ހައްޖުގެ އަޅުކަން އަދާކުރުމަށް މީހުން ގެންދިއުމުގައި މަކަރު ހަދާ ކުންފުނިތައް 500،000ރ. އާ 750,000ރ. އާ ދެމެދު ޖޫރިމަނާ ކުރެވޭ ގޮތަށް އުސޫލު އިސްލާހުކޮށް މިއަދު އަމަލުކުރަން ފަށައިފި އެވެ.
އިސްލާމިކް މިނިސްޓްރީން މިއަދު އާންމު ކުރި 'ރާއްޖެއިން ހައްޖަށް ގެންދިއުމާ ބެހޭ އުސޫލު" ގައި ހައްޖަށް ގެންދިއުމުގައި މަކަރު ހަދާ ކުންފުނިތައް ޖޫރިމަނާ ކުރެވޭނެ ތިން ގޮތެއް ކަނޑައަޅާފައި އެބަ އޮތެވެ.
އެއީ ހައްޖަށް މީހުން ގެންދިއުމުގައި ފުރިހަމަކުރަން ޖެހޭ އިދާރީ އެއްވެސް ކަމެއް ފުރިހަމަ ނުކޮށްފިނަމަ ކުރާ ޖޫރިމަނާއަކާއި އުސޫލާ ހިލާފަށް ހައްޖުވެރިން އަތުން ފައިސާ ނަގައިފި ނަމަ ކުރާ ޖޫރިމަނާ އަދި ބަޔަކަށް ހައްޖަށް ނުދެވުނީ ކުންފުންޏެއްގެ އިހުމާލުން ކަމަށް ވެއްޖެ ނަމަ ކުރާ ޖޫރިމަނާ އެވެ.
އިދާރީ ކަމެއް ފުރިހަމަ ނުކުރާ ކުންފުނިތައް 5000ރ. އާއި 10000ރ. އާ ދެމެދުގެ އަދަދަކުން ޖޫރިމަނާކުރާނެ އެވެ. އުސޫލާ ހިލާފަށް ހައްޖުވެރިންގެ އަތުން ފައިސާ ނަގައި، ކޮށްގެން ނުވާނެ ކަމެއް ކޮށްފިނަމަ 30،000ރ. އާއި 100،000ރ. އާ ދެމެދު ޖޫރިމަނާ ގުރާގޮތަށް ވެސް އެ އުސޫލުގައި އެބަ އޮތެވެ.
ކުންފުނީގެ އިހުމާލުން ހައްޖުގެ އަޅުކަން އަދާނުކުރެވިއްޖެނަމަ އަދި ހައްޖުވެރިންގެ އަތުން ނެގި ފައިސާއަށް ހިޔާނާތްތެރިވެއްޖެ ނަމަ، 75،000ރ. އާއި 500،000ރ. އާ ދެމެދުގެ އަގަގުން ޖޫރިމަނާ ކުރާނެކަމަށްވެސް އެ އުސޫލުގައިވެ އެވެ.
ހައްޖުގެ ކަންކަން ބެލެހެއްޓުމަށް "މޯލްޑިވްސް ޕިލްގްރިމް އެފެއާޒް އޮފީސް" ގެ ނަމުގައި އާ އޮފީހެއް
ކުރީގެ އުސޫލު އިސްލާހުކޮށް މިއަދު އަމަލުކުރަން ފެށި އުސޫލާ އެއްގޮތަށް ހައްޖަށް މީހުންގެ ގެންދިއުމާ ގުޅޭ ކަންކަން މޮނީޓާކޮށް ބެލެހެއްޓުމަށް، ވަނީ އޮފީހެއް ވެސް ހުޅުވާފަ އެވެ.
އެ އޮފީހުގެ ބޭނުމަކީ ރާއްޖެއިން ހައްޖަށް ދާ މީހުންނާއި އެ މީހުން ގެންދާ ކުންފުނިތައް ސައުދީ އަރަބިއްޔާގައި އުޅޭ ދުވަސްވަރު މައްކާ އާއި މަދީނާގައި މިނިސްޓްރީން ކުރަން ޖެހޭ ރަސްމީ މަސައްކަތްތައް ކުރުމެވެ.
އަދި ރާއްޖެއިން ހައްޖަށް މީހުން ގެންދިއުމުގެ ހިދުމަތް ދޭ ކުންފުނިތަކުން ދެމުންގެންދާ ހިދުމަތާ ގުޅޭ ކަންކަން ރެގިއުލޭޓްކޮށް، ބެލެހެއްޓުމުގެ އިތުރުން ހައްޖަށް މީހުން ގެންދާ ކުންފުނިތައް ޒިންމާދާރުކުރުވައި އެކަމާ ގުޅޭ ގޮތުން ހަދާފައިވާ ގަވައިދުތަކާއި އުސޫލުތަކަށް އަމަލުކުރުވުން ކަމަށްވެސް އުސޫލުގައި އެބަ އޮތެވެ.
ހައްޖަށް މީހުން ގެންދިއުމަށް ވަރުގަދަ އުސޫލެއް ހަދައި ބޮޑެތި އަދަދުތަކުން ޖޫރިމަނާ ކުރާ ގޮތަށް ނިންމާފައި މިވަނީ އިސްލާމިކް މިނިސްޓްރީން ދޫކުރި ޖާގަ އަށް ވުރެ އިތުރަށް، ހައްޖަށް ގެންދާނެ ކަމަށް ބުނެ "އޮޅުވާލައިގެން" ގިނަ ބައެއްގެ އަތުން ފައިސާ އަތުލާފައިވާ މައްސަލަތަކެއް ކުރިން ފެންމަތިވެފައި ވަނިކޮށެވެ.
އެފަދަ ބައެއް މައްސަލަތަކުގެ ޝަރީއަތް މިހާރު ވެސް ކުރިއަށް އެެބަ ދެ އެވެ.
މި އަހަރު ރާއްޖޭން ހައްޖަށް މީހުން ގެންދަން ލިބުނީ 453 ކޯޓާ އެވެ. އިސްލާމިކް މިނިސްޓްރީން ބުނީ ކޯޓާ މަދުން ލިބެއްޖެނަމަ ހައްޖަށް މީހުން ގެންދިޔުމުގެ ހުއްދަ ދޫކުރާނީ ހައްޖު ކޯޕަރޭޝަނާއެކު އިތުރު ދެ ޖަމައަތަށްކަމަށެވެ.
މި އަހަރުގެ ހައްޖު ދުވަހަކީ އަންނަ ޖުލައި މަހުގެ އަަށް ވަނަ ދުވަހެވެ.
