ލަންޑަން (އޮކްޓޫބަރު 17) - އިނގިރޭސި ޕްރިމިއާ ލީގުގައި މިރޭ ލިވަޕޫލާއި ޗެލްސީން ކުޅުނު މެޗުތަކުން މޮޅުވިއިރު، މެންޗެސްޓާ ސިޓީއާ އެކު އެ ޓީމުގެ ކޯޗު، އެންޒޯ މަރެސްކާ، ލީގުގައި ރެކޯޑެއް ގާއިމްކޮށްފި އެވެ.
އެވަޓަން ދަނޑުގައި ޗެލްސީ މޮޅުވީ ޕެޑްރޯ ނެޓޯ ޖެހި ދެ ގޯލުން 2-0 އިންނެވެ. ދެ ކުޅުންތެރިން މަދުކޮށް މެޗު ނިންމާލި ބްރެންޓްފޯޑް އަތުން ލިވަޕޫލް ވަނީ ފަހަތުން އަރައި 2-1 އިން މޮޅުވެފަ އެވެ. މިއީ، މި ފަހަރުގެ ލީގު ސީޒަނުގައި އެވަޓަން އާއި ބްރެންޓްފޯޑް ބަލިވި ފުަރަތަމަ މެޗުތަކެވެ.
މި ސީޒަނުގައި ސިޓީއާ ހަވާލުވި މަރެސްކާ ވަނީ މިރޭ އަމިއްލަ ދަނޑުގައި ސިޓީ އަށް 3-2 އިން އިޕްސްވިޗް ޓައުން އަތުން މޮޅެއް ހޯދައިދީފަ އެވެ. މިއާ އެކު، މަރެސްކާ ވެފައިވަނީ، ޓީމަކާ ހަވާލުވެ، އާ ސީޒަނެއްގައި ލީގުގެ ފުރަތަމަ ހަތް މެޗުން މޮޅުވި ފުރަތަމަ ކޯޗަށެވެ.
އެވަޓަން ދަނޑުގައި ކުޅުނު މެޗުގައި ޗެލްސީގެ ކީޕަރު، އެމިލިއާނޯ މާޓިނޭޒަށް ލިބުނު ސީރިއަސް އަނިޔާއަކާ ހެދި، ސްޓްރެޗަރުގައި ދަނޑުން ބޭލިއިރު، ވަގުތުން ހޮސްޕިޓަލަށް ގެންދިޔަ އެވެ. ޗެލްސީން މި މެޗުގައި އެވަޓަން އަތުން މޮޅުވިއިރު ލަނޑުތައް ޖެހީ ދެ ވަނަ ހާފުގެ ކުރީކޮޅާއި ފަހުކޮޅުގަ އެވެ.
ބްރެންޓްފޯޑް ދަނޑުގައި އެ ޓީމުން، ކީން ލެވިސް ޕޮޓާ ބޮލުން ޖެހި ގޯލުން ލީޑުނަގާފައިވަނިކޮށް، އެ ޓީމުގެ ޔެހޯ ޔަރްމޮލަކަށް ވަނީ ރަތެއް ދައްކައިފަ އެވެ. ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިގައި ޔަރްމޮލަކް އަށް ރަތެއް ދެއްކީ، ބޯޅަ ނެތިސް ލިވަޕޫލްގެ ޖެރެމީ ޖަކޭ އަށް ފައުލުކުރުމުންނެވެ.
ލިވަޕޫލުން ދެ ވަނަ ހާފުގައި ނަތީޖާ ހަމަހަމަކުރީ ޑެނިއަލް މުނޯޒް ޖެހި ގޯލުންނެވެ. އަދި، ފުރަތަމަ ހާފުގައި ލަނޑު ޖަހަން ލިބުނު ރަނުގެ ފުރުސަތެއް ނަގާލި ބްރެޑްލީ ބާކޮލާ ތަނަވަސްކޮށްދިން ފުރުސަތަކުން ލިވަޕޫލް މޮޅުވި ލަނޑު ޖެހީ އަނިޔާ އިން ރަނގަޅުވެ، މި މެޗުގައި ކުޅުނު އަލެކްސަންޑަ އިސާކް އެވެ. ލިވަޕޫލުން ތިން ވަނަ ލަނޑެއް ޖެހޭތޯ ގިނަ މަސައްކަތްތަކެއް ކުރި މި މެޗުގައި ބްރެންޓްފޯޑްގެ ކެޕްޓަން، ވައިޓާލީ ޔަނެލްޓް އަށް ވަނީ ދެ ވަނަ ރީނދޫ ކާޑާ އެކު ރަތެއް ދައްކައިފަ އެވެ.
ސިޓީން އަމިއްލަ ދަނޑުގައި ލީޑުނެގީ ޖެރެމީ ޑޮކޫ ދިން ބޯޅައަކުން ފިލް ފޯޑެން ޖެހި ލަނޑުންނެވެ. އެކަމަކު، އިޕްސްވިޗްގެ ޑައެޒަން މައޭޑާ ވަނީ ލަނޑު ޖަހައި އެ ޓީމަށް އެއްވަރުކޮށްދީފަ އެވެ. އާލިން ބްރައުޓް ހާލަންޑް އެ ފަހުން ދެ ލަނޑު ޖަހައި، ސިޓީ އަށް ރަނގަޅު ލީޑެއް ނަގައިދިނެވެ. އެކަމަކު، ސިޓީގެ މާކް ގޭހީ ކުރި ފައުލަކަށް ދިން ޕެނަލްޓީ އަކުން އިޕްސްވިޗުން ވަނީ މެޗު ނިމެން ކުޑަވަގުުތުކޮޅަަކަށް ވެފައިވަނިކޮށް ދެ ވަނަ ލަނޑު ޖަހައިފަ އެވެ. މި ލަނޑު ޖަހައިދިނީ، ޒިއާން ފްލެމިން އެވެ.
ލީގުގައި މިރޭ ފުލަމް އިން ވަނީ 1-0 އިން ހަލް ސިޓީ ބަލިކޮށްފަ އެވެ. މިއީ، އަލްވާރޯ އާބެލޯއާ ކޯޗުކޮށްދޭ ފުލަމް އިން މި ފަހަރުގެ ލީގުގައި މޮޅުވި ފުރަތަމަ މެޗެވެ.
