްހަކަން ކަށަވަރު ކުރަނީ ޕާޓީތަކުގެ ރަޖިސްޓްރާއަކަށް ހުންނަ މީހެކެވެ. ރަޖިސްޓްރާއިން، ފޯމުތައް އީސީއަށް ފޮނުވަނީ ފޯމުގައިވާ ނަންބަރުތަކަށް ގުޅާ، ފޯމުތައް ކަށަވަރު ކުރުމަށްފަހު އެވެ. އެގޮތަށް އެކަން ކުރާއިރު، ފޯމުގައިވާ ނަންބަރަކީ އެއީ ފޯމުގައިވާ މީހާގެ ނަންބަރު ނޫނަސް އެކަން ކަށަވަރު ކުރެވޭނެ ގޮތެއް ނޯވެ އެވެ.
ކޮމިޓީ މުގައްރިރު އަދި މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވީ ޕާޓީގެ ރަޖިސްޓްރާއަށް ވެސް ފޯމު ވެރިފައި ކުރެވޭނީ ފޯނު ނަންބަރުން ކަމަށާއި އީސީން ވެސް ވެރިފައި ކުރަނީ އެގޮތަށް ކަމަށެވެ. އަދި ފޯނު ނަންބަރުން ނޫން އެހެން ގޮތަކަށް ފޯމުތައް ވެރިފައި ކުރެވޭނެ ގޮތެއް އޮންނަން ޖެހޭނެކަން ފާހަގަކުރައްވާ ރޮޒައިނާ ވިދާޅުވީ ސައްހަ ނޫން ފޯމުތަކުގެ މައްސަލަ ދިމާވުމުން ރަޖިސްޓްރާ ޖޫރިމަނާ ކުރުން ނޫން ގޮތެއް އޮންނަން ޖެހޭނެ ކަމަށެވެ.
ވިލިމާލެ ދާއިރާގެ މެންބަރު އުޝާމް ވިދާޅުވީ އޮޅުވާލައިގެން ޕާޓިތަކަށް ވައްދާ މީހުން އަމިއްލައަށް ވަކިވާން އެދުމުން އެކަން ކުރެވެންވާނެ ކަމަށާއި އެ ޕްރޮސެސް އެހާ އުނދަގޫވުން އެއީ މައްސަލައެއް ކަމަށެވެ.
ޕާޓީތަކަށް މީހުން ވެއްދުމާއި ވަކިވުމުގެ ކަންކަމުގައި އީސީން އަމަލުކުރަމުންދާ ގޮތާމެދު ހިތްހަމަޖެހިވަޑައިނުގެން ތިނަދޫ ދެކުނު ދާއިރާގެ މެންބަރު އަބްދުﷲ ސަނީފް ވިދާޅުވީ އިލެކްޝަން ކޮމިޝަނުގެ މައްޗަށް އޮތް ގާނޫނީ ޒިންމާ ބޮލުން ދަމައިގަންނަން އުޅޭ ކަމަށް ގަބޫލުކުރެވޭ ކަމަށެވެ.
އެ މައްސަލާގައި ގިނަ މެންބަރުންގެ ނުރުހުން އީސީއަށް އަމާޒުކޮށްފައިވާއިރު، އެ ކޮމިޝަނުގެ ރައީސް ފުއާދު ތައުފީގު ވިދާޅުވީ އޮޅުވާލައިގެން މީހުން ޕާޓީއަށް ވައްދާ މައްސަލަ ހަމައެކަނި އީސީގެ ބޮލުގައި އެޅުވުން ގޯސްކަމަށާއި އެކަމުގެ ޒިންމާ ޕާޓީތަކުން ވެސް ނަގަން ޖެހޭނެ ކަމަށެވެ. އޭނާ ވިދާޅުވީ ޕާޓީތަކުން ހުށަހަޅާ ފޯމުތަކަށް އަމަލުނުކޮށް ހެދޭނެ އެއްޗެއް ނެތް ކަމަށާއި ޕާޓިތަކުން މީހުން ވަކިކުރުމަކީ ފަސޭހަ މަސައްކަތެއްގެ ގޮތުގައި އޮންނަ ނަމަ މީހުންނަށް ނޭނގި ޕާޓީތަކުން ވަކިކުރެވޭނެ ކަމަށެވެ.
ފަސޭހަކޮށްލާފިއްޔާ ފެންނާނީ މީހުންނަށްް ނޭނގި ހުއްޓާ މުހައްމަދު ޝަފީގުވެސް އެމްޑީޕީން ކަނޑާލިތަން، އުޝާމް މުގައްރިރު ރޮޒައިނާ އެމްޑީޕީން ކަނޑާލިތަން
މިހާރު އީސީން އަމަލުކުރަމުންދާ ގޮތަކީ، ޕާޓީއެއްގައި ހުރި މީހަކު އެ ޕާޓީން ވަކިވާ ނަމަ ނުވަތަ އެހެން ޕާޓީއަކަށް ބަދަލުވާ ނަމަ އެކަން ވަކިވާ ޕާޓީއާއި ބަދަލުވާ ޕާޓީއަށް ވެސް ޗިޓަކުން އެންގުމެވެ.
އޮޅުވާލައިގެން މީހުން ޕާޓިތަކަށް ވައްދަނީ ދައުލަތުން ސިޔާސީ ޕާޓީތަކަށް ފައިސާ ދޫކުރާތީ ކަމަށް ބެލެވޭ ކަން ފާހަގަކޮށް އީސީން ބުނީ، ދައުލަތުން ޕާޓީތަކަށް ފައިސާ ދިނުން ހުއްޓާލައިފިނަމަ އޮޅުވާލައިގެން ޕާޓިތަކަށް މީހުން ވައްދާ މައްސަލަ ވެސް ހައްލުވާނެ ކަމަށެވެ. ހަމައެއާއެކު ޕާޓީތަކަށް ފައިސާ ދޫކުރަނީ ޕާޓީގެ ދަފްތަރަށް ބަލާފައި ނޫން ކަމަށް ކަނޑައަޅައިފި ނަމަ ވެސް އެކަން ހައްލުވެދާނެ ކަމަށް އީސީން ހުށަހެޅި އެވެ.
އޮޅުވާލައިގެން ޕާޓީތަކަށް މީހުން ވައްދާ މައްސަލަ ހައްލުކުރުމަށް މީގެ ކުރިން ބަޔަކު އިިހްލާސްތެރި މަސައްކަތްތަކެއް ކޮށްފައި ނުވާކަމަށާއި މިހާރު އެ މަސައްކަތް ކުރެވެމުންދާކަން ފާހަގަކޮށް އީސީން ވަނީ އެ މައްސަލަ ހައްލުކުރުމަށް އިތުރަށް ކުރި މަސައްކަތްތަކަށް އަލިއަޅުވާލައިފަ އެވެ. އެގޮތުން ފޯމުތައް ވެރިފައި ކުރުމަށާއި މައްސަލަޖެހޭ ފޯމުތައް އިތުރަށް ވެރިފައި ކުރުމަށް މީގެ ކުރިން ފުލުހުންނާއެކު މަޝްވަރާކުރި ކަމަސް އީސީން ބުނެ އެވެ.
އީސީން ބުނީ، ފުލުހުންނާއެކު ކުރި މަޝްވަރާތަކުން، ފޯމުތަކުގެ ސައްހަކަން ކަށަވަރުކުރެވޭނެ ވަސީލަތްތައް ފުލުހުންގެ ނެތް ކަމަށް އެމީހުން ބުނެފައިވާ ކަމަށެވެ. އަދި ފިންގާޕްރިންޓް އަޅާކިޔާނެ ޑޭޓާބޭސްއެއް ނެތް ކަމަށް ވެސް ފުލުހުންނާ ހަވާލާދީ އީސީން ބުނެ އެވެ. މީގެ އިތުރުން، ފިންގާޕްރިންޓް ވެރިފައި ކުރުމަށް ޑީއެންއާރުގައި ހުރި ޑޭޓާބޭސްއަކީ ވެސް އީސީން ކުރާ ޓެކްނިކަލް މަސައްކަތަކަށް އެކަށޭނެ ފެންވަރަކަސް ނެގިފައި ހުރި އެއްޗެއް ނޫން ކަމަށް އެ މުއައްސަސާއާ ހަވާލާދީ އީސީން ބުނެފައި ވެއެވެ.
