ކުޑަގިރި އާއި މާލެއާ ދެމެދު ފަސިންޖަރުން އުފުލަން ބޭނުންކުރާ ފެރީއެއްގެ ކޮންޓްރޯލެ ގެއްލިގެން ގޮސް ތޮށިގަނޑުގައި ޖެހި އޭގެން ދަތުރުކުރި 10 މީހަކަށް އެކިވަރުގެ އަނިޔާ ލިބިއްޖެ އެވެ.
އެ ހާދިސާ ހިނގާފައި ވަނީ މިއަދު ހެނދުނު 10:45 ހާއިރު، ކުޑަގިރިއަށް ފެރީ ކައިރިކުރި ވަގުތު ކަމަށް މި ނޫހަށް މައުލޫމާތު ދިން މީހުން ބުންޏެވެ. އެ ހާދިސާގައި ކުޑަކުއްޖެއްގެ ބޯ ވެސް ފަޅައިގެން ގޮސްފައިވާ ކަމަށް މި ނޫހަށް އެނގިފައިވެ އެވެ.
"ކުޑަގިރިއާ ފެރީ ގާތްކުރި ވަގުތު، އިންޖީނު ނިވިގެން ގޮސް ޖެޓީގައި ޖެހުނީ، ހައެއްކަ އަހަރުގެ ކުއްެޖެއްގެ ބޯ ވެސް ފަޅައިގެންދިޔަ،" އެ މީހާ ބުންޏެވެ.
ކުޑަގިރި އާއި މާލެއާ ދެމެދު ފެރީ ދަތުރުތައް ކުރަނީ ހައުސިން ޑިވެލޮޕްމެންޓް ކޯޕަރޭޝަން (ޢެޗްޑީސީ) އިންނެވެ. އެ ހާދިސާއާ ގުޅޭ މައުލޫމާތު ހޯދުމަށް އެޗްޑީސީއަށް ގުޅުމުން ފޯނަށް ޖަވާބުދީފައެއް ނުވެ އެވެ.
އެ ހާދިސާގައި އަނިޔާވި މީހުން މާލެ ގެނައީ އެޗްޑީސީގެ ލޯންޗެއްގައި ކަމަށް މި ނޫހަށް މައުލޫމާތު ދިން މީހުން ބުންޏެވެ. ނަމަވެސް، އަނިޔާވި މީހުންނަށް ފަރުވާދެމުން ދަނީ ކޮން ހޮސްޕިޓަލެއްގައި ކަމެއް ނޭނގެ އެވެ.
މި ނޫހަށް އެނގިފައިވާ ގޮތުގައި، ކުޑަގިރި އާއި މާލެއާ ދެމެދު ދަތުރުކުރުމަށް ބޭނުންކުރާ ފެރީތަކަށް މައްސަލަތައް ދިމާވާތާ އެތައް ދުވަހެއް ވަނީ ވެފަ އެވެ. މިއަދުގެ ހާދިސާ ހިނގާފައި ވަނީ އެ މައްސަލަތަކަށް ދާއިމީ ހައްލެއް ނުހޯދައި ގިނަ ދުވަސްވުމުން ކަމަށް މި ނޫހަށް މައުލޫމާތު ދިން މީހުން ބުންޏެވެ.
