ދެވަނަ ދައުރަކަށް ވާދަކުރެއްވުމުގެ ޝައުގުވެރިކަން ރައީސް އިބްރާހިމް މުހައްމަދު ސޯލިހު ފާޅުކުރެއްވުމާ ގުޅިގެން، މިއީ "އަމިއްލަ އުއްމީދު އިސްކޮށް ވެރިކަމަށް ފައިނަގަންވީ ވަގުތެއް ނޫން" ކަމަށް ވިދާޅުވެ ރައީސްގެ ނިންމެވުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފާޑުވިދާޅުވެއްޖެ އެވެ.
ރައީސް ނަޝީދުގެ ރަސްމީ ސޯޝަލް މީޑިއާތަކުގައި ހިއްސާކުރެއްވި މެސެޖެއްގައި ސީދާ ރައީސް ސޯލިހުގެ ނަންފުޅު ބަޔާންކުރައްވާފައި ނެތް ނަމަވެސް، ޓްވީޓު ކުރައްވަނީ ވަރަށް ގިނަ ބޭފުޅުން "ޓެކްސް ކުރައްވާތީ" ކަމަށް ވިދާޅުވި އެވެ.
ރާއްޖެއަށް ކުރިމަތިވެދާނެ ކަމަށް ބުނާ އިގުތިސޯދީ ފިއްތުންތަކާ ގުޅުވައި ޓްވީޓުގައި ނަޝީދު އިތުރަށް ވިދާޅުވީ "މިއީ ބޭރު ފައިސާގެ ރިޒާވް ރަނގަޅުކޮށް ރައްޔިތުންގެ ސަލާމަތްތެރިކަން ދެމެހެއްޓޭނެ ގޮތާމެދު ވިސްނާ މަގަށް އަޅުވަންވީ ވަގުތު" އެވެ.
ގިނަ ދުވަސްތަކަކަށް ފަހު ފުރަތަމަ ފަހަރަށް ނޫސްވެރިންނާ ބައްދަލުކުރައްވާ، ދެވަނަ ދައުރަކަށް ވާދަކުރެއްވުމުގެ ޝައުގުވެރިކަން ފުރަތަަމަ ފަހަރަށް ރައީސް ސޯލިހު ފާޅުކުރައްވާފައިވާއިރު، ނަޝީދު ވެސް ވަނީ އަންނަ ރިޔާސީ އިންތިހާބުގައި ވާދަކުރައްވާނެ ކަން އިއުލާނުކުރައްވާފަ އެވެ.
ނޫސްވެރިންގެ ބައްދަލުވުމުގައި އެކަމަށް އިޝާރާތް ކުރައްވަމުން ރައީސް ސޯލިހު ވިދާޅުވީ، އަންނަ ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރާނެ ކެނޑިޑޭޓު ކަނޑައަޅާނީ ޕާޓީގެ ކޮންގްރެސްއިން ކަމަށެވެ.
