ކުރީގެ ރައީސް އަބްދުﷲ ޔާމީނުގެ ވެރިކަމުގައި ސުޕްރީމްކޯޓުގެ ފަނޑިޔާރުންތަކެއް ހައްޔަރުކުރި އިރު، އެކޯޓުގެ ފުރާޅުން ޓިނު ނެގި ކަމަށް ބުނާ މައްސަލައަކީ "އިންކުއަރީއެއް ހިންގައިގެން" ބަލަން ޖެހޭ ކަމެއް ކަމަށް އޭޭރު ޑިފެންސް މިނިސްޓަރަކަށް ހުންނެވި، މިހާރު ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު މިއަދު ވިދާޅުވެއްޖެ އެވެ.
"ދިވެހިރާއްޖޭގެ ގައުމީ ސަލާމަތުގެ ބިލު"ގެ ނަމުގައި އާދަމް ޝަރީފު ހުށަހެޅުއްވި ބިލަށް، މަޖިލީހުގެ މިއަދުގެ ޖަލްސާގައި ކުރި ބަހުސްގައި ބައެއް މެމްބަރުން އޭނާއަށް ފާޑުވިދާޅުވީ ސުޕްރީމްކޯޓުގެ ފަނޑިޔާރުން ހައްޔަރުކުރުމުގެ އޮޕަރޭޝަނާ ގުޅުވައިގެންނެވެ. ފާޑުކިއުންތަކަށް ރައްދު ދެއްވަމުން އާދަމް ޝަރީފު ވިދާޅުވީ ސުޕްރީމްކޯޓުން ޓިނު ނެގިތޯ ބަލަން އިންކުއަރީއެއް ހަދަން ޖެހެނީ "އެއީ ދިވެހި އަސްކަރިއްޔާއަށް އިނގިލި ދިއްކުރެވޭ" ކަމަކަށް ވާތީ ކަމަށެެވެ.
"ސުޕްރީމްކޯޓުން ޓިނު ނެގިތޯ ނުވަތަ އެކަން ހިނގައި ދިޔައީ ކިހިނެތްތޯ އެއީ ވެސް ހަމަ ރަނގަޅު އިންކުއަރީއެއް ހަދާލަން ޖެހޭ ކަމެއް ކަމަށް ހަމަ އަޅުގަނޑު ވެސް ދެކެން،" އާދަމް ޝަރީފު ވިދާޅުވި އެވެ.
އެހެން ނަމަވެސް އޭނާ ވިދާޅުވީ ސިފައިން ސުޕްރީމްކޯޓުގެ ޓިނު ނުނަގާ ކަމަށާއި އެހެން ނަމަވެސް ސަލާމަތީ ހިދުމަތްތަކުން ސުޕްރީމްކޯޓުގައި ހިންގި ކަމެއް ހިންގާފައި ވަނީ ހައްސާސް ކަންތައްތަކެއް ކުރިމަތިވި ދަނޑިވަޅެއްގައި ކަމަށެވެ. އެއީ ގާނޫނީ ގޮތުން އުފެދިފައި އޮތް ސަރުކާރެއް ވައްޓަައިލަން ބަޔަކު މަސައްކަތް ކުރަމުން ދިޔަ ވަރަށް ހުތޫރަތްތެރި ވަގުތެއް ކަމަށް ވެސް އޭނާ ވިދާޅުވި އެވެ.
ސުޕްރީމް ކޯޓުގައި ސަލާމަތީ ބާރުތަކުން ހިންގި އޮޕަރޭޝަނުގެ އިތުރުން ރައްޔިތުންގެ މަޖިލީހުގައި ހިނގައިދިޔަ ނާތަހުޒީބު އެކިއެކި ކަންއްތައްތަކަކީ ވެސް ހަމަ އޮވެލާފައި ހިނގި ކަންތައްތަކެއް ނޫން ކަމަށް އާދަމް ޝަރީފު ވިދާޅުވި އެވެ. އޭނާ އެ ވިދާޅުވީ ބެލެވޭ ގޮތުގައި، މަޖިލީހުގެ ތަޅުމަށް ސިފައިން ވަދެ މެމްބަރުން ނެރުނު މައްސަލައިގެ ވާހަކަ އެވެ.
