މިހާރު ނޫހުގެ އޮފީހަށް ބަޔަކު ވަދެ ބިރުދެއްކުމުގެ އަމަލެއް ދާދިފަހުން ހިންގާފައިވާ ކަމަށާއި އެކަން ފުލުހުންގެ ސަމާލުކަމަށް ގެނެސްފައިވާ ކަމަށް އެ ނޫހުން މިއަދު ބުނެފި އެވެ.
"މިހާރު" އިން މިއަދު ނެރުނު ބަޔާނެއްގައި ބުނީ އެ ނޫހުގެ މުވައްޒަފުންނަށް ނުރައްކާ ކުރިމަތިވީ އެ ނޫހާއި ނޫހުގެ ނޫސްވެރިންނާ ބެހޭ ގޮތުން ދައްކާ އެއްވެސް ހަގީގަތެއް ނެތް ވާހަކަތަކެއްގެ ސަބަބުން ކަމަށާއި ނުރައްކާތަކުގެ އެކި ހާލަތްތައް ބަޔާންކޮށް ފުލުހުންގެ ސަމާލުކަމަށް އެކަން ގެނައީ މިއަދު ކަމަށެވެ.
...މި ނޫހާއި މި ނޫހުގެ ބައެއް ނޫސްވެރިންގެ އަގު ވައްޓައިލަން ބަޔަކު ގަސްދުގައި ސާބިތުނުހިފޭ ވާހަކަތައް ފަތުރައި މިނޫހުގެ މުވައްޒަފުންނާ ބުލީކުރާކަން ހިތާމައާ އެކު ފާހަގަކުރަމެވެ. އެކަންކަމުގެ ސަބަބުން ދިމާވާ ފުރައްސާރައާއި ބިރުވެރިކަން ވަނީ ބޮޑުވެފަ އެވެ،" މިހާރުން މިއަދު ނެރުނު ބަޔާނުގައި ބުންޏެވެ.
މިހާރު ނޫހުގެ ބަޔާނުގައި ބުނި ގޮތުގައި އެ ނޫހުގައި ލިޔާ އާޓިކަލްތައް، އޭގެ ހަގީގަތް އޮޅުވާލައިގެން، ސުވާލު އުފެދޭ ގޮތަށް ސޯޝަލް މީޑިއާ ޕޯސްޓްތައް ހަދައިގެން، އެ ނޫހާއި ނޫސްވެރިންނާ މެދު ނަފުރަތު އުފައްދަން ބަޔަކު ދަނީ މަސައްކަތް ކުރަމުންނެވެ. އެއީ އެ ނޫހުގެ އަގުވައްޓައިލަން ދުރާލާ ރާވައިގެން ހިންގާ ކަމެއް ކަމަށް ދެކޭ ކަމަށް ވެސް އެ ބަޔާނުގައި ބުންޏެވެ.
އެ ކަންކަމާ ގުޅިގެން މީގެ ކުރިން ފިޔަވަޅު އަޅާފައި ނުވިޔަސް، ނޫސްވެރިޔަކާ ބެހޭ ގޮތުން ސާބިތުނުހިފޭ ވާހަކައެެއް ދައްކައިފި ނަމަ ގާނޫނީ ފިޔަވަޅުތައް މީގެ ފަހުން އަޅާނެ ކަމުގެ އިންޒާރު ވެސް މިހާރުން މިއަދު ދިނެވެ.
"...ދިވެހިރާއްޖޭގެ ގާނޫނުތަކުގެ އިމުގެ ތެރޭގައި ފާޑުކިއުމާއި ކޮމެންޓްކުރުމަކީ މި ނޫހުން އަބަދުވެސް ތާއީދުކުރާނެ އަދި ހިތްވަރު ވެސް ދޭނެ ކަމެކެވެ،" ބަޔާނުގައި ބުންޏެވެ.
މިހާރު ނޫހުގެ ބަޔާން ނިންމައިލަމުން ބުނީ އެ ނޫހުގެ މުވައްޒަފުން މަސައްކަތްކުރާނީ ރާއްޖޭގެ ގާނޫނުތަކާއި ނޫސްވެރިކަމުގެ ކޯޑް އޮފް އެތިކްސްގެ ތެރޭގައި ކަމަށެވެ.
