ފުލުހުންނަށް ބޯހިޔާވަހިކަން ދޭން، މީގެ ނުވަ އަހަރު ކުރިން ފެށިގެން ހުޅުމާލޭގައި ހިންގަމުން އަންނަ ހައުސިން މަޝްރޫއުގައި ބޭ އިންސާފު ކަންތައްތަކެއް ހުރިކަން، ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒް ކޮމިޓީ (އެސްއޯއީ ކޮމިޓީ) ގެ ހޯދުންތަކުން އެނގިއްްޖެ އެވެ.
ސިފައިންނާ ފުލުހުންނަށް ބޯހިޔާވަހިކަން ދޭން ސިފައިންގެ ކޯޕަރޭޓިވް (ސިފްކޯ) އާއި ފުލުހުންގެ ކޯޕަރޭޓިވް (ޕޮލްކޯ) އިން ހިންގާ މަޝްރޫއުގެ ކަންތައްތައް އޮތް ގޮތް ބެލުމަށް ފަހު ރިޕޯޓް އެކުލަވައިލަން އެސްއޯއީ ކޮމިޓީން މިއަދު ބޭއްވި ބައްދަލުވުމުގައި، ހާމަކުރި މައުލޫމާތުތަކުން އެނގުނު ގޮތުގައި ފުލުހުންގެ ފްލެޓްތައް ހަދަން ކޮންޓްރެކްޓަރާ ހަވާލުކޮށްފައި ވަނީ އެކި ފުލުހުންނަށް ލިބޭ ފްލެޓް އެކި ފެންވަރަށް ހަދާ ގޮތަށެވެ. އެކަމަކު ފްލެޓްތައް ލިބޭ ފުލުހުން ދައްކަން ޖެހޭ އަގު އެއްވަރެވެ.
މިއަދުގެ ބައްދަލުވުމުގައި ކޮމިޓީ މުގައްރިރު އަދި ހުޅުދޫ ދާއިރާގެ އެމްޑީޕީ މެމްބަރު އިލްޔާސް ލަބީބު އިއްވެވި ޑްރާފްޓް ރިޕޯޓުގައިވާ ގޮތުން އެކި ފަންތީގެ ފުލުހުންނަށް ލިބޭ ފްލޭޓްތައް އެކި ފެންވަރަށް ތަރައްގީކުރާ ގޮތަށް އޮތުމަކީ އިސްރާފު ބޮޑު އަދި މަޝްރޫއު އަވަހަށް ނިންމަން އުނދަގޫވާ ސަބަބެއް ކަމަށެވެ. ޑްރާފްޓް ރިޕޯޓުގައިވާ ގޮތުން، ފެންވަރުގެ ގޮތުން ތަފާތުވާ ގޮތަށް ފްލެޓްތައް ހަދާތީ އެތަންތަނަށް ބޭނުންވާ މެޓީރިއަލް ހޯދަން ވެސް ވަނީ ދަތިވެފަ އެވެ.
އެކަން އިތުރަށް ތަފްސީލުކޮށްދެއްވަމުން އިލްޔާސް ވިދާޅުވީ ޕޮލްކޯ ފްލެޓްތަކުގެ މަސަައްކަތް ހަވާލުކޮށްފައި އޮތީ ބައެއް ފްލެޓްތަކުގައި އެހެން ފްލެޓްތަކާ ތަފާތު މުށްޓެއް ޖެހުން ފަދަ ގޮތް ގޮތުން، ފްލެޓްތައް "ކަސްޓަމައިޒް" ކުރާ ގޮތަށް ކަމަށެވެ.
"އަޅުގަނޑުމެނަށް ފާހަގަކުރެވުނީ ޕޮލްކޯގެ ބައެއް ފްލެޓްތަކުގައި ހުރޭ ވަކިި އެޕާޓްމަންޓެއް، ވަކި ނަމްބަރެއް، މިވެނި ފްލޯއެއްގައި ހުންނަ ވަކި އެޕާޓްމަންޓެއްގައި ވަކި ކުލައެއްގެ ޓައިލްސް، ދެން ފާހާނާގައި ވެސް ވަކި ޑިޒައިނެއްގެ ވަކި ޓައިލްސް. އެހެން ކަސްޓަމައިޒްކޮށްފައި އެކި އެކި އެޕާޓްމަންޓްތައް ހުރީ،" އިލްޔާސް ވިދާޅުވި އެވެ.
އެެެއް އަގެއްގައި ދޫކުރާ ފްލެޓްތަކެއް އެގޮތަށް ތަފާތު ފެންވަރުގައި ހަދާ ގޮތަށް ހުރިކަން އެނގިވަޑައިގެންނެވުމުން، ކޮމިޓީގެ މިއަދުގެ ބައްދަލުވުމުގައި ބައެއް މެމްބަރުން ކަންބޮޑުވުން ފާޅުކުރެއްވި އެވެ. އެގޮތަށް ކުރިއަށް ނުގެންދަން، ރިކޮމެންޑޭޝަނެއްގެ ގޮތުގައި ހިމަނަން ވެސް ބައެއް މެމްބަރުން ހުށަހެޅުއްވި އެވެ.
އެކަމާ މެދު ކަންބޮޑުވުން ފާޅުކުރައްވަމުން ފުވައްމުލަކު މެދު ދާއިރާގެ މެމްބަރު ހުސައިން މުހައްމަދު ދީދީ ވިދާޅުވީ އެކި ބޭފުޅުންނަށް އެކި ކުލައިން މުށި ޖެހުން ފަދަ ކަންތައްތަކުގެ ސަބަބުން، ފްލެޓްތައް ނުނިމި އަދިވެސް ދިގުލައިގެން ހިނގައިދާނެ ކަމަށެވެ.
"މިހާރު މިދާ ގޮތަށް، މި ޕްރޮޖެކްޓްގެ ކަންތައް ހިނގާފައިވާ ގޮތަށް ބަލާއިރު އަޅުގަނޑު ގަބޫލުކުރާ ގޮތުން ނަމަ މިވަނީ އިންސާފުން ބޭރުގައި، ބާރުގައި ތިބި ބަޔަކު އެ ބޭފުޅުން ބޭނުންވާ ގޮތަށް ކަންތައްތަކެއް ކުރުމަށް ޓަކައި ކަންތައްތަކެއް ހިންގާފައި. އެއީ ކޮސްޓް މި ބަހާލަނީ ހަމަ ފްލެޓް ލިބޭ ހުރިހާ ފަރާތްތަކަކަށް. އެ ރޭޓުން ބަހާލާފައި ދޭ އިރު ވަކި ބަޔަކަށް ވަކި މެޓީރިއަލްތަކެއް މިއީ އިންސާފެއް ނޫން ކަމަށް އަޅުގަނޑު ގަބޫލުކުރަނީ،" ހުސަައިން ވިދާޅުވި އެވެ.
ސިފައިންނާއި ފުލުހުންނަށް ބޯހިޔާވަހިކަން ދޭން ހިންގާ މަޝްރޫއުގެ ކަންތައްތައް ބަލަން ރައްޔިތުންގެ މަޖިލީހަށް ހުށަހެޅުއްވީ ދާންދޫ ދާއިރާގެ އެމްޑީޕީ މެމްބަރު ޔައުގޫބު އަބްދުﷲ އެވެ. އެ މައްސަލަ މަޖިލީހަށް ބަލައިގަނެ، އެސްއޯއީ ކޮމިޓީއަށް ފޮނުވުމުން، އެ ކޮމިޓީން ވަނީ ފުޅާ ދާއިރާއެއްގައި މައުލޫމާތު އެއްކުރުމުގެ އިތުރުން މަސައްކަތް ކުރިއަށްދާ ސަރަހައްދު ވެސް ބަލައިފަ އެވެ.
