ރާއްޖޭގައި ހިންގާ ސިޔާސީ ޕާޓީތަކުން މެމްބަރުން އިތުރުކުރަން ސައްހަ ނޫން ފޯމު ހުށަހަޅާ މައްސަލަ ބޮޑުވެފައިވާތީ، އެކަމާ ގުޅޭ ޝަކުވާތައް ހުށަހެޅުމުގެ ފުރުސަތު އާންމުކޮށް މިހާރު ހުޅުވާލާފައިވާ ކަމަށް އިލެކްޝަންސް ކޮމިޝަނުން މިއަދު ބުނެފި އެވެ.
ޕާޓީއަކުން ހުށަހަޅާފައިވާ ސައްހަ ނޫން ކޮންމެ ފޯމަކަށް، ޕާޓީ 10،000ރ. އިން ޖޫރިމަނާ ކުރަން ކޮމިޝަނުން ވަނީ އިއްޔެ ނިންމާފަ އެވެ. ޕާޓީ ޖޫރިމަނާ ކުރުމުގެ އިތުރުން، ޕާޓީން ހުށަހަޅާ ސައްހަ ނޫން ކޮންމެ ފޯމަކަށް ޕާޓީގެ ރަޖިސްޓްރާ ވެސް ޖޫރިމަނާ ކުރަން ނިންމާފައިވެ އެވެ.
"އެފަދަ ކޮންމެ ޝަކުވާއެއް ބެލުމަށްފަހު އެކަންކުރި ފަރާތަކާމެދު އެއްވެސް އިސްތިސްނާއެއްނެތި ގާނޫނީ ފިޔަވަޅު އެޅުމަށް ކޮމިޝަނުން ވަނީ ނިންމަވާފައި،" އީސީން ބުންޏެވެ.
ޕާޓީތަކުގެ އިތުރުން ވަގު ފޯމު މައްސަލައިގައި ޕާޓީގެ ރަޖިސްޓްރާ ފުރަތަމަ ފަހަރު 5،000ރ. އިން އަދި އޭގެ ފަހުން 10،000ރ.އިން ޖޫރިމަނާކުރަން ކޮމިޝަނުން ވަނީ ނިންމާފަ އެވެ.
މީހުންނަަށް ނޭނގި ޕާޓީތަކަށް ވެއްދުމުގެ ބޮޑެތި މައްސަލަތަކެއް މިހާރު ވަނީ ފެންމަތިވެފަ އެވެ.
އެމްޑީޕީގެ ޕާލަމެންޓްރީ ގްރޫޕްގެ ބައެއް މެމްބަރުން އިލެކްޝަންސް ކޮމިޝަނުގެ ދަފްތަރުގައި އެ ޕާޓީގެ މެމްބަރުންގެ ގޮތުގައި ލިސްޓްކޮށްފައި ނެތްކަން މި ހަފްތާގެ ތެރޭގައި ވަނީ އެނގިފަ އެވެ. އޭގެ ތެރެއިން އެެއް ބޭފުޅަކީ ވައިކަރަދޫ ދާއިރާގެ މެމްބަރު ހުސައިން ޒިޔާދު (ފިއްޓޭ) އެވެ. އީސީގެ ދަފްތަރުގައި އޭނާގެ ނަން އޮތީ މޯލްޑިވްސް ނެޝަނަލް ޕާޓީ (އެމްއެންޕީ)ގެ މެމްބަރެއްގެ ގޮތުގަ އެވެ.
އެމްއެންޕީއަށް ވަގަށް މީހުން ވައްދާފައިވާ ކަމަށް މޯލްޑިވްސް ރިފޯމް މޫވްމަންޓް (އެމްއާރުއެމް)އިން ވެސް މީގެ ކުރިން ވަނީ ތުހުމަތުކޮށްފަ އެވެ.
