މިހާރު ކުރިއަށްދާ ނު ވަނަ އިންޓަ އޮފީސް ބިލިއާޑް މުބާރާތުގެ އަންހެން ސިންގަލްސް ޗެމްޕިއަންކަން ޖެހިޖެހިގެން ތިން ފަހަރު ހޯދައި، ކަސްޓަމްސް ރެކްރިއޭޝަން ކްލަބްގެ އާމިނަތު ހަލީމް (ދިލް) މިލްކު ކުރިއިރު، ފިރިހެން ސިންގަލްސް ޗެމްޕިއަންކަން، މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ މުހައްމަދު ދުންޔާޒް ވަނީ ހޯދައިފި އެވެ.
މިދިޔަ ހޯމަ ދުވަހު ފެށި އިންޓަ އޮފީސް ބިލިއާޑް މުބާރާތުގެ ފިރިހެން ބައިގައި 15 އޮފީހަކުން އަދި އަންހެން ބައިގައި ފަސް އޮފީހަކުން މި ފަހަރު ވާދަކުރެ އެވެ. ފިރިހެން ސިންގަލްސް ކެޓަގަރީގައި 75 ކުޅުންތެރިން އަދި އަންހެން ސިންގަލްސް ކެޓަގަރީގައި ނުވަ ކުޅުންތެރިއަކު ވަނީ ވާދަކޮށްފަ އެވެ.
މިދިޔަ ހޯމަ ދުވަހު ފެށި ސިންގަލްސް އިވެންޓަސް ބަލާއިރު، އަންހެން ބައިގެ ޗެމްޕިއަންކަން ކަސްޓަމްސްގެ ދިލް ހޯދީ ފައިނަލުގައި ދިރާގުގެ އާމިނަތު ލީނާ ބަލިކޮށްގެންނެވެ. މިއީ ދިލް އޮފީސް މުބާރާތުގެ އަންހެން ސިންގަލްސް ޗެމްޕިއަންކަން ޖެހިޖެހިގެން ހޯދި ތިން ވަނަ ފަހަރެވެ.
ފިރިހެން ސިންގަލްސް މެޗެއްގެ ތެރެއިން ދުންޏާޒު ބޯޅަ ފޮނުވާލަނީ.-- ފޮޓޯ: އެމްޕީބީއޭ
ފިރިހެން ސިންގަލްސް އަށް ބަލާލާއިރު، އެމްޕީއެލްގެ ދުންޔާޒު މި ބައިގެ ޗެމްޕިއަންކަން ހޯދީ ފައިނަލުގައި އެމްޑަބްލިއުއެސްސީ އަލީ ނިމާލް ބަލިކޮށްގެންނެވެ. ފޯރިގަދަ ފިރިހެން ސިންގަލްސް އިވެންޓުގައި ފެނުނީ ފެންވަރުގެ ގޮތުން ބަލާއިރު ވެސް ވަރަށް ވާދަވެރި އަދި ފޯރިގަދަ މެޗުތަކެކެވެ.
މުބާރާތުގެ އެންމެ ފޯރިގަދަ އިވެންޓު ކަމަށްވާ ޓީމް އިވެންޓުގެ މެޗުތައް ފެށުމަށް ހަމަޖެހިފައިވަނީ މާދަމާ އެވެ. ޓީމް އިވެންޓުގެ ފައިނަލް މެޗު އޮންނާނީ މިިމަހުގެ 10 ވަނަ ދުވަހުގެ ހަވީރެވެ.
މިފަހަރުގެ އިންޓަ އޮފީސް ބިލިއާޑް މުބާރާތަކީ ފެންވަރުގެ ގޮތުން ބަލާއިރު، މިހާތަނަށް ކުޅޭވޭ އެންމެ ފޯރިގަދަ އަދި އެންމެ ވާދަވެރި މުބާރާތަށް ވާނެކަމަށް ބިލިއާޑް އެސޯސިއޭޝަނުން މައުލޫމާތު ދެ އެވެ.
