އިލްމް އިންސްޓިޓިއުޓް ފޯ އިސްލާމިކް ސްޓަޑީޒް އިން އިސްނަގައިގެން، ރާއްޖޭގައި އަރަބި ބަސް ކިޔަވައިދޭ މުވައްސަސާތަކަށް ހާއްސަކޮށްގެން، މާލޭގައި ސެމިނާއެއް މިއަދު އިސްލާމިކް މަރުކަޒުގައި ފަށައިފި އެވެ.
މި ސެމިނާ ކުރިއަށް ގެންދަނީ އިސްލާމިކް ވޯލްޑް އެޑިއުކޭޝަނަލް، ސައިންޓިފިކް، ކަލްޗަރަލް އޮގަނަޒޭޝަން (އިސެސްކޯ)ގެ އަރަބިކް ލެންގުއޭޖް ލާނިން ސެންޓަރާ ގުޅިގެންނެވެ. މި ސެމިނާ ފައްޓަވައިދެއްވީ އިސެސްކޯގެ ސެންޓަރުގެ ރައީސް ޕްރޮފެސަރ ޑރ. މަޖްދީ އިސްމާއީލެވެ.
އިލްމް އިންސްޓްޓިއުޓުން ބުނީ މި ސެމިނާގައި އަރަބި ބަސް ކިޔަވައިދިނުުގައި ދިމާވާ ގޮންޖެހުންތައް ދެނެގަނެ، އެ ކަންކަން ހައްލު ކުރުމާ ގުޅޭ މަޝްވަރާތައް ކުރިއަށް ދާނެ ކަމަށެވެ. އަދި މި ސެމިނާގެ ތެރެއިން އިސެސްކޯގެ ފަންނީ ލަފާގެ މަތީން ރާއްޖޭގައި އަރަބި ކިޔަވައިދިނުން މިހާރަށް ވުރެ ހަރުދަނާ ކުރާނެ ގޮތްތައް ދެނެގަންނާނެ ކަމަށް އިލްމް އިންސްޓްޓިއުޓް އިން ބުނެ އެވެ.
ހަތަރު ދުވަހުގެ މުއްދަތަށް ކުރިއަށް ގެންދާ މި ސެމިނާގައި ޕްރޮގްރާމްތައް ނަންގަވައިދިނުމަށް ހަމަޖެހިފައިވަނީ އިސެސްކޯގެ ޕްރޮފެސަރުންނެވެ.
އިސްލާމިކް ސެންޓަރުގައި ފެށި މި ސެމިނާގައި ޖުމްލަ ނުވަ މުވައްސަސާއަކުން ބައިވެރިވި އެވެ. އޭގެ ތެރޭގައި އިސްލާމިކް މިނިސްޓްރާއި އިސްލާމިކް ޔުނިވާސިޓީއާއި ގައުމީ ޔުނިވާސިޓީގެ ސްޓޫޑެންޓް ޔޫނިއަންއާއި އަރަބިއްޔާ ސުކޫލާއި ގުރުއާނާ ބެހޭ މަރުކަޒާއި އެވިޑް ކޮލެޖުގެ އިތުރުން މޯލްޑިވްސް ކޮލިފިކޭޝަން އޮތޯރިޓީ ހިމެނެ އެވެ.
މި މުއައްސަސާތަކުގެ އިސްވެރިންނާއި ފެކަލްޓީތަކުގެ ޑީނުންނާއި ޕްރިންސިޕަލުންނާއި ލެކްޗަރަރުންނާއި މުދައްރިސުންނާއި ދަރިވަރުން ހިމެނޭހެން ޖުމްލަ 30 ފަރާތަކުން ސެމިނާގައި ބައިވެރިވާނެ އެވެ.
އިސެސްކޯއަކީ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ބެލުމުގެ ދަށުން ހިންގަމުން އަންނަ ބައިނަލްއަގްވާމީ އޯގަނައިޒޭޝަނެކެވެ. އިސެސްކޯއިން އަންނަނީ 1979 ވަނަ އަހަރުން ފެށިގެން އިސްލާމީ ގައުމުތަކުގެ ތައުލީމާއި ސައިންސާއި ސަގާފަތާއި މުވާސަލާތީ ދާއިރާތައް ކުރިއެރުވުމަށް މަސައްކަތް ކުރަމުންނެވެ.
