ޓިއުރިން (މެއި 28) - ޔުވެންޓަސް ކޯޗުކަމުން ރަސްމީކޮށް މިއަދު އަންދްރެއާ ޕިރްލޯ އެއް އަހަރަށް ފަހު ވަކިކުރިއިރު، ވަރަށް އަވަހަށް އެ މަގާމާ ޔުވެންޓަސް އަށް ކުރިން ކޯޗު ކޮށްދިން މެސިމޯ އަލެގްރީ ހަވާލުވާނެ ކަމަށް އެ ކްލަބުގެ އޮފިޝަލުންނާ ހަވާލާދީ މީޑިއާ ތަކުން ރިޕޯޓްކޮށްފި އެވެ.
ޕިރްލޯ އެއް ސީޒަނަށް ފަހު ޔުވެންޓަސްގެ ކޯޗުކަމުން ވަކިކުރީ މި ފަހަރު އެ ޓީމަށް ނުވަ އަހަރަށް ފަހު އިޓާލިއަން ލީގު ގެއްލުމުގެ އިތުރުން ގަދަ ހަތަރެއްގެ ފުރުސަތު ވެސް ލިބުނީ އުނދަގުލުން ކަމަށްވާތީ އެވެ. ޕިރްލޯގެ ކޯޗުކަމުގައި އިޓާލިއަން ސުޕަ ކަޕް ޔުވެންޓަސް އިން ކާމިޔާބުކުރިއިރު، ދާދި ފަހުން އެ ޓީމުން އެޓަލަންޓާ ބަލިކޮށް އިޓާލިއަން ކަޕްގެ ތަށި އުފުލާލީ ޕިރްލޯގެ 42 ވަނަ އުފަން ދުވަހު އެވެ.
ޔުވެންްޓަަސްގެ ކޯޗުކަމާ މި ސީޒަނުގައި ޕިރްލޯ ހަވާލުވީ ކޯޗިންގެ މާ ބޮޑު ތަޖުރިބާއެއް ނެތި އެވެ. އޭނާގެ ރަސްމީ ފުރަތަމަ ކޯޗިން ވަޒީފާ ކަމަށްވާ ޔުވެންޓަސްގެ 23 އަހަރުން ދަށުގެ ޓީމުގެ ކޯޗުކަން ހަވާލުކުރިތާ 10 ދުވަސް ފަހުން ސީނިއާ ޓީމުން ފުރުސަތު ލިބުނީ އެވެ.
ޔުވެންޓަސް އިން ވަކިކުރުމުން ޕިރްލޯ އަންނަނީ އިޓާލިއަން ލީގުގެ ސަސުއޯލޯއާ ހަވާލުވާން އެ ޓީމާ މަޝްވަރާ ކުރަމުންނެވެ. ޕިރްލޯ ހޯދަން ލާޒިއޯ އާއި ނަޕޯލީން ވެސް ޝައުގުވެރިވެ އެެވެ. ލާޒިއޯގެ ކޯޗަކަށް ހުރި ސިމޯން އިންޒާގީ ވަނީ އެ ޓީމު ދޫކޮށް ލީގު ޗެމްޕިއަންކަން ހޯދި އިންޓަ މިލާނާ ހަވާލުވާން ނިންމައިފަ އެވެ. އިންޓަގެ ކޯޗުކަން އެންޓޯނިއޯ ކޮންޓޭ ވަނީ ދޫކޮށްލައިފަ އެވެ. އެއީ އެ ޓީމުގެ ވެރިންނާ އުފެދުނު ހިޔާލުތަފާތުވުން ތަކެއްގެ ތެރެއިންނެވެ.
އުމުރުން 53 އަހަރުގެ އަލެގްރީ އަކީ ރެއާލް މެޑްރިޑްގެ ކޯޗުކަމަށް ގެންނަން އެ ޓީމުން ބޭނުންވި ކޯޗެވެ. ރެއާލްގެ ކޯޗަކަށް ހުރި ޒިނެދިން ޒިދާން ވަނީ މި ސީޒަނަށް ފަހު އެ ޓީމު ދޫކޮށްލައިފަ އެވެ.
އަލެގްރީ ޔުވެންޓަސް ކޯޗުކަމުން ވަކިވީ 2019 ވަނަ އަހަރު އެވެ. އޭގެ ފަހުން އޭނާ ޓީމަކާ ހަވާލެއް ނުވެ އެވެ. ކުރިން އޭސީ މިލާނަށް ވެސް ކޯޗުކޮށްދިން އަލެގްރީ އަށް ކޯޗިން ވަޒީފާއެއް ނެތި ހޭދަކުރި މި ދެ އަހަރު ގިނަ ޓީމުތަކެއްގެ ހުށަހެޅުން ވަނީ ލިބިފަ އެވެ. އޭގެ ތެރޭގައި ޗެލްސީ އާއި އާސެނަލް ހިމެނެ އެވެ.
ފަސް އަހަރު ޔުވެންޓަސްގެ ކޯޗުކަން ކުރިއިރު، އަލެގްރީ ވަނީ އެ ޓީމާ އެކު އެގާރަ ތަށި އުފުލާލައިފަ އެވެ. އޭގެ ތެެރެއިން ފަސް ތަށްޓަކީ އިޓާލިއަން ލީގެވެ. އަލެގްރީގެ ކޯޗުކަމުގައި ޔުވެންޓަސް ވަނީ ދެ ފަަަހަރު ޗެމްޕިއަންސް ލީގުގެ ފައިނަލުން ބަލިވެފަ އެވެ. އެއީ 2015 އާއި 2017 ވަނަ އަހަރު އެވެ.
އަލެގްރީ ޔުވެންޓަސް ދޫކޮށްލި ފަހުން އެ ޓީމަށް ޗެމްޕިއަންސް ލީގުގެ ފައިނަލުން ފުރުސަތެއް ނުލިބެ އެވެ. ޕިރްލޯ އަކީ އަލެގްރީ ވަކިވި ފަހުން ޔުވެންޓަސް އިން ވަކިކުރި ދެ ވަަނަ ކޯޗެވެ. ޕިރްލޯގެ ކުރިން ޔުވެންޓަސްގެ ކޯޗަކަށް ހުރީ މައުރީޒިއޯ ސާރީ އެވެ.
