ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) އިން ހުޅުމާލޭގައި ބިނާކުރަމުންދާ "މަސްޖިދު ރަޝީދު" އަންނަ ހޮނިހިރު ދުވަހު ހުޅުވަން ނިންމައިފި އެވެ.
މަސްޖިދު ރަޝީދަކީ ހުޅުމާލެ ފޭސް އެކެއްގައި 2020 ވަނަ އަހަރު ބިނާކުރަން ފެށި މިސްކިތެކެވެ.
ހުޅުމާލެ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނީ ހުޅުމާލޭގައި އަލަށް ބިނާކުރަމުންދާ މިސްކިތް އަންނަ ހޮނިހިރު ދުވަހުގެ ރޭ އިޝާ ނަމާދަށް ހުޅުވާ ނަމާދު ކުރަން ފެށޭނެ ކަމަށެވެ.
އަދި އެ މިސްކިތް ހުޅުވުމުން މިހާރު ނަމާދު ކުރަމުން ގެންދާ ވަގުތީ މިސްކިތް "މަސްޖިދުލް ފިތުޔާ"ގައި ނަމާދު ކުރުން ހުއްޓާލާނެ ކަމަށް ވެސް އެޗްޑީސީން ބުންޏެވެ.
ސަބަބެއް ކަމަށް ބުނީ އެ މިސްކިތަކީ 1200 މީހުންގެ ޖާގައިގެ ނަމާދު ކުރެވޭ މިސްކިތަކަށްވެފައި އެ ދެ މިސްކިތަކީ ކައިރީގައި ހުރި ދެ މިސްކިތަށްވުމުން އިސްލާމިކް މިނިސްޓްރީން އެގޮތަށް ނިންމުމުންނެވެ.
އަލަށް ހުޅުވަން ނިންމާފައިވާ މަސްޖިދު ރަޝީދު ހުންނަނީ ހުޅުމާލޭގައި ހުންނަ އަމީން އެވެނިއުގެ ފަހަތުގައި އޮންނަ މަގަށްވާ ގޮތަށެވެ.
އާރްސީސީއަކީ 1950 ގައި "ރަޝީދު ކާޕެންޓަރީ" ގެ ނަމުގައި ވަޑާން ގެއަކުން އުފެދުނު ވިޔަފާރިއެއްގެ ތެރެއިން އައި ކުންފުންޏެކެވެ.
