އިންޑިއާގެ ވެރިކަންކުރާ ޕާޓީ، ބީޖޭޕީގެ ތަރުޖަމާން، ކީރިތި ރަސޫލާ އަދި ކީރިތި ގުރުއާނަށް ފުރައްސާރަކުރި މައްސަލާގައި ކީރިތި ރަސޫލާގެ ދިފާއުގައި ގިނަ އަދަދެއްގެ ދިވެހިން އަޑުއުފުލައިފި އެވެ.
އިންޑިއާގެ ޓީވީ ޗެނަލެއްގައި ދެއްކި ޕްރޮގްރާމެއްގައި ރަސޫލާއަށް ފުރައްސާރަކޮށް ވާހަކަ ދައްކާފައިވަނީ ބީޖޭޕީގެ ނޭޝަނަލް ސްޕޯކްސްޕާސަން ނުޕުރް ޝަރުމާ އާއި ނިއުދިއްލީގައި ހުނަން ބީޖޭޕީ ޕާޓީގެ މީޑިއާ އިންޗާޖް ނަވީން ކުމާރެވެ. އެމީހުން ދެއްކި ވާހަކަތައް ހޫނުވެ, އިސްލާމީ ގައުމުތަކުގައި އަންނަނީ ނުރުހުން ފާޅުކުރަމުންނެވެ.
އެގޮތުން، މިއަދު ހަވީރު ގިނަ އަދަދެއްގެ ދިވެހިން ވެސް ވަނީ ކީރިތި ރަސޫލާގެ ދިފާއުގައި އަޑުއުފުލައި ހާއްސަ ސައިކަލު ބުރެއް ބާއްވާފަ އެވެ. މި ސައިކަލު ބުރުގައި ވަނީ އެ އަމަލު ކުށްވެރިކޮށް ވަރަށް ބޮޑަށް ނުރުހުން ފާޅުކޮށްފަ އެވެ.
މި ސައިކަލު ބުރުގައި ބައިވެރިވި މީހުން ތިބީ އެފަދަ ޝުއޫރުތައް ހިމެނޭ ބޯޑުތައް ވެސް ހިފައިގެންނެވެ. ސައިކަލު ބުރު ކުރިއަށްގެންދިޔައީ ރަސްފަންނުން އުސްފަސްގަނޑު ސަރަހައްދަށެވެ.
ދިވެހި ސަރުކާރުގެ ފަރާތުންނާއި ރާއްޖޭގެ ގިނަ ސިޔާސީ ޕާޓީތަކުން ވެސް ވަނީ މިކަން ކުށްވެރިކޮށްފަ އެވެ.
ފޮރިން މިނިސްޓްރީން ނެރުނު ކުރު ބަޔާނެއްގައި ބުނީ އިސްލާމްދީނުގެ ހަގީގީ އުސޫލުތައް ދަށްކޮށްލުމުގެ ހުރިހާ އަމަލަކާއި ރަސޫލާގެ ދަރަޖަ ދަށްކޮށްލަން ކުރާ ކޮންމެ މަސައްކަތެއް އެއްވެސް ހިފެހެއްޓުމެެއް ނެތި ކުށްވެރިކުރާ ކަމަށެވެ.
އިންޑިއާގެ ބީޖޭޕީގެ އޮފިޝަލް ދެއްކި ވާހަކައާ މެދު ވަރަށް ބޮޑަށް ކަންބޮޑުވާ ކަމަށް ވެސް އެ ބަޔާނުގައި ބުންޏެވެ.
އިސްލާމީ ގައުމުތަކުން ނުރުހުން ފާޅުކުރަން ފެށުމުން ބީޖޭޕީއިން ވަނީ ދެ މީހުންނާމެދު ފިޔަވަޅު އަޅާފަ އެވެ. އެގޮތުން, ނުޕުރް ޝަރުމާ ޕާޓީގެ ހަރަކާތްތަކުން ސަސްޕެންޑްކޮށް, ނަވީން ކުމާރު ވަނީ ޕާޓީން ވަކިކޮށްފަ އެވެ.
