ރައްޔިތުންގެ މަޖިލީހުގެ ހޯރަފުށި ދާއިރާގެ ކުރީގެ މެންބަރު އަދި ޕީޕީއެމްގެ އިސް މެންބަރު މުހައްމަދު އިސްމާއީލް ހައްޔަރުކޮށްފި އެވެ.
ޕީޕީއެމްގެ ތަރުޖަމާނު ހީނާ ވަލީދު މި ނޫހަށް ވިދާޅުވި ގޮތުގައި މުހައްމަދު އިސްމާއީލް އާއި ޕީޕީއެމްގެ އިތުރު އެކްޓިވިސްޓެއް ފުލުހުންގެ ޖިޕަކަށް އަރުވައިގެން ވަނީ ގޮސްފަ އެވެ.
މުހައްމަދު އިސްމާއީލް އާއި އިތުރު މީހަކު ހައްޔަރު ކުރީ، "އިންޑިއާ އައުޓް" ހަރަކާތް ހިންގުމުގައި އިސްކޮށް އުޅޭ ކަމަށް ތުހުމަތުކޮށެވެ. ފުލުހުން ވަނީ އެފަދަ ކަމެއްގައި 48 އަހަރުގެ ދިވެހި ފިރިހެނަކާއި 42 އަހަރުގެ ދިވެހި ފިރިހެނެއް ހައްޔަރުކޮށްފައިވާ ކަމަށް ބުނެފަ އެވެ.
ފުލުހުން ބުނީ އެ ދެ މީހުން ހައްޔަރުކުރީ "އިންޑިއާ އައުޓް" ނަމުގައި ކުރިއަށް ގެންދާ އެއްވުންތަކާއި ރެލީތައް ބޭއްވުމުގައާއި އާންމުކޮށް ފެންނާނޭހެން އިންޑިއާއާ ދެކޮޅުކަން ހާމަވާފަދަ ގޮތަކަށް، އިންޑިއާގެ ގައުމީ ދިދައިގެ ކުލަތަކާއި ނިޝާން ބޭނުންކޮށްގެންނާއި، އިންޑިއާ އައުޓް އަދި އިންޑިއާ އައުޓް ރަމްޒު ވާނޭހެން ލިޔެގެން ބެނާތަކާއި ކުރެހުންތައް އަދި ލިޔުންތައް ތައްޔާރުކޮށް އެތަކެތި މާލެ އާއި ރާއްޖޭގެ އެކި ސަރަހައްދުތަކަށް ފޯރުކޮށްދީ އެ ހަރަކާތް ރާވާ ހިންގާ ކަމުގެ ތުހުމަތުގައި ކަމަށެވެ.
މުހައްމަދު އިސްމާއިލަކީ ޕީޕީއެމްގެ ސިޔާސީ ހަރަކާތްތަކާއި ރެލީ އަދި ކެމްޕެއިންތައް ހިންގުމުގައި އިސްކޮށް ހުންނަވާ ބޭފުޅާ އެވެ.
ޕީޕީއެމް އާއި ޕީއެންސީ ކޯލިޝަނުން ހިންގާ އެ ކެމްޕޭން ހުއްޓުވަން ގާނޫނު ތަންފީޒު ކުރާ އިދާރާތަކަށް އަންގައި، ރައީސް އިބްރާހީމް މުހައްމަދު ސޯލިހް ރިޔާސީ ގަރާރެއް ވަނީ ނެރުއްވާފަ އެވެ. ފުލުހުން އިންޑިއާ އައުޓް ކެމްޕެއިނާ ދެކޮޅަށް ފިޔަވަޅުތައް އަޅަމުން ދަނީ އެ ގަރާރުގެ ދަށުންނެވެ.
ރައީސްގެ ރިޔާސީ ގަރާރަށް ފަހު ކޯޓު އަމުރުގެ ދަށުން އިންޑިއާ އައުޓް ލިޔާ ބައެއް މީހުން ހައްޔަރުކޮށްފައިވާއިރު މާލޭގެ އެކި އިމާރާތްތަކުގައި ދަމާފައިވާ ބެނާތައް ވެސް ނަގާފައިވެ އެވެ.
އިދިކޮޅުން ހިންގާ އެ ކެމްޕޭނަކީ އިންޑިއާ ސިފައިން ރާއްޖޭގައި ގާއިމްވެ ތިބުމާއި އިންޑިއާގެ އަސްކަރީ އެހީ ހޯދަން މި ސަރުކާރުން ގެންގުޅޭ ސިޔާސަތުތަކާ ދެކޮޅަށް ހިންގާ ކެމްޕޭނެކެވެ.
