ކްރޮސްރޯޑްސްގެ ސައި ލެގޫންގެ ވޯޓާވިލާއަކުން އޮސްޓްރޭލިއާ ފަތުރުވެރިއަކު ގެއްލިގެން، އޭނާ ހޯދުމުގެ މަސައްކަތް ކުރަމުން ދަނިކޮށް، މަރުވެފައިވާ ސަރަހައްދުގެ މޫދުން ފެިއްޖެ އެވެ.
އެ ފަތުރުވެރިޔާ ގެއްލިގެން އުޅޭ ކަމަށް އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރަށް ރިޕޯޓް ކުރީ މިއަދު ހެނދުނު 06:54 ހާއިރުއެވެ.
ކޯސްޓްގާޑުގެ ހާބާ ކްރާފްޓް ލޯންޗުގައި ޑައިވަރުންނާ އެކު އެ ސަރަހައްދަށް ދެވުނީ މިއަދު ހެނދުނު 08:02 ހާއިރު ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނި ގޮތުގައި ކޯސްޓްގާޑުގެ ސިފައިން އޭނާ ހޯދުމުގެ މަސައްކަތް ކުރަމުން ދަނިކޮށް އެ ފަތުރުވެރިޔާގެ ހަށިގަނޑު ފެނުނީ މިއަދު ހެނދުނު 09:36 ހާއިރު ކަމަށެވެ.
އެއީ ކްރޮސްރޯޑްގެ އިރުން 1.33 ނޯޓިކަލް މޭލް ބޭރުން ފަޅު ތެރެއިން ކަމަށް އެމްއެންޑީއެފުން ބުންޏެވެ.
އަދި، މިއަދު ހެނދުނު 09:47 ހާއިރު، ކޯސްޓްގާޑު ހާބާ ކްރާފްޓަށް އޭނާގެ ހަށިގަނޑު ނަގާފައިވާ ކަމަށާއި މިހާރު ކްރޮސްރޯޑަށް އޭނާގެ ހަށިގަނޑު ބާލާފައިވާ ކަމަށް އެމްއެންޑީއެފުން ބުންޏެވެ.
