އިންޓަނޭޝަނަލް ޔޯގާޑޭ ފާހަގަކުރަން ގަލޮޅުދަނޑުގައި ބޭއްވި ހަރަކާތުގެ ސެކިއުރިޓީ ބަލަހައްޓަން، ޔޫތު މިނިސްޓްރީން ފުލުހުންގެ އިދާރާގައި އެދުނު އިރު، އެ އިވެންޓާ ބެހޭ ފުރިހަމަ މައުލޫމާތު އޮންނާނީ ދީފައި ކަމަށް ޔޫތު މިނިސްޓަރު އަހުމަދު މަހުލޫފު މިއަދު ވިދާޅުވެއްޖެ އެވެ.
ޔޯގާޑޭ ފާހަގަކުރަން މިދިޔަ އަންގާރަދުވަހު ގަލޮޅު ދަނޑުގައި ބޭއްވި އިވެންޓަށް ހުރަސް އަޅަން މަސައްކަތްކުރި ބަޔަކު ދަނޑުގެ ސެކިއުރިޓީ ބްރީޗްކުރި އިރު، އެ އިވެންޓަށް ސެކިއުރިޓީ ދިނީ އެކި ގައުމުތަކުގެ ސަފީރުން އެ އިވެންޓުގައި ބައިވެރިވެވަަޑައިގަންނަވާކަން ނޭނގި ކަމަށް ފުލުހުން އިއްޔެ ބުންޏެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި ނައިފަރު ދާއިރާގެ މެމްބަރު އަހުމަދު ޝިޔާމް މަހުލޫފާ ކުރެއްވި ސުވާލުގައި އެއްސެވީ ސަފީރުން ވަޑައިގަންނަވާ ވާހަކަ ނާންގާ ކަމަށް ފުލުހުން ބުނާ ކަމަށާއި އެހެން އެހެން އެ ބުނަނީ ކީއްވެތޯ އެވެ.
ޝިޔާމުގެ ސުވާލުތަކަށް މަހުލޫފު ފުރަތަމަ ޖަވާބު ދެއްވި އިރު އެ ސުވާލަށް ޖަވާބެއް ނުދެއްވައި ދޫކޮށްލެއްވުމުން ރިޔާސަތުން މަޖިލީހުގެ ރައީސް މުހައްމަދު ނަޝީދު އެދިވަޑައިގެންނެވީ އެ ސުވާލަށް ކޮންމެވެސް ޖަވާބެއް ދެއްވުމަށެވެ.
"އަޅުގަނޑުމެންގެ މިނިސްޓްރީން އެެއްވެސް އިވެންޓެއް ރާވާކަމަށް ވާ ނަމަ، ސެކިއުރިޓީއަށް އެދޭ ކޮންމެ އިވެންޓެއްގައި ވެސް ހަމަ ވަކިން ބްރީފިން މީޓީން އެއް ބާއްވާނެ އެހެންވީމާ އެ މީޓިން ގައި ހަމަ ދައްކަން ޖެހޭ ހުރިހާ ވާހަަކައެއް ހުންނާނީ ދައްކާފައި،" މަހުލޫފު ވިދާޅުވި އެވެ.
ޔޯގާ އިވެންޓުގެ ސެކިއުރިޓީއަށް އެދުނީ ޔޫތު މިނިސްޓްރީން ކަމަކަށް، އަދި އެ އިވެންޓާ ބެހޭ ބްރީފިން މީޓިން އެއް ބޭއްވި ކަމަކަށް މިނިސްޓަރު ސީދާ ވިދާޅެއް ނުވެ އެވެ.
ޔޯގާ އިވެންޓު ރޭވީ އިންޑިއަލް ކަލްޗަރަލް ސެންޓަރާއި ޔޫތު މިނިސްޓްރީ ގުޅިގެނެވެ. އެ އިވެންޓުގައި ރާއްޖޭގައި ތިއްބަވާ އެހެން ގައުމުތަކުގެ ސަފީރުންގެ ތެރެއިން ހަ ބޭފުޅަކު ބައިވެރިވެވަޑައިގެންނެވި އެވެ. އެހެން ނަމަވެސް އެނގިފައިވާ ގޮތުގައި އެ އިވެންޓުގެ ސެކިއުރިޓީއަށް އެދުނީ ހަމަ އެކަނި އިންޑިއަލް ކަލްޗަރަލް ސެންޓަރުންނެވެ. އެ ސެންޓަރުން އެދުނީ ހަމަ އެކަނި އެ ސަރަހައްދުގެ ޓްރެފިކް މެނޭޖްކޮށްދޭން އެކަނި ކަން ވެސް ވަނީ އެނގިފަ އެވެ.
ޔޯގާ އިވެންޓުގައި ސަފީރުން ބައިވެރިވެވަޑައިގަންނަވާކަން ފުލުހުންނަށް ނޭނގޭ ކަމަށާއި އެކަން އެނގުނު ނަމަ އެ ހަރަކާތް ބޭއްވި ގަލޮޅު ދަނޑުގެ ސެކިއުރިޓީ ކަންކަން ވަރުގަދަކުރީސް ކަމަށް ފުލުހުން އިއްޔެ ބުންޏެވެ.
އިއްޔެ ބޭއްވި މީޑިއާ ބްރީފިން އެއްގައި އޭސީޕީ އަލީ ޝުޖާއު ވިދާޅުވީ، އެފަދަ އިވެންޓުތައް ބާއްވާއިރު އިވެންޓުގައި ބައިވެރިވާ ފަރާތްތަކުގެ މައުލޫމާތު ދޭ ކަމަށާއި އެހެން ނަަމެވެސް ޔޯގާ އިވެންޓުގައި ބައިވެރިވާ މީހުންގެ މައުލޫމާތު އެއްވެސް އިދާރާއަކުން ފުލުހުންނަށް ދީފައި ނުވާ ކަމަށެވެ.
