ޓިއުރިން (މެއި 10) - ދިހަ އަހަރު ތެރޭ ފުރަތަމަ ފަހަރަށް އިޓާލިއަން ލީގު ތަށި ގެއްލުމުގެ އިތުރުން މި ފަހަރު ލީގުގެ ގަދަ ހަތަރެއްގައި ނިންމައި އަންނަ ސީޒަނުގެ ޗެމްޕިއަންސް ލީގުން ފުރުސަތު ނުލިބުމުގެ ބިރު ބޮޑުވެފައިވީ ނަމަވެސް ޔުވެންޓަސްގެ ކޯޗުކަމުން އިސްތިއުފާ ނުދޭނެ ކަމަށް އެ ޓީމުގެ ކޯޗު އަންދްރެއާ ޕިރްލޯ ބުނެފި އެވެ.
ލީގުގައި ރޭ ޔުވެންޓަސް ވަނީ ވާދަވެރި އޭސީ މިލާން އަތުން 3-0 އިން ބަލިވެފަ އެވެ. ރޭގެ މެޗުގެ ނަތީޖާ އަށް ފަހު ލީގުގެ ފަހު ތިން މެޗާ ޔުވެންޓަސް އިން ކުރިމަތިލާއިރު، އެ ޓީމު އޮތީ ލީގުގެ ފަސް ވަނައިގަ އެވެ.
ލީގު ޗެމްޕިއަންކަން ޔަގީންކޮށްފައިވާ އިންޓަ މިލާން އެއް ވަނައިގައި އޮތީ 35 މެޗުން 85 ޕޮއިންޓް ހޯދައިގެންނެވެ. ދެ ވަނައިގައި އޮތް އެޓަލަންޓާ އާއި ތިން ވަނައިގައި އޮތް މިލާނަށް 35 މެޗުން 72 ޕޮއިންޓް ލިބިފައިވާއިރު، އެޓަލަންޓާ އަށް ކުރި ލިބެނީ ހެޑް ޓު ހެޑް ގަވާއިދުންނެވެ. ނަޕޯލީ ހަަތަރެއްގައި އޮތީ 35 މެޗުން 70 ޕޮއިންޓާ އެކު އެވެ. ފަސް ވަނައިގައި އޮތް ޔުވެންޓަސް އަށް 35 މެޗުން ވަނީ 69 ޕޮއިންޓް ލިބިފަ އެވެ.
ޔުވެންްޓަަސްގެ ކޯޗުކަމާ މި ސީޒަނުގައި ޕިރްލޯ ހަވާލުވީ ކޯޗިންގެ މާ ބޮޑު ތަޖުރިބާއެއް ނެތި އެވެ. އޭނާގެ ރަސްމީ ފުރަތަމަ ކޯޗިން ވަޒީފާ ކަމަށްވާ ޔުވެންޓަސްގެ 23 އަހަރުން ދަށުގެ ޓީމުގެ ކޯޗުކަން ހަވާލުކުރިތާ 10 ދުވަސް ފަހުން ސީނިއާ ޓީމުން ފުރުސަތު ލިބުނީ އެވެ. ޔުވެންޓަސްގެ ނަތީޖާތައް މި ސީޒަނުގައި ދަށްވެފައިވާއިރު، ޕިރްލޯ މި ސީޒަން ނިމުމުން މަގާމުން ވަކިކުރާނެ ކަމަށް އިޓަލީ މީޑިއާ ރިޕޯޓްތައް ބުނެ އެވެ.
"އަހަރެން މި ވަޒީފާއާ ހަވާލުވީ ވަރަށް ޝައުގުވެރިކަމާ އެކު މަސައްކަތްތަކެއް ކުރަން ބޭނުންވާތީ. މިއީ އުނދަގޫވާނެ ވަޒީފާއެއް ކަން ވެސް އެނގިހުރެ ހަވާލުވީ. އަހަރެން މި ހުރީ މިކަން ކުރިއަށް ގެންދަން. އިސްތިއުފާ ދީފައި މަސައްކަތް ހުއްޓާލާފައި ނުދާނަން،" ފުޓްބޯލް އިޓާލިއާ އަށް ދިން އިންޓަވިއުއެއްގައި ޕިރްލޯ ބުންޏެވެ.
"މި ޓީމު ގޮވައިގެން ކުރިއަށް ދެވޭނެ ގާބިލުކަން އަހަރެންގެ އެބަހުރި. އެކަަމަކު ކޮންމެ ކަމަކަށް ވެސް ވަގުތު ބޭނުންވާނެ،"
ރިޕޯޓްތައް ބުނާގޮތުން ޔުވެންޓަަސްގެ ވިސްނުމަކީ މި ސީޒަނަށް ފަހު ރެއާލްގެ ކޯޗަކަށް ހުރި ޒިނެދިން ޒިދާން ނޫނީ ޔުވެންޓަސް އަށް ކުރިން ކޯޗުކޮށްދިން މެސިމޯ އަލްގެރީއާ ޓީމު ހަވާލުކުރާށެވެ. ޕިރްލޯއާ އެކު ކުރިއަށްދާން ޔުވެންޓަސްގެ ބޯޑުގެ ވިސްނުން އޮތީ ދެކަފިވެފަ އެވެ.
ޕިރްލޯއާ ޔުވެންޓަސްގެ ކޯޗުކަން ހަވާލުކުރީ މައުރީޒިއޯ ސާރީ މަގާމުން ވަކިކުރުމަށް ފަހު އެވެ.
ޔުވެންޓަސް އިން އެންމެ ބޮޑަށް ޓާގެޓްކުރަނީ އަލުން ޗެމްޕިއަންސް ލީގެއް ހޯދުމަށެވެ. ފަަހަކަށް އައިސް އިޓާލިއަން ލީގު ދިފާއު ކުރެވުނު ނަމަވެސް ޔުވެންޓަސް އިން ކޯޗުން ބަދަލުކުރި އެންމެ ބޮޑު ސަބަބަކީ ވެސް ޗެމްޕިއަންސް ލީގުގެ ނަތީޖާތަކަށް ބެލުމަށް ފަހު އެވެ. ޔުވެންޓަސް އިން އެންމެ ފަހުން ޗެމްޕިއަންސް ލީގު ކާމިޔާބުކުރީ 1996 ވަނަ އަހަރު އެވެ.
