ކުރީގެ ރައީސް ޔާމީން އަބްދުލްގައްޔޫމްގެ ގެކޮޅުން "އިންޑިއާ އައުޓް" ބެނާ ނަގަން ކޯޓު އަމުރު ހޯދީ ގާނޫނާ ހިލާފަށް ކަމަށް ހައި ކޯޓުން ނިންމި ނިންމުމަށް ފާޑުވިދާޅުވެ، އަމުރު ނަގަން އެދުނު ސަބަބު ހައިކޯޓަށް ސާފު ނުވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
މި މައްސަލައިގައި ހައިކޯޓުން މައްސަލަ ބެއްލެވި ތިން ފަނޑިޔާރުން ވެސް ބުރަވީ އެ އަމުރު ކްރިމިނަލް ކޯޓުން ނެރުނީ ގާނޫނާ ހިލާފަށް، ކޯޓުން އެފަދަ އަމުރެއް ނެރެދިނުމުގައި ބަލަން ޖެހޭ ކަންކަމަށް ނުބަލާ ކަމުގަ އެވެ.
"ހައިކޯޓުގެ މި ގަޒިއްޔާގެ ނިންމުމަށް ބެލުމުން އަޅުގަނޑަށް އެނގޭ އެއް ކަމަކީ ކްރިމިނަލް ކޯޓުގައި އަމުރެއް ނެރެދިނުމަށް އެދި ފުލުހުން އެދިފައިވާ ސަބަބުތައް ހައިކޯޓަށް އެންމެ ރަނގަޅަށް ސާފުވެފައި ނެތް ކަން،" އެ ނިންމުމަށް ފާޑުވިދާޅުވެ ނަޝީދު ވިދާޅުވި އެވެ.
ނަޝީދު ވަނީ ހައިކޯޓުގެ ގަޒިއްޔާގައި ފާހަގަކޮށްފައިވާ ނުކުތާތައް މަޖިލީހުގެ މިއަދުގެ ޖަލްސާގައި ހިއްސާކުރައްވާފަ އެވެ. އަދި ފުލުހުން އަމުރު ނެރެދިނުމަށް އެދުނު ކަމަށް ހައިކޯޓުގައި ބުނާ ސަބަބުތައް ހިއްސާކުރެއްވި އެވެ.
އެ ސަބަބުތަކަށް އިޝާރާތް ކުރައްވާ ނަޝީދު ވަނީ ކްރިމިނަލް ކޯޓުގައި ފުލުހުން އެ އަމުރަށް އެދުނީ "އެންމެ ސަބަބެއްގެ މައްޗަށް ނޫން" ކަމަށާއި އެތައް ސަބަބުތަކެއްގެ މައްޗަށް ކަމަށް ވިދާޅުވެފަ އެވެ.
ހައިކޯޓުގެ ނިންމުމުން ފާހަގަވާ އަނެއް ކަމަކީ މަޖިލީހުން ފާސްކޮށްފައިވާ ގާނޫނުތައް މާނަކުރުމުގައި، އެ ގާނޫނު އެކުލަވާލި ފަރާތުގެ ނިޔަތް ރަމްޒު ވެފައި ނުވާނަމަ، ގާނޫނު އިސްލާހުކުރަން ޖެހޭ ކަމަށް ނަޝީދު ވިދާޅުވި އެވެ.
ހައިކޯޓުގައި މި މައްސަލަ ބެއްލެވީ ރިޔާސަތުގައި އިންނެވި ފަނޑިޔާރު ހަސަން ޝަފީއުގެ އިތުރަށް ބެންޗުގައި ދެން ތިއްބެވި ފަނޑިޔާރު މުހައްމަދު ނިޔާޒާއި ފަނޑިޔާރު ހުސައިން ޝަހީދެވެ.
ފަނޑިޔާރު ޝަފީއު ވިދާޅުވީ ފަނޑިޔާރު ޝަރީއަތް ހިންގި ގޮތް އެނގޭ ވަސީލަތަކީ ކޯޓުން ނެރުނު އަމުރު އެކަނި ކަމަށް ވުމުން އަމުރުގައި ސަބަބުތައް ބަޔާން ކޮށްދޭން ޖެހޭނެ ކަމަށެވެ.
ޝަފީއުގެ ރައުޔައަށް ދެން ތިއްބެވި ފަނޑިޔާރުން ތާއީދު ކުރެއްވި އެވެ. އެ ރައުޔައަށް ތާއީދު ކުރައްވައި ދެން ތިއްބެވި ފަނޑިޔާރުން ވެސް ވިދާޅުވީ އެ އަމުރުގައި ނިންމުމަށް ވާސިލްވި ސަބަބެއް އަދި ހަމައެއް ފެންނަން ނެތް ކަމެވެ.
