ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) މުވައްޒަފުން ވަޒީފާގައި އުޅޭ ވަގުތު، އެ މީހުންގެ ދަރިން ބައިތިއްބާ އެ ކުންފުނީގެ 'ޗައިލްޑް ސްޕޭސް' ގައި މޯލްޑު ޖަހައި ވައިގެ ކޮލިޓީ ދަށްވުމުގެ ސަބަބުން ވަގުތީގޮތުން ބަންދުކޮށްފި އެވެ.
އެޗްޑީސީގެ ޖެނެރަލް އެޑްމިނިސްޓްރޭޝަނުން އެ ކުންފުނީގެ މުވައްޒަފުންނަށް ފޮނުވި މެއިލްއެއްގައި ބުނީ، ފެން ލީކުވުމުގެ ސަބަބުން އެ ކުންފުނީގެ ޗައިލްޑް ކެއާ ޔުނިޓުގައި އާންމު ސިއްހަތަށް ނުރައްކާވާ މިންވަރަށް ވައިގެ ތެތްކަން އިތުރުވެ ވައިގެ ކޮލިޓީ ދަށްވެފައިވާ ކަމަށެވެ. އެކަން ފާހަގަވީ މި މަހުގެ 1، އަދި 2، ގައި ކުރިއަށް ގެންދިޔަ އިންސްޕެކްޝަނަކުން ކަމަށް ވެސް އެ މެއިލްގައި ބުންޏެވެ.
"އަޅުގަނޑުމެންގެ ހޯދުންތަކުން ދައްކާ ގޮތުގައި، އެ ތަނުގައި ގިނަ ދުވަސްތަކެއް ވަންދެން ފެން ލީކުވަމުންދިޔުމުގެ ސަބަބުން، ވައިގެ ތެތްކަން ވަނީ މަތިވެފައެވެ. މީގެ އިތުރުން، ވައިގެ ފެންވަރު ދަށްވެފައިވާތީ، އެ ތަނުގައި މަސައްކަތްކުރާ މުވައްޒަފުންނާއި އެ ތަނުގެ ބޭނުންހިފާ ކުޑަކުދިންގެ ސިއްހަތަށް ނުރައްކާވުމުގެ ފުރުސަތު އޮތްކަން ފާހަގަކުރެވެއެވެ،" އެޗްޑީސީގެ ޖެނެރަލް އެޑްމިނިސްޓްރޭޝަން އިން ފޮނުވި މެއިލްގައި ބުނެފައިވެ އެވެ.
މަރާމާތު ނުކުރެވިގެން ޗައިލްޑް ކެއާ ޔުނިޓު މިހާރު ބަންދުކޮށްފައިވާއިރު، އެ ތަނުގައި މޯލްޑް ޖަހައި، ވައިގެ ފެންވަރު ދަށްވެފައި ވަނިކޮށް ވެސް އެ ކުންފުނީގެ މުވައްޒަފުންގެ ދަރިން ދިޔައީ އެ ތަނުގެ ބޭނުން ކުރަމުންނެވެ. އެހެންކަމުން، އެ ކުދިން ނުރައްކަލަށް ހުށަހެޅިފައި ހުންނާނެ ކަމަށް ބެލެވެ އެވެ.
އެކަމާ ބެހޭ ގޮތުން އަދަދު އަށް މައުލޫމާތު ދިން އެޗްޑީސީގެ މުވައްޒަފަކު ބުނީ ޗައިލްޑް ކެއާ ޔުނިޓުގެ ހާލަތު އެހާ ގޯސްވެގެންދިޔައިރު ވެސް މެނޭޖުމެންޓަށް ނޭނގުނީ، ކެމްޕޭން ތެރޭގައި މުވައްޒަފުން ވެއްދުމުގައި އަވަދިނެތި އުޅުމުގެ ސަބަބުން ކަމަށެވެ.
"މުވައްޒަފުން ވައްދާ ވައްދާ ގޮސްފައި ޑޭ ކެއާ ވެސް މަރާމާތު ނުވެ ހުރީ، އެންމެފަހުން އިންސްޕެކްޝަނަކުން އެނގުނީ، މިއީ ވަރަށް ކަންބޮޑުވާ މައްސަލައެއް، ހާއްސަކޮށް އެ ތަނަކީ ކުޑަކުދިން ބޭނުންކުރާ ތަނަކަށް ވާތީ، މި ތަނުގެ ސްޓާފްސްގެ ދަރިން،" ނަން ނުޖެހުމަށް ޝަރުތުކޮށް ވާހަކަދެއްކި އެ ކުންފުނީގެ މުވައްޒަފަކު ބުންޏެވެ.
އެޗްޑީސީގެ ޗައިލްޑް ކެއާ ޔުނިޓު އަލުން ހުޅުވޭނެ ތާރީހެއް އެ މެއިލްގައި ބުނެފައެއް ނުވެ އެވެ. ނަމަވެސް، ވީހާވެސް އަވަހަކަށް އެ ތަނުގެ ފެން ލީކުވުމުގެ މައްސަލައަށް ހައްލެއް ހޯދައި، މޯލްޑު ޖެހުމާއި ވައިގެ ފެންވަރު ރަނގަޅު ކުރުމަށްޓަކައި އެ ކުންފުނީގެ ޕްލޭނިން ޑިޕާޓުމެންޓާއެކު މަސައްކަތް ކުރާނެކަމަށް އެ މެއިލްގައި ބުނެފައިވެ އެވެ.
އެޗްޑީސީގެ ޗައިލްޑް ކެއާ ޔުނިޓަކީ އެ ކުންފުނީގެ މުވައްޒަފުން ވަޒީފާގައި އުޅޭ ވަގުތުތަކުގައި އެ މީހުންގެ ދަރިން ބަލަހައްޓައިދިނުމަށް މިދިޔަ ސަރުކާރުގެ ދުވަސްވަރު ހުޅުވި ތަނެކެވެ. އެތަން ހާއްސަކޮށްފައި ވަނީ އުމުރުން ތިން އަހަރާއި 10 އަހަރާއި ދެމެދުގެ ކުޑަކުދިންނަށެވެ. މިގޮތުން އެޗްޑީސީގެ މުވައްޒަފުންގެ ދަރިން، ދޮންދަރިން އަދި ގާނޫނީ ބެލެނިވެރިކަމުގެ ދަށުގައިވާ ކުޑަކުދިން އޮފީހުގެ މަސައްކަތު ގަޑީގައި އެތަނުގައި ބަލަހައްޓައިދެ އެވެ.
