އިސްތަންބޫލް (ޖޫން 13) - ތުރުކީގެ ސުޕަ ލީގުގައި ވާދަކުރަމުން އަންނަ ކްލަބް، ފާތިހު ކަރާގުމްރުކްއާ ހަވާލުވާން އިޓަލީގެ މަޝްހޫރު ތަރި އަންދްރެއާ ޕިރްލޯ ނިންމައިފި އެވެ.
ޕިރްލޯ، 43، ޕްރޮފެޝަނަލް ކޯޗިންގައި ޓީމެއްގެ ބެންޗުން ފެނިފައިވަނީ އެންމެ ސީޒަނެއްގަ އެވެ. އެ ގޮތުން ޔުވެންޓަސްގެ ކޯޗުކަމުގައި އެއް އަހަރު ހޭދަކުރުމަށް ފަހު 2021 ވަނަ އަހަރުގެ މެއި މަހު އެ ޓީމުގެ ކޯޗުގެ މަގާމުން ޕިރްލޯ ވަނީ ވަކިކޮށްފަ އެވެ. މިދިޔަ ސީޒަނުގައި ޕިރްލޯ ހުރީ އެއްވެސް ޓީމަކާ ހަވާލުނުވެ އެވެ.
އެކަމަކު، ތުރުކީގެ ފާތިހު ކަރާގުމްރުކުން އިއްޔެ އިއުލާނުކުރީ އެއް އަހަރު ދުވަހުގެ ކޮންޓްރެކްޓެއްގައި ޕިރްލޯ އެ ޓީމާ ހަވާލުވާން ނިންމާފައިވާ ކަމަށެވެ. އެ ކްލަބުން ބުނީ އަންނަ މަހުގެ އެއް ވަނަ ދުވަހުން ފެށިގެން ކްލަބްގެ މަސައްކަތަކާ ރަސްމީކޮށް ޕިރްލޯ ހަވާލުވާނެ ކަމަށެވެ.
ޔުވެންޓަސްގައި ހޭދަކުރި ސީޒަނުގައި ޕިރްލޯ ވަނީ އެ ޓީމަށް އިޓާލިއަން ކަޕާއި އިޓާލިއަން ސުޕަ ކަޕް ކާމިޔާބުކޮށްދީފަ އެވެ. ޕިރްލޯ އަށް ޔުވެންޓަސްގެ ކޯޗުކަން ގެއްލުނު އެންމެ ބޮޑު ސަބަބަކީ 2012 ވަނަ އަހަރަށް ފަހު ފުރަތަމަ ފަހަަރަށް ޔުވެންޓަސް އަށް އިޓާލިއަން ލީގު ނުލިބި ނިންމާލަން ޖެހުމާއި، ޗެމްޕިއަންސް ލީގުގައި ރަނގަޅު ނަތީޖާ އެއް ނެރެވިފައިނުވާތީ އެވެ.
އިޓަލީގެ ވަރުގަދަ ތިން ޓީމު ކަމަށްވާ، އޭސީ މިލާނާއި އިންޓަ މިލާން އަދި ޔުވެންޓަސް އަށް ކުޅެފައިވާ ޕިރްލޯ އަކީ ކާމިޔާބު ކުޅުންތެރިއެއް ނަމަވެސް ކޯޗިންގައި އަދި ފައިތިލަ ސާބިތެއްނުކުރެވެ އެވެ. އޭނާ މި ފަހަރު ހަވާލުވި ފާތިހު ކަރާގުމްރުކް އަކީ 1926 ވަނަ އަހަރު ވުޖޫދުވި ކްލަބް އެކެވެ. އެ ޓީމަށް ދުވަހަކު ވެސް ތުރުކީގެ ޗެމްޕިއަންކަން ލިބިފައިނުވާއިރު، އެންމެ ފަހުން ސީޒަނުގައި ނިންމާލީ އަށް ވަަނައިގަ އެވެ.
