މިއުނިކް (އޮކްޓޫބަރު 17) - ޖަރުމަނު ލީގުގައި މިރޭ އާރްބީ ލައިޕްޒިގު އަތުން 6-1 ގެ ބޮޑު ތަފާތަކުން މޮޅުވެ، ބަޔާން މިއުނިކުން ޖަރުމަނު ބުންޑަސްލީގާގެ ތާވަލުގެ ކުރިއަށް ޖެހިލައިފި އެވެ.
ލީގުގައި މިދިޔަ ހަފްތާގައި އެއް ވަނަ އަށް އަރަން ލިބުނު ފުރުސަތު ބަޔާނުން ނަގާލީ އޮއުގްސްބާގާ އެއްވަރުވެގެންނެވެ. އެކަމަކު، މި ހަފްތާގައި ބަޔާނުން މި ވަނީ ތާވަލުގެ ކުރިއަށް ޖެހިލަން ލިބުނު ފުރުސަތުގެ ބޭނުން ފުރިހަމަ އަށް ހިފައިފަ އެެވެ.
ކުރިން އެއް ވަނަ މަގާމުގައި އޮތް، ބޮރޫޝިއާ ޑޯޓްމަންޑުން މިރޭ ކުޅުނު މެޗުގައި ވަނީ ޔޫނިއަން ބާލިންއާ ލަނޑެއް ނުޖެހި 0-0 އިން އެއްވަރުވެފަ އެވެ. ބަޔާނުން އެއް ވަނަ އަށް އެރީ ޑޯޓްމަންޑާ އެއްވަރަށް ޕޮއިންޓް ހޯދި ނަމަވެސް ހެޑް ޓު ހެޑްގެ ތަފާތުން ކުރި ލިބޭތީ އެވެ. ބަޔާނާއި ޑޯޓްމަންޑަށް ވެސް ހަ މެޗުން ލިބުނީ 14 ޕޮއިންޓެވެ. ބަޔާންގެ ފައިދާ ގޯލު 18 އޮތްއިރު، ޑޯޓްމަންޑަށް ލިބެނީ، ހަތެކެވެ.
ބަޔާން ދަނޑުގައި މިރޭ ކުޅުނު މެޗުގައި އެ ޓީމުގެ ތަރި އަކީ ކޮލަމްބިއާގެ ފޯވާޑް، ލުއިސް ޑިއާޒް އެވެ. ޑިއާޒް ވަނީ މި މެޗުގައި ހެޓްރިކެއް ހަދައިފަ އެވެ. މިރޭގެ މެޗާ ހަމައަށް ޑިއާޒް މި ސީޒަނުގައި ޖެހީ އެންމެ ދެ ގޯލެވެ. އެކަމަކު، މި މެޗުގައި ހެޓްރިކެއް ހެދި އެވެ.
މި ފަހަރުގެ ސީޒަން އާދައިގެ ފޯމެއްގައި ފެށި ޑިއާޒަށް މި މެޗުގައި ދެއްކުނު ކުޅުމާ އެކު ގެއްލިފައިވާ ކޮންފިޑެންސްގައި އަލުން ކުޅެލަން ފުރުސަތު ފަހިވާނެ އެވެ. މިއީ، ބަޔާނަށް ބަދަލުވި ފަހުން ޑިއާޒްގެ ދެ ވަަނަ ހެޓްރިކް އެވެ. އޭނާ ވަނީ މި އަހަރު ފެބްރުއަރީ މަހު، ހޮފެންހައިމް ކޮޅަށް ވެސް ހެޓްރިކެއް ހަދައިފަ އެެވެ.
ލައިޕްޒިގު ކޮޅަށް މިރޭ ބަޔާނުން އަނެއް ލަނޑުތައް ޖެހީ، ހެރީ ކޭން އާއި އަލެކްސަންޑަ ޕަވްލޮވިޗް އަދި މައިކަލް އޮލީސޭ އެވެ.
ލައިޕްޒިގުން މެޗުގައި ލަނޑެއް ޖެހޭތޯ ކުރަމުން ދިޔަ މަސައްކަތް ކާމިޔާބުވީ މެޗުގެ އިތުރު ވަގުތުގަ އެވެ. އެ ޓީމަށް މި ލަނޑު ޖަހައިދިނީ، 19 އަހަރުގެ މިޑްފީލްޑަރު، އަންޑްރިޖާ މެކްސިމޯވިޗް އެެވެ.
