ރައްޔިތުން މަޖިލީހުގެ އެއްވެސް މެމްބަރަކު އެއްވެސް މައްސަލައެއްގައި ފުލުހަށް ހާޒިރު ކުރާނަމަ މަޖިލީހުގެ ރައީސް މުހައްމަދު ނަޝީދަށް އެންގުމަށް ކޮމިޝަނާ އޮފް ޕޮލިސް މުހައްމަދު ހަމީދު (ސީޕީ)ގެ އަރިހުގައި އެދިވަޑައިގެންފި އެވެ.
ރައްޔިތުން މަޖިލީހުގެ ބައެއް މެމްބަރުން އެއް ޖިންސުގެ މީހަކާއެކު ބަދު އަހުލާގީ އަމަލު ހިންގާ ކަމަށް ބުނާ ވީީޑިއޯ ތަކެއް މިދިޔަ ދެތިން ދުވަހު ދަނީ ދައުރުވަމުންނެވެ.
އޭގެ ތެރޭގައި ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމާއި ހެންވޭރު އުތުރު ދާއިރާގެ މެމްބަރު ހުސައިން ޝަހީމް (އަނދުން ހުސެެއިން) ހިމެނޭކަމަށް ދަނީ ތުހުމަތު ކުރަމުންނެވެ. ނަމަވެސް އެ ދެ ބޭފުޅުން ވެސް އެ ތުހުމަތުތަކަށް އިންކާރު ކުރައްވަ އެވެ.
މިފަދަ މައްސަލަތަކެއް ފެންމަތިވެފައިވާ ދަނޑިވަޅެއްގައި ނަޝީދު، ސީޕީ ހަމީދަށް ފޮނުއްވި ސިޓީއެއްގައި ވަނީ އެއްވެސް މައްސަލައެއްގައި މަޖިލީހުގެ އެއްވެސް މެމްބަރަކު ފުލުހަށް ހާޒިރު ކުރާނަމަ އަންގައިދިނުމަށް އެދިވަޑައިގެންފަ އެވެ.
ނަޝީދު މިހެން އެދިވަޑައިގެންނެވިއިރު، މެމްބަރު ސަލީމް ވަނީ އޭނާއަށް ތުހުމަތުކުރާ ބަދުއަހުލާގީ އަމަލު ހިންގާ ވީޑިއޯއެއްގައި އޭނާގެ ބައިވެރިވުމެއް ނެތް ކަން ކަށަވަރުކޮށްދޭން ފުލުހުން ގާތުގައި އެދިވަޑައިގެންފަ އެވެ.
އެ މައްސަލަ ވީހާ ވެސް އަވަހަކަށް ތަހުގީގުކޮށްދިނުމަށާއި އެ ކަމުގައި އޭނާ ހިމެނޭ ކަމަށް "ކުޑަ ނަމަވެސް ހެއްކެއް ލިބިއްޖެނަމަ" ގާނޫނީ ފިޔަވަޅު އަޅައިދިނުމަށް ވެސް އެދިވަޑައިގެންފައިވެ އެވެ.
މި މައްސަލަ ބަލައިދިނުމަށް ސަލީމް އެދިފައިވާއިރު، ދެ ފިރިހެނަކު ބަދުއަހުލާގީ އަމަލު ހިންގާ ވީޑިއޯއެއްގެ މައްސަލައިގައި ގާނޫނީ ވަކީލު އަދި ނަޝީދުގެ ކޮއްކޮ ނާޒިމް އަބްދުއްސައްތާރުގެ މައްސަލަ ވެސް ފުލުހުން އަންނަނީ ތަހުގީގު ކުރަމުންނެވެ.
އަދި، މިފަދަަ މައްސަލަތަކެއްގައި ގިނަ އަދަދެއްގެ ބަޔަކަށް ބްލެކްމެއިލް ކުރުމުގެ މައްސަލަތަކެއް ވެސް ފުލުހުން އަންނަނީ ތަހުގީގު ކުރަމުންނެވެ.
